Revanşistlər nə tarixi həqiqətlər sorağındadır, nə də sülh istəyirlər
Ermənistanın paytaxtı İrəvanda qondarma "erməni soyqırımı" ilə bağlı təşkil olunan yürüşdə növbəti dəfə təxribat törədildi. Yürüş iştirakçıları Türkiyə və Azərbaycan bayraqlarını yandırdılar. Bununla da ürəkləri soyumadı. Nifrət dolu şüarlar səsləndirdilər. Sonra da əllərində məşəllərlə yürüşə başladılar.
"Məşəl yürüşü"nü bu il "imtina etmə" şüarı altında keçirirlər. Əslində isə, təxribatçı ermənilər "imtina etmə" söyləməkdənsə, özlərinə "yalanlardan əl çək, həqiqətləri etiraf et" deməlidirlər. Çünki tarixdən danışırlarsa, o zaman faktları ört-basdır etməyə çalışmamalıdırlar. Yüz on il qabaq keçmiş Osmanlı imperiyasında ermənilərin kütləvi şəkildə öldürüldüyünü iddia edirlərsə, arxivləri araşdırsınlar, tarixi sənədləri oxusunlar və etiraf etsinlər ki, heç zaman, heç bir ölkənin ərazisində ermənilərə qarşı soyqırımı həyata keçirilməyib.
Yurdları olmayan, özgə torpaqlarında məskən salmaq, binələnmək niyyəti onların babalarını bizim ərazilərimizə gətirib. Elə həmişə də xislətində məkr, riyakarlıq, qəddarlıq olan, dondan-dona girməyi yaxşı bacaran ermənilər sonralar öz uydurmalarına, boş xülyalara o qədər aludə olublar ki, "böyük Ermənistan" yalanını ortaya atıblar. Hər fitnəyə əl atıblar. Uydurmalarına tərəfdarlar tapmaq üçün min oyundan çıxıblar. Məqsədlərinə, planlarına görə, dövrün ab-havasına baxıb Azərbaycan xalqı ilə gah mehriban dost, gah rəhimsiz, əzazil düşmən olublar. Təxribatlar törədərək aranı qızışdırıblar, torpaqlarına sığındıqları yerli sakinlərin cəlladına çevriliblər. Silahlı hücuma keçiblər, soydaşlarımızı işgəncələr verməklə vəhşicəsinə qətlə yetiriblər, soyqırımları həyata keçiriblər.
Yüz on il qabaq baş verənlərə gəlincə də, "tarixi araşdırın, arxiv materiallarını, sənədləri, şahid ifadələrini oxuyun, əslində, kimlərin qətliama, soyqırımına məruz qaldığını, kimlərin qəddar cinayətkar, amansız qatil olduğunu görün və etiraf edin", - deyirik.
Qardaş Türkiyə də hər zaman tarixin olduğu kimi təqdim edilməsi mövqeyindən çıxış edir. "1915-ci il hadisələri ilə bağlı tarixi faktlara və beynəlxalq hüquqa zidd olan hər hansı bəyanatı tamamilə rədd edirik. Keçmişin acılarını siyasi səbəblərdən istifadə etmək cəhdlərinin heç bir əsası yoxdur" - Türkiyə XİN-nin bu günlərdə yaydığı bəyanatda bildirilib. Türkiyə qlobal səviyyədə və öz bölgəsində hər zaman sülh, dialoq, qarşılıqlı anlaşma və ortaq rifahın inkişafının tərəfdarı olduğunu vurğulayıb. Bəyanatda bildirilib: "Ölkəmiz bu anlayışla arxivlərini açmış, 1915-ci il hadisələrini ədalətli və elmi şəkildə araşdırmaq üçün Birgə Tarix Komissiyasının yaradılmasını təklif etmişdir. Sizə xatırladırıq ki, radikal dairələrin tarixdən düşmənçilik yaratmaq cəhdlərinə təşviq edilməməlidir və Türkiyə ilə Ermənistan arasında davam edən normallaşma prosesinə dəstək çağırışımızı təkrar edirik".
Lakin Ermənistanın paytaxtında törədilən son təxribat - Türkiyə və Azərbaycan bayraqlarının yandırılması bir daha göstərdi ki, revanşistlər nə tarixi həqiqətlər sorağındadırlar, nə də sülh istəyirlər.
Azərbaycan və Türkiyə bayraqlarının yandırılması erməni barbarlığının, vandalizminin bariz nümunəsidir.
