Qax rayonunda kənd təsərrüfatının inkişafı, aqrar sahədə həyata keçirilən tədbirlərin səmərəliliyinin qiymətləndirilməsi və 2026–2030-cu illəri əhatə edən Dövlət Proqramından irəli gələn vəzifələrin icra vəziyyətinin öyrənilməsi məqsədilə monitorinq keçirilib.
AZƏRTAC-ın bölgə müxbiri xəbər verir ki, monitorinqin nəticələrinin öyrənilməsi məqsədiilə Prezident Administrasiyasının məsul əməkdaşı və rayon rəhbərliyi Dövlət Proqramında nəzərdə tutulan tədbirlər üzrə sahibkarların təşəbbüsləri və görülən işlərlə yerində tanış olublar.
İlk olaraq “Ulu Aqro” MMC tərəfindən həyata keçirilən badam və qoz emalı müəssisəsinin yaradılması layihəsinə baxış keçirilib. Ümumi investisiya dəyəri 2 milyon manat olan layihə çərçivəsində illik 18 min ton badam və qoz emal etmək gücünə malik müəssisənin qurulması və 30 yeni iş yerinin yaradılması planlaşdırılır. Mövcud tikili hazır vəziyyətə gətirilib, Türkiyə və Çin şirkətləri ilə müvafiq avadanlıqların gətirilməsi barədə danışıqlar aparılır, avadanlıqların iş prinsiplərinin öyrənilməsi üçün yerli mütəxəssislər həmin ölkələrə ezam olunublar. Avadanlıqların 2027-ci ilin iyun-iyul aylarında gətirilməsi, layihənin isə 2028-ci ilin may ayında yekunlaşdırılması nəzərdə tutulur.
Sonra sahibkar Elnur Muradovun təsərrüfatına baxış keçirilib. 255 min manat investisiya həcminə malik layihə çərçivəsində yeni 50 hektar sahədə 6 ədəd pivot suvarma sistemi qurulmaqla məhsuldarlığın artırılması hədəflənir. Təsərrüfatda artıq 6 ədəd pivot quraşdırılıb və hazırda enerjinin daimi verilməsi üçün transformatorun qurulması istiqamətində işlər davam etdirilir.
Səfər zamanı “Tam Aqro” MMC tərəfindən icra olunan strateji layihələrlə də tanışlıq olub. Şirkət tərəfindən 3,02 milyon manat investisiya ilə illik 50 min ton yüksək reproduksiyalı taxıl toxumu istehsal edəcək toxum emalı zavodu yaradılır. Zavod üçün bina inşa edilib, 3 binanın layihələndirmə işlərinə başlanılıb və Türkiyədən 0,3 milyon manat dəyərində avadanlıqlar gətirilib. Şirkətin digər layihəsi isə 2,38 milyon manat investisiya ilə yeni 500 hektar sahədə 10 ədəd pivot qurulmaqla ərzaqlıq buğda istehsalını artırmaqdan ibarətdir.
Bundan başqa, sahibkar İsrafil Səfərovun quş əti (qaz əti) istehsalı layihəsinə də baxış keçirilib. 80 min manat investisiya ilə 80 min ədəd ətlik qazın yetişdirilməsini və 20 iş yerinin yaradılmasını nəzərdə tutan layihə üzrə quşların saxlanılması üçün yüngül konstruksiyalı konteynerlərin gətirilməsi planlaşdırılır, hazırda kredit imkanları araşdırılır.
Sahibkar Hüseyn Tarverdiyev tərəfindən 700 min manat investisiya ilə yaratmış 1,2 min tonluq meyvə-tərəvəz saxlama soyuducu anbarı kompleksinə baxış keçirilib. 20 yeni iş yerinin yaradılacağı layihə üzrə mövcud bina hazır vəziyyətə gətirilib və Türkiyə istehsalı olan avadanlıqların alınması üçün smeta layihəsi tərtib olunub.
Baxış zamanı əkin sahələrinin səmərəli istifadəsi, məhsuldarlığın artırılması, müasir aqrotexniki tədbirlərin tətbiqi, suvarma imkanlarından səmərəli istifadə, kənd təsərrüfatı məhsullarının istehsalı və emalı, fermer təsərrüfatlarının inkişafı, eləcə də aqrar sahədə müasir texnologiyaların tətbiqi məsələlərinə xüsusi diqqət yetirilib.
Fermer və təsərrüfat sahibləri ilə görüşlər zamanı onların fəaliyyətinə təsir göstərən məsələlər dinlənilib, mövcud imkanlar və ehtiyaclar müzakirə olunub. Eyni zamanda, dövlət dəstəyi mexanizmlərindən səmərəli istifadə, istehsalın genişləndirilməsi və məhsulların bazara çıxış imkanlarının artırılması ilə bağlı fikir mübadiləsi aparılıb.
Monitorinqin nəticələri təhlil edilərək müəyyən edilmiş məsələlərin aidiyyəti qurumlarla birgə həlli və 2026–2030-cu illər üzrə müəyyənləşdirilmiş tədbirlərin Qax rayonunda ardıcıl və səmərəli icrasının təmin olunması istiqamətində müvafiq işlərin davam etdirilməsi nəzərdə tutulub.
jpg_1792768764.jpg)
