İyulun 8-də Elm və Təhsil Nazirliyində “Peşə təhsili üzrə ixtisasların Təsnifatı”nın yenilənməsi istiqamətində yaradılmış işçi qrupun ikinci iclası keçirilib.
Bu barədə AZƏRTAC-a Elm və Təhsil Nazirliyindən məlumat bildirilib.
Elm və təhsil nazirinin müavini, işçi qrupun sədri Kənan Kərimzadənin rəhbərliyi ilə keçirilən iclasda Elm və Təhsil Nazirliyi, Peşə Təhsili üzrə Dövlət Agentliyi, Təhsil İnstitutu, İqtisadiyyat Nazirliyi, Əmək və Əhalinin Sosial Müdafiəsi Nazirliyi və Dövlət Turizm Agentliyinin nümayəndələri iştirak ediblər.
İclası açan Kənan Kərimzadə bildirib ki, peşə təhsili üzrə ixtisasların təsnifatının yenilənməsi əmək bazarının dəyişən tələblərinə cavab verən, çevik və müasir peşə təhsili sisteminin formalaşdırılması baxımından əhəmiyyət daşıyır. O, ilk iclas zamanı aparılmış müzakirələrin və aidiyyəti qurumlar tərəfindən təqdim edilmiş təkliflərin layihənin təkmilləşdirilməsinə mühüm töhfə verdiyini vurğulayıb.
Daha sonra Elm, ali və peşə təhsili şöbəsinin sektor müdiri Səbinə Babayeva təqdimatla çıxış edərək birinci iclasda səsləndirilən mülahizələr, eləcə də aidiyyəti dövlət qurumlarından daxil olmuş rəy və təkliflər əsasında layihədə aparılmış dəyişikliklər barədə ətraflı məlumat verib. Təqdimat zamanı layihənin yenilənmiş strukturu, ixtisas istiqamətlərinin əmək bazarının mövcud və perspektiv tələblərinə uyğunlaşdırılması, yeni peşələrin təsnifata daxil edilməsi, həmçinin beynəlxalq təcrübə ilə uyğunluğun təmin edilməsi istiqamətində görülən işlər diqqətə çatdırılıb. İclas çərçivəsində işçi qrupunun üzvləri tərəfindən layihə ətrafında geniş müzakirələr aparılıb. Müzakirələr zamanı peşə təhsili üzrə ixtisasların daha səmərəli qruplaşdırılması, terminoloji vahidliyin təmin edilməsi, eləcə də əmək bazarında formalaşan yeni peşə istiqamətlərinin təsnifatda öz əksini tapması ilə bağlı fikir və təkliflər səsləndirilib.
İclasın sonunda layihənin yekunlaşdırılması ilə bağlı növbəti mərhələlər, qarşıda duran vəzifələr və fəaliyyət planı müzakirə olunub. İşçi qrupunun üzvləri layihənin əmək bazarının inkişaf meyilləri və beynəlxalq yanaşmalar nəzərə alınmaqla tamamlanmasının əhəmiyyətini vurğulayaraq, bu istiqamətdə müzakirələrin davam etdirilməsi barədə razılığa gəliblər.
