Dünya üzrə elektromobil satışları cari ilin aprel ayında ötən ilin eyni dövrü ilə müqayisədə 6 faiz artaraq 1,6 milyon ədəd təşkil edib.
Anadolu Agentliyi xəbər verir ki, Londonda yerləşən “Benchmark Mineral Intelligence” analiz şirkətinin hesabatına görə, illik artıma baxmayaraq, mart ayı ilə müqayisədə satışlarda 9 faizlik azalma müşahidə olunub.
Avropa aprel ayında da elektromobil satışlarının artımında əsas hərəkətverici qüvvə olub. Yanacaq qiymətlərinin Yaxın Şərqdəki münaqişələr səbəbindən yüksəlməsi istehlakçıları elektrikli modellərə yönəldib. Avropada satışlar illik 27 faiz artaraq 400 mini ötüb. İlin əvvəlindən bəri Avropa bazarında ümumi artım 26 faizə çatıb.
Dünyanın ən böyük elektromobil bazarı olan Çində daxili satışlar illik 8 faiz azalaraq 850 minə düşüb. Bu geriləməyə əsas səbəb kiçik avtomobil seqmenti üçün subsidiyaların ləğv edilməsi olub. Lakin daxili tələbatın zəifləməsi ixracın sürətlənməsinə yol açıb. Belə ki, Çin aprel ayında 400 mindən çox, ilin ilk 4 ayında isə 1,4 milyon elektromobil ixrac edib. Çin istehsalı olan avtomobillər, xüsusilə Avropa, Cənubi Amerika və Cənub-Şərqi Asiya bazarlarında dominantlığını artırır.
Bundan başqa, Şimali Amerika bazarında satışlar apreldə illik 28 faiz azalaraq 120 min səviyyəsinə düşüb. ABŞ və Kanadada maraq azalsa da, Çindən gələn idxal hesabına Meksika bazarında böyümə qeydə alınıb.
“Benchmark Mineral Intelligence”in məlumat meneceri Çarlz Lester bildirib ki, ilin əvvəlindən bəri qlobal miqyasda 5,6 milyon elektromobil satılıb. Onun sözlərinə görə, Avropa və digər bölgələrdəki güclü artım Çin və Şimali Amerikadakı azalmanı balanslaşdırır. Lakin regional fərqlər, ixrac artımı və dəyişən rəqabət dinamikası göstərir ki, qlobal bazar daha mürəkkəb bir mərhələyə daxil olur.
Təhminə VERDİYEVA,
“Azərbaycan”
jpg_1782225479.jpg)
