Qarabağ Universiteti Klinikasının təsis olunması Qarabağ bölgəsində səhiyyə xidmətlərinin inkişafında mühüm rol oynayacaq və regionda mövcud səhiyyə boşluqlarının aradan qaldırılmasına töhfə verəcək.
AZƏRTAC-ın bölgə müxbiri xəbər verir ki, bunu Qarabağ Universitetində “Qarabağda gələcəyin tibb bacısı və həkim təhsili modeli” mövzusunda keçirilən beynəlxalq konfrans çərçivəsində jurnalistlərə açıqlamasında Qarabağ Universiteti Klinikasının baş direktoru Samir Babayev söyləyib.
S.Babayev gələcəkdə yaradılacaq Tibb və sağlamlıq elmləri fakültəsi haqqında danışaraq deyib: “Gələcəkdə yaradılacaq Tibb və sağlamlıq elmləri fakültəsi vasitəsilə yalnız peşəkar deyil, eyni zamanda, innovativ düşüncəli, şəfqətli və etik dəyərlərə malik səhiyyə mütəxəssisləri yetişdirməyi qarşıya məqsəd qoymuşuq. Qarabağ Universiteti Klinikası və gələcək fakültəmizi beynəlxalq standartlara cavab verən, bölgədə və dünyada tanınan bir səhiyyə, təhsil və innovasiya mərkəzinə çevirməyi hədəfləyirik”.
Samir Babayev Tibb fakültəsində planlaşdırılan əsas proqramlar barədə məlumat verib: “6 illik tibb və 4 illik tibb bacısı təhsili bu il başlanır. Bu, xəstəyə qulluqda ixtisaslaşmış, eyni zamanda, araşdırma və liderlik bacarıqlarına malik tibb bacıları yetişdirməyi hədəfləyir. Diş həkimliyi və başqa proqramları da yaxın illərdə başlamaq istəyirik”.
Baş direktor rezidentura və magistratura səviyyələrində də müxtəlif ixtisaslaşma imkanları, o cümlədən İctimai Səhiyyə üzrə Magistr (MPH) təklif olunacağını deyib: “Seçmə fənn olaraq incəsənət proqramını nəzərə almaq özünüifadə, qrup halında əməkdaşlıq və ünsiyyət bacarıqlarının inkişafı baxımından mühüm əhəmiyyət daşıyır. İncəsənət tələbələrə əsas fənlərdə əldə edə bilməyəcəkləri bacarıqları inkişaf etdirmək imkanı yaradır. Fakültəmizdə ənənəvi öyrənmə metodları ilə kifayətlənmirik. Bunun əvəzinə, kompetensiyaya əsaslanan tibb təhsili tətbiq edirik ki, tələbələr biliklərini praktik vərdişlərə çevirə bilsinlər. İnteqrə olunmuş və fənlərarası təhsil modelindən istifadə edirik”.
Baş direktor bildirib ki, “Qarabağda gələcəyin tibb bacısı və həkim təhsili modeli” mövzusunda keçirilən beynəlxalq konfransın əsas məqsədi gələcək tibb və tibb bacısı proqramlarının tədris modelini, kompetensiya çərçivələrini və idarəetmə strukturunu formalaşdırmaqdır.
“Konfransda tibbi təhsil sahəsində məşhur olan Kernin 6 mərhələli yanaşmasından istifadə edəcəyik. Bu yanaşmanın əsasını problem müəyyənləşdirməsi, tələbələrin ehtiyaclarının dəyərləndirilməsi, tədris məqsədlərinin formalaşdırılması, təhsil strategiyalarının hazırlanması, tətbiq edilməsi və nəticələrin qiymətləndirilməsi təşkil edir. İnanırıq ki, bu metodologiya beynəlxalq standartlara uyğun, eyni zamanda, yerli ehtiyaclara cavab verən tədris proqramının yaranmasını təmin edəcək. Konfransın nəticəsi olaraq tibbi və tibb bacısı təhsili üçün vahid tədris strategiyası və kompetensiya çərçivəsi hazırlanacaq. Bundan əlavə, tədris proqramlarının effektiv idarə edilməsi və davamlı təkmilləşdirilməsi üçün Məsləhət Şurasının təsis edilməsini planlaşdırırıq. Konfransda əldə ediləcək razılaşmalar gələcəkdə proqramların effektiv tətbiq olunmasına zəmin yaradacaq”, - deyə o bildirib.
