Norveçin “Geopolitika” nəşrində Azərbaycanın İsveç, Finlandiya, Norveç və Danimarkadakı səfiri Zaur Əhmədovun Cənubi Qafqaz regionunda çoxdan gözlənilən sülhə yol açan Azərbaycanla Ermənistan arasında sülh sazişinin paraflanması haqqında məqaləsi dərc olunub.
AZƏRTAC xəbər verir ki, müəllif bu sazişin uzunmüddətli ardıcıl diplomatik səylərin nəticəsi olduğunu yazır.
2020-ci ildəki İkinci Qarabağ müharibəsindən sonra Azərbaycan beynəlxalq hüququn beş prinsipinə əsaslanan sülh sazişi layihəsini təklif edərək, onilliklər ərzində davam edən qarşıdurmanı hüquqi və qarşılıqlı məqbul əsaslarla əvəz etməyə çalışıb.
Diplomat vurğulayır ki, sazişin yekun imzalanması üçün əsas şərt Ermənistanın Azərbaycana qarşı ərazi iddiaları ilə bağlı müddəaları istisna edərək Konstitusiyaya düzəlişlər etməyə hazır olmasıdır. Razılaşmaların mühüm hissəsi bütün nəqliyyat və kommunikasiya xətlərinin, o cümlədən Azərbaycanın materik hissəsi ilə Naxçıvan arasında Ermənistan ərazisindən keçməklə təhlükəsiz quru yolu dəhlizinin açılması idi. Müəllifin fikrincə, “Beynəlxalq Sülh və Rifah naminə Tramp Marşrutu” (TRIPP) adlı layihə təkcə iki ölkəyə deyil, həm də bütün regional iqtisadiyyata fayda gətirəcək.
Z.Əhmədov qeyd edir ki, hər iki tərəf qisasçılıq əhvali-ruhiyyəsindən əl çəkib 1991-ci il Alma-Ata Bəyannaməsi və BMT Nizamnaməsinin prinsipləri əsasında mehriban qonşuluq münasibətləri qurmağa hazır olduqlarını bildiriblər. Onun fikrincə, bu, münaqişəni əməkdaşlıqla əvəzləmək, Cənubi Qafqazda sabitlik və rifahı təmin etmək üçün real imkanlar açır.
Diplomat qeyd edir: “Dörd il ərzində Azərbaycanın səfiri vəzifəsində çalışdığım müddətdə şimal ölkələrində Azərbaycan ilə Ermənistan arasında münasibətlərə dair bütün müzakirə və debatları yaxından izləmişəm. Bu danışıqlar çox vaxt narahatlıq, qeyri-müəyyənlik və gələcəklə bağlı suallarla müşayiət olunurdu. Ona görə də indi möhkəm sülhün sadəcə xəyal olmadığı, nail olunacağı reallıq olduğunu göstərən müsbət xəbərləri bölüşmək xüsusilə xoşdur”.
Məqalənin sonunda səfir şimal regional əməkdaşlığının uğurlu təcrübəsi ilə paralel aparır. Onun fikrincə, bu təcrübə Cənubi Qafqazda davamlı sülhün bərqərar olması və əməkdaşlığın inkişafı üçün dəyərli oriyentir ola bilər.
677jpg_1790033437.jpg)
