Yerli və beynəlxalq tədbirlərə uğurla ev sahibliyi etmiş Xankəndi şəhəri bu gün sosial xidmətlərin gələcəyinin müzakirə mərkəzidir.
AZƏRTAC xəbər verir ki, sosial sahədə innovativ idarəetməyə yönəlmiş qlobal platforma olan "SOCGOV" oktyabrın 23-də Xankəndidə keçirilir. “Ağıllı idarəetmə üçün rəqəmsal təhlil” mövzusuna həsr olunan forum yerli və beynəlxalq ekspertləri bir araya gətirib.
Tədbir sosial xidmətlərdə süni intellekt və rəqəmsal analitikanın tətbiq perspektivlərinin qiymətləndirilməsi, dövlət-vətəndaş münasibətlərinin daha əlçatan, çevik və şəffaf model üzərində qurulması üçün innovativ həllərin müəyyən edilməsi məqsədi daşıyır.
Beynəlxalq Sosial Təminat Assosiasiyası (BSTA) kimi nüfuzlu qurumların rəsmi təqvimində yer alan forumda dünyanın 12 ölkəsindən 300-ə yaxın nümayəndə, o cümlədən ekspertlər və vəzifəli şəxslər iştirak edirlər.
Tədbirdə əvvəlcə DOST İnklüziv İnkişaf və Yaradıcılıq Mərkəzinin əməkdaşlarının və benefisiarlarının ifasında Azərbaycanın Dövlət Himni səsləndirilib, ərazi bütövlüyümüz və suverenliyimiz naminə canından keçmiş qəhrəmanların əziz xatirəsi bir dəqiqəlik sükutla yad edilib.
Tədbirin rəsmi hissəsində əmək və əhalinin sosial müdafiəsi naziri Anar Əliyev, Türkiyənin əmək və sosial müdafiə naziri Vedat Işıkhan, BSTA-nın Baş katibi Marcelo Abi-Ramia Caetano (videomüraciət), Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, Avropa Sosial Şəbəkəsinin sədri Kristian Fillet (videomüraciət) çıxış ediblər.
Rəsmi hissədən sonra "Süni intellekt və dataəsaslı dövlət idarəçiliyi: imkanlar, risklər və gələcək" mövzusunda panel sessiya, o cümlədən dövlət və özəl sektorun baxışlarını əks etdirən spikerlərin qısa çıxışları və debatları olub.
Tədbir zamanı, həmçinin DOST Agentliyinin fəaliyyətini əks etdirən, o cümlədən "SOCGOV 2026"ya aid videoçarxlar da nümayiş etdirilib.
Bundan əlavə, tədbirdə tematik İşçi qrupları ilə müzakirələr təşkil olunacaq. Müzakirələrin mərkəzində rəqəmsal analitika, süni intellektin sosial xidmətlərə tətbiqi, etik idarəetmə və məlumatlara əsaslanan qərarvermə dayanır.
Forumda sosial xidmətlər sahəsində süni intellektəsaslı innovativ həlləri təşviq edən “AI4DOST Social Award” beynəlxalq müsabiqəsinin qaliblərinin mükafatlandırılması da nəzərdə tutulur.
Qeyd edək ki, tədbirin keçirilməsi üçün Xankəndinin seçilməsi simvolik əhəmiyyət daşıyır. Bu, işğaldan azad olunmuş ərazilərdə qurulan yeni həyatın və “Ağıllı şəhər” konsepsiyasının təqdimatı baxımından mühüm əhəmiyyət kəsb edir.
“SOCGOV 2026” sosial xidmətlərin rəqəmsal analitika əsasında inkişafı, “ağıllı” idarəetmə modellərinin tətbiqi və bu sahədə qabaqcıl beynəlxalq təcrübələrin mübadiləsi baxımından mühüm platforma olacaq.
