Səudiyyə Ərəbistanı vurğulayıb ki, hakimiyyət orqanları xaricdən 1,5 milyondan çox zəvvarın gəlişini elan etdikdən və Krallıq boyunca yüzlərlə saxta Həcc kampaniyasının ifşa olunmasından sonra Həcc mövsümünün dini məqsədlərini pozan hər hansı bir fəaliyyət üçün sui-istifadəyə icazə verməyəcək.
AZƏRTAC “Saudi Gazette” nəşrinə istinadla xəbər verir ki, bu barədə Məkkədəki Vahid Təhlükəsizlik Əməliyyatları Mərkəzində (911) Həcc təhlükəsizlik komandirlərinin keçirdiyi mətbuat konfransında bildirilib. Məhz burada rəsmilər Hicri təqvimi üzrə 1447-ci il Həcc mövsümü üçün təhlükəsizlik, yol hərəkəti və təşkilati planları nəzərdən keçiriblər.
İctimai təhlükəsizlik rəhbəri və Həcc Təhlükəsizlik Komitəsinin sədri general-leytenant Muhammed Əl-Bəssami Həcc təhlükəsizlik sisteminin mövsüm zamanı öz vəzifələrini yerinə yetirməyə tam hazır olduğunu təsdiqləyib. “Məqsədimiz hər bir zəvvarın təyinat yerinə çatması, ayinlərini yerinə yetirməsi və vətəninə sağ-salamat qayıtmasıdır”, - deyə o vurğulayıb.
Əl-Bəssami izah edib ki, izdihamın idarə olunması planları hərəkət axınlarının təşkilinə, izdiham sıxlığının paylanmasına və marşrutların üst-üstə düşməsinin mümkün qədər azaldılmasına yönəlib, qabaqcıl texnologiyalar isə təhlükəsizlik işçiləri ilə birlikdə Həcc qaydalarının tətbiqi, habelə saxta kampaniyalar və pozucuları aşkar etmək üçün çalışır. Onun sözlərinə görə, Krallığın hakimiyyət orqanları ölkə daxilində 217-dən çox saxta Həcc kampaniyasını ləğv edib və Məkkəyə qanunsuz girməyə cəhd edən 7733 yaşayış yeri, əmək və sərhəd təhlükəsizliyi qanunlarını pozan şəxsi geri qaytarıb.
Hakimiyyət orqanları, həmçinin Məkkəyə giriş məntəqələrində 366 min icazəsiz şəxsin girişinə icazə verməyib və pozucuları daşımaq üçün istifadə edilən minlərlə icazəsiz nəqliyyat vasitəsini saxlayıb. Əl-Bəssami bildirib ki, sahə göstəriciləri ötən illə müqayisədə qaydalara riayət olunmasında əhəmiyyətli dərəcədə yaxşılaşma göstərib, o cümlədən qayda pozanların və deportasiya edilənlərin sayında 44 faiz, saxta Həcc kampaniyalarında 12 faiz, yaşayış yeri və sərhəd qaydaları ilə bağlı pozuntularda 33 faiz azalmalar müşahidə olunub.
Xüsusi Təcili Yardım Qüvvələrinin komandanı general-leytenant Məhəmməd Əl-Omari təhlükəsizlik planlarının inteqrasiya olunmuş, proaktiv və çevik olduğunu, izdihamın hərəkətini tənzimləmək və təhlükəsizliyi təmin etmək üçün Namirə məscidi, Cəbəl əl-Rəhmə və Cəmarət obyekti də daxil olmaqla əsas yerlərə qüvvələrini yerləşdirildiyini bildirib.
Mülki Müdafiə Baş Direktoru general-mayor Hamud Əl-Fərəc bildirib ki, hakimiyyət orqanları Həcc mövsümündə riskləri izləmək və sürətli cavab imkanlarını artırmaq üçün profilaktik təhlükəsizlik tədbirlərini gücləndirib, bu məqsədlə müasir texnologiyalar və süni intellekt sistemlərini inteqrasiya edib.
Pasport İdarəsinin baş direktoru general-mayor Saleh Əl-Murabba cümə günü günortadan sonra 1,518 milyondan çox zəvvarın xaricdən, o cümlədən hava limanlarından gəldiyini açıqlayıb.