Ermənistanın baş naziri Nikol Paşinyan İrəvanda qondarma "erməni soyqırımı" qurbanlarının xatirəsinə həsr olunmuş "məşəl yürüşü"ndə Azərbaycan və Türkiyə bayraqlarının yandırılmasını pislədi. Baş nazirin mətbuat katibi Nazeli Bağdasaryan Nikol Paşinyanın bunu təxribat adlandırdığını bildirdi: "Baş nazir Paşinyan belə praktikanı pisləyir, bunu məsuliyyətsiz və qəbuledilməz hesab edir. Beynəlxalq səviyyədə tanınmış dövlətin, xüsusən də qonşu dövlətlərin bayraqlarının yandırılmasına dövlət başçısı başqa cür baxa bilməz. Bu, təxribat və qızışdırıcı praktikadır".
Ermənistanın baş nazirinin də məsuliyyətsiz və qəbuledilməz hesab etdiyi, təxribat adlandırdığı bu hadisə Ermənistanın paytaxtında reallaşıb. Baş verənlər göstərir ki, Nikol Paşinyan yenə revanşistlərə meydan verir. Belə olmasaydı, erməni vandallarına başqa ölkənin dövlət atributlarına hörmətlə yanaşılmalı olduqları hüquq çərçivəsində izah edilər, cinayət əməllərinə görə məsuliyyətə cəlb olunaraq qanun qarşısında cavab verərlər.
Azərbaycan dövləti və xalqı sülh məramına sadiqdir. Dövlətimizin başçısı İlham Əliyevin bəyan etdiyi kimi, Ermənistan ilə Azərbaycan arasında sülh gündəliyinin təşəbbüskarı məhz Azərbaycan tərəfi olub. Belə ki, sülh gündəliyinin əsasını təşkil edən fundamental prinsiplər Azərbaycan tərəfindən formalaşdırılıb və təqdim olunub. Azərbaycan tərəfi həmçinin bunun əsasında sülh müqaviləsinin mətnini hazırlayıb. Dövlətimiz sülh sazişinin imzalanması istiqamətində ardıcıl və qətiyyətli addımlar atır.
XX əsrin ayrı-ayrı illərində erməni vandallarının soyqırımına məruz qalan Azərbaycan xalqıdır. Erməni cəlladlarının 1990-cı illərdə Azərbaycanın Xocalı, Ağdaban, Meşəli, Qaradağlı, Başlıbel və daha neçə-neçə ərazisində törətdikləri qətliamların, soyqırımların şahidləri bu gün də aramızdadır. Həmin dəhşətli cinayətləri həyata keçirənlərin bəziləri bu gün qanun qarşısında cavab verir, cinayətkar olduqlarını məhkəmə prosesində özləri də etiraf edirlər. Şahidlərin ifadələri də bunu təsdiqləyir. Xatırladaq ki, Ermənistan Respublikasının vətəndaşları Arayik Harutyunyan, Arkadi Qukasyan, Bako Sahakyan, David İşxanyan, Davit Babayan, Levon Mnatsakanyan və digərləri Ermənistanın Azərbaycana qarşı hərbi təcavüzü nəticəsində sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması və aparılması, soyqırımı, müharibə qanunlarını və qaydalarını pozma, habelə terrorçuluq, terrorçuluğu maliyyələşdirmə, hakimiyyəti zorla ələ keçirmə, onu zorla saxlama və digər çoxsaylı cinayətlər törətməkdə təqsirləndirilirlər. Azərbaycan xalqına qarşı dəhşətli cinayətlər törətmiş şəxslərin məsuliyyətə cəlb olunmaları, qanun qarşısında cavab vermələri beynəlxalq hüquq çərçivəsindədir.
Vətən müharibəsində Qarabağ və Şərqi Zəngəzur ərazilərini Ermənistanın otuzillik işğalından azad edəndə də, antiterror əməliyyatları nəticəsində ərazi bütövlüyünü, suverenliyini bərpa edəndə də Azərbaycan gücünü, qüdrətini göstərdi. Vətənimiz naminə, üçrəngli, ay-ulduzlu bayrağımız bütün ərazilərimizdə ucalsın deyə, bu xalqın minlərlə qəhrəman övladı canından keçdi. Artıq ölkəmizin digər əraziləri kimi, Şuşada, Xankəndidə, Xocalıda, Ağdamda, Füzulidə, Qubadlıda, Laçında, Kəlbəcərdə də bayrağımız dalğalanır. Düşmən hansı təxribatlara əl atırsa, atsın, bu həqiqəti heç zaman dəyişə bilməyəcək. Bu müqəddəs bayrağı hər zaman ucalarda görəcək.
Zöhrə FƏRƏCOVA,
"Azərbaycan"
