Azərbaycan xalqı tarix boyu ana dilini qoruyub yaşatmışdır. Bu, həm də milli kimliyə, mədəni irsə və mənəvi dəyərlərə sədaqətin təzahürü olmuşdur. Zaman-zaman qarşıya çıxan siyasi - ideoloji maneələrə baxmayaraq, xalqmız öz dilinə sarsılmaz bağlılığını qoruyub saxlamışdır. Bu gün isə həmin tarixi ənənə dövlət səviyyəsində davam etdirilir, ana dilimizin saflığının qorunması və gələcək nəsillərə çatdırılması üçün ardıcıl tədbirlər görülür.
Məlumdur ki, SSRİ-nin rəsmi ideoloji siyasəti milli dillərin tədricən arxa plana keçməsinə və funksional imkanlarının zəifləməsinə gətirib çıxarmışdı. Belə bir mürəkkəb dönəmdə 1978-ci il aprelin 27-də Azərbaycan dilinin Konstitusiyada dövlət dili kimi təsbit olunması Ulu Öndər Heydər Əliyevin uzaqgörən siyasətinin və milli maraqlara sədaqətinin bariz nümunəsidir. Bu, həm də xalqın milli kimliyinin qorunması yolunda atılmış əhəmiyyətli addım olmuşdur.
Ulu Öndər Heydər Əliyev müstəqil Azərbaycana rəhbərliyi dövründə də ana dilimizin qorunması və inkişafı istiqamətində ardıcıl və sistemli siyasət həyata keçirmişdir. 1995-ci ildə qəbul olunmuş Konstitusiyanın 21-ci maddəsində Azərbaycan dilinin dövlət dili kimi təsbit olunması bu istiqamətdə daha bir mühüm mərhələ idi.
2001-ci ildə imzalanan “Dövlət dilinin tətbiqi işinin təkmilləşdirilməsi haqqında” Fərmanla bu sahədə institusional mexanizmlər yaradılmışdır. Prezident yanında Dövlət Dil Komissiyasının fəaliyyətə başlaması dil siyasətinin koordinasiyası və normativ bazanın formalaşdırılması baxımından mühüm rol oynamışdır. Eyni zamanda, 2002-ci ildə “Azərbaycan Respublikasında dövlət dili haqqında” Qanunun qəbul edilməsi dilin istifadəsinin tənzimlənməsi və qorunması sahəsində hüquqi çərçivəni tam şəkildə müəyyən etmişdir.
Ulu Öndər Heydər Əliyev dilin yalnız ünsiyyət vasitəsi deyil, həm də milli-mənəvi varlığın daşıyıcısı olduğunu vurğulamışdır. Ümummilli Liderin “Xalqı xalq edən, milləti millət edən onun dilidir” fikri ana dilinin xalqın mənəvi kimliyini və ideoloji dayaqlarını formalaşdıran başlıca amil olduğunu aydın şəkildə ifadə edir. Dahi Liderin nitqlərində tez-tez ana dili ilə bağlı dəyərli fikirlər səslənmişdir.
Ana dilimizi qorumaq üçün müstəsna əhəmiyyətə malik addımlar atan Ümummilli Liderin siyasi xətti Prezident İlham Əliyev tərəfindən inamla davam etdirilir. Prezident İlham Əliyevin 2013-cü ildə təsdiq etdiyi «Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı»nı buna misal göstərmək olar. Proqramın məqsədi qloballaşma şəraitində Azərbaycan dilinin imkanlarından dövrün tələblərinə uyğun istifadəni və ölkədə dilçiliyin inkişafını təmin etməkdir.
Ana dilimizin qorunması və inkişafı uğrunda atılan hər bir addım milli kimliyin və dövlət müstəqilliyinin möhkəmləndirilməsinə xidmət edir. Ümummilli Lider Heydər Əliyev və Prezident İlham Əliyevin siyasəti nəticəsində Azərbaycan dili həm də beynəlxalq müstəvidə tanınan dillərdən birinə çevrilmişdir.
Mahir SÜLEYMANLI,
Milli Məclisin deputatı
jpg_1770745536.jpg)
jpg_1770743983.jpg)
