Bu "iş rejimi" xəstəxanada yox, başqa müəssisədə tətbiq edilsəydi, bəlkə də susmaq olardı

Sərlövhəni oxuyan hər kəs yəqin ki, təəccüblənəcək. Necə yəni, Nazirlər Kabinetinin iş və bayram günləri ilə bağlı verdiyi qərara kimsə əlavələr edir?! Ancaq sən demə, Gəncə Endokrinoloji Xəstəxanasında bu arzuya düşüblərmiş. 
Məlum olduğu kimi, dövlət tərəfindən şəkərli diabet xəstələri üçün çoxsaylı güzəştlər edilir, o sıradan hər ay həmin xəstələr pulsuz dərman vasitələri ilə təmin olunurlar. Ayda bir dəfə dərmanla təmin edilən xəstələr bu hesaba sağlamlıqlarını qoruyurlar. Təəssüflər olsun ki, dövlətin öz vətəndaşlarına göstərdiyi bu qayğı bəzi hallarda səhiyyə ocaqları tərəfindən elə yerinə yetirilir ki, yetirilməsə ondan yaxşıdır. 
Gəncədəki Endokrinoloji Xəstəxana şəhərin mərkəzinda yerləşir. Bu günlərdə, konkret desək, iyunun 25-də xəstəxananın yanından keçərkən qarşısında çox sayda insanın toplaşdığını gördük. Maraq bizi onların yanına çəkdi və bir ahıl qocadan bu səs-küylü toplantının səbəbini soruşduq. Dedi ki, şəkər xəstələridir, onlar hər ayın sonuna yaxın gəlib dərmanlarını götürürlər. Ancaq bu gün xəstəxana bağlıdır. 
Xəstəxananın rəhbərliyindən bunun səbəbini öyrənmək istədik. Baş həkim Sevda Əsgərova dedi ki, sabah bayram - Silahlı Qüvvələr Günü olduğu üçün bu gün günortayacan işləyirik.
Məsələyə aydınlıq gətirmək üçün  Gəncə Şəhər Birləşmiş Xəstəxananın direktoru İlkin İsmayılovla əlaqə saxlayıb Endokrinoloji Xəstəxanada baş verənləri bildirdik. Direktor məsələyə aydınlıq gətirəcəyini söylədi və... işini bununla bitmiş hesab etdi.  Xəstəxananın qarşısında isə insanlar dərmanlarını almaq üçün gözləməkdə  davam edirdilər, hətta ümidlərini üzsələr də...
Söz düşmüşkən qeyd edək ki, Gəncə Endokrinoloji Xəstəxanası yararsız binada yerləşir. Binaya daxil olmaq üçün ehtiyatla hərəkət etmək lazımdır.  Çünki xəstəxananın  taxta pilləkənləri çürümüş, döşəməsi qəzalı vəziyyətə düşmüşdür. Tibb heyətinin oturduğu otaqlar da yararsız vəziyyətdədir. Üstəlik avadanlıqlar köhnədir, dərmanların saxlandığı yerdə isə antisanitariya hökm sürür. Bunlar azmış kimi, tibb ocağında xəstələrə 15-20 il əvvəl təyin olunmuş dərmanlar verilir. Halbuki xəstələr ildə bir neçə dəfə müayinə edilməli, onlara yeni təyinatlar yazılmalıdır. Xəstələrdə qan analizi isə heç vaxt aparılmır, bunun üçün test də verilmir. Bir sözlə, bu tibb müəssisəsi Gəncə Şəhər Birləşmiş Xəstəxanası tərəfindən tamamilə unudulmuşdur. 
Hazırda hər il ölkəmizdə müasir avadanlıqlarla təchiz olunan yeni tibb ocaqları istifadəyə verilir. Bunun fonunda Gəncə Endokrinoloji Xəstəxanasındakı vəziyyət, yumşaq desək, təəssüf doğurur. Amma güman edirik ki, TƏBİB sözügedən xəstəxana haqqında lazım olan tədbirləri görəcəkdir. Bu, ilk növbədə xəstəxanada qeydiyyatda olan şəkərli diabet xəstələrinin arzusudur.        

Sabir ƏLİYEV,
"Azərbaycan"