Ölkəmizin beynəlxalq əlaqələrinin inkişafında Azərbaycan parlamentinin xüsusi rolu var. Parlament diplomatiyası dövlətimizin xarici siyasət kursunda mühüm yer tutur. Bu baxımdan Milli Məclisin beynəlxalq fəaliyyəti xüsusi qeyd olunmalıdır.
Məlumdur ki, Milli Məclis bir sıra beynəlxalq təşkilatlarda təmsil olunur, eləcə də bir çox ölkənin parlamentləri ilə dostluq qrupları fəaliyyət göstərir. Əlbəttə, parlament çox mühüm hakimiyyət qoludur və onun işində beynəlxalq fəaliyyət xüsusi yer tutur. Parlamentarilər beynəlxalq miqyasda Azərbaycan həqiqətlərinin təbliği istiqamətində öz üzərlərinə düşən vəzifələri layiqincə yerinə yetirməyə çalışırlar.
Milli Məclisin deputatı Pərvin KƏRİMZADƏ qəzetimizə açıqlamasında deyib ki, parlament bir çox nüfuzlu təşkilatın - Parlamentlərarası İttifaq, ATƏT PA, MDB PA, Asiya PA, Qara Dəniz İqtisadi Əməkdaşlıq Təşkilatı PA, GUAM PA, TÜRKPA və NATO PA-nın işində aktiv təmsil olunur: "Məhz bu təşkilatlar çərçivəsində aparılan uğurlu əməkdaşlıq fəaliyyəti nəticəsində vaxtilə Ermənistanın işğalçılıq siyasətini ifşa edən qərarlar qəbul edilib. Belə təşkilatlar sırasında İslam Əməkdaşlıq Təşkilatı Parlament İttifaqı xüsusi qeyd edilməlidir. Bu təşkilat vaxtilə Ermənistanın işğalçılıq siyasətini dəfələrlə pisləməklə yanaşı, Xocalı soyqırımını da tanıyıb. Hazırda isə Bakıda İslam Əməkdaşlıq Təşkilatının üzvü olan dövlətlərin Parlament İttifaqı Konfransının 20-ci Sessiyası keçirilir".
Milli Məclisin İƏT Parlament İttifaqı ilə də fəal əməkdaşlıq etdiyini diqqətə çatdıran deputat qeyd edib ki, bu qurumda Azərbaycan parlamentinin beş nəfərdən ibarət nümayəndə heyəti təmsil olunur: "Məlumdur ki, müasir beynəlxalq münasibətlər sistemində parlament diplomatiyasının artan nüfuzu artıq reallıqdır. Məhz bunun nəticəsidir ki, son illər qanunverici orqan vasitəsilə atılan addımlar Azərbaycanın dövlət siyasətinin mühüm komponentinə çevrilib. Parlament diplomatiyasının məqsədi dövlətlər və regionlar arasında əlaqələrin və inteqrasiyanın dərinləşdirilməsinə nail olmaqdır. Azərbaycan parlamenti hər zaman Prezident İlham Əliyevin yürütdüyü daxili və xarici siyasi kursunu birmənalı şəkildə dəstəkləyib. Görülən işlər nəticəsində ölkəmizin beynəlxalq platformalardakı mövqeyi daha da güclənib, dünya ölkələri ilə qarşılıqlı etimada əsaslanan əməkdaşlıq münasibətləri dərinləşib. Hakimiyyətin mühüm qolu olan parlamentin işində beynəlxalq fəaliyyət prioritet istiqamət kimi ön plana çıxır. Bu istiqamətdə ikitərəfli və çoxşaxəli parlament təşkilatları ilə əlaqələrin inkişafı istiqamətində sistemli tədbirlər görülür. Eyni zamanda millət vəkilləri Azərbaycan həqiqətlərinin dünya ictimaiyyətinə çatdırılması və milli maraqlarımızın təbliği istiqamətində üzərlərinə düşən missiyanı layiqincə yerinə yetirirlər".
P.Kərimzadə bildirib ki, son illər həyata keçirilən parlament diplomatiyası nəticəsində Azərbaycanın beynəlxalq münasibətlər sistemində və beynəlxalq platformalarda mövqeyi daha da möhkəmlənib: "Azərbaycanda artıq beynəlxalq və regional təşkilatların parlament şəbəkələrinin toplantılarının keçirilməsi ənənəsi formalaşıb. Son illər parlament diplomatiyası çərçivəsində Azərbaycan bir çox beynəlxalq səviyyəli tədbirə və toplantıya evsahibliyi edib. Eyni zamanda dünyanın ən müxtəlif ölkələrinin parlament nümayəndələri ölkəmizə səfər edirlər. Müxtəlif ölkələrin parlamentləri ilə sıx əməkdaşlıq və dostluq münasibətləri formalaşır. Təbii ki, bu cür əlaqələrin qurulması ölkələr arasında münasibətlərin inkişafına xidmət etməklə yanaşı, Azərbaycan həqiqətlərinin dünyaya çatdırılmasında, ölkəmizin beynəlxalq platformalarda dəstəklənməsində təsirli amildir".
Deputat vurğulayıb ki, bu gün Azərbaycan parlamenti qanunvericiliyin təkmilləşdirilməsi işində, beynəlxalq hüquq normalarının ratifikasiyası, ikitərəfli və çoxtərəfli beynəlxalq parlament təşkilatları ilə əməkdaşlığın inkişaf etdirilməsi istiqamətində ardıcıl işlər görür: "Sözsüz ki, Azərbaycan parlamentinin fəaliyyət istiqamətləri, parlamentlərarası münasibətlər beynəlxalq hüquq normalarına əsaslanır. Azərbaycan parlamenti beynəlxalq təşkilatlarla yanaşı, parlament şəbəkələri ilə sıx təmaslara malikdir. Bu baxımdan Milli Məclisin müvafiq komitələri və parlamentlərarası əlaqələr üzrə işçi qrupları fəaliyyət göstərirlər. Beynəlxalq parlament tribunalarından Azərbaycanın işğaldan azad olunmuş ərazilərində Ermənistanın törətdiyi vandalizm faktları geniş ictimaiyyətə çatdırılır. Milli Məclis bəzi parlament təşkilatlarının yaradılmasında da aktiv iştirak edib. Bu baxımdan Qara Dəniz İqtisadi Əməkdaşlıq Təşkilatı Parlament Assambleyasının, Türkdilli Ölkələrin Parlament Assambleyasının, Qoşulmama Hərəkatı Parlament Şəbəkəsinin yaradılmasını xatırlatmaq yerinə düşər".
P.Kərimzadə qeyd edib ki, bu gün Azərbaycanın qanunverici orqanı olan Milli Məclis beynəlxalq platformalarda aktiv iş aparır və ölkəmizin haqlı mövqeyinin dünyada parlament səviyyəsində tanıdılmasında xüsusi rol oynayır. Onun sözlərinə görə, hazırda Bakıda keçirilən İƏT Parlament İttifaqının 20-ci Sessiyası da mühüm qərarlar qəbul etməklə təşkilatın tarixində xüsusi yer tutacaq.
Əsmər QARDAŞXANOVA,
"Azərbaycan"
