Gənclər və İdman Nazirliyinin Kollegiya iclası keçirilib. Nazir Fərid Qayıbovun sədrliyi ilə keçən iclasda gündəliyə əsasən, bir sıra məsələlər müzakirə edilib və müvafiq qərarlar qəbul edilib.
İclasda ölkə yarışlarının keçirilmə qaydaları ilə bağlı Texniki Reqlament müzakirə olunaraq qəbul edilib. Daha sonra idman mütəxəssislərinə fəxri adların verilməsi məsələsinə baxılıb. Kollegiya qərarı ilə bir qrup idman mütəxəssisi "Fəxri bədən tərbiyəsi və idman işçisi" fəxri adına layiq görülüb. Bundan başqa, 2024-cü ilin “İdman səfirləri”nin hesabatı dinlənilib və qəbul edilib. Həmçinin “İdman səfiri”nin seçilməsi haqqında Əsasnamə təsdiq olunub. Sonda 2025-ci il üçün “İdman səfirləri”nin təqdimatları olub və səsvermə ilə 11 namizəd arasından 5 nəfər - Aliyə Paşayeva (bədii gimnastika), Fəridə Əzizova (taekvondo), Orxan Səfərov (cüdo), Dadaş Dadaşbəyli (ağırlıqqaldırma) və Xəyyam Orucov (milli idman növləri) 2025-ci il üçün “İdman səfiri” seçiliblər.
Aliyə Paşayeva - bədii gimnastika üzrə Avropa çempionatlarının gümüş və bürünc medalçısı, bədii gimnastika üzrə milli komandanın məşqçisi, əməkdar idman ustası;
Fəridə Əzizova - taekvondo üzrə yeniyetmələr arasında Avropa çempionu, gənclər arasında dünya çempionu, U-21 Avropa çempionu, böyüklər arasında Avropa çempionatının bürünc mükafatçısı, böyüklər arasında dünya çempionatının ikiqat bürünc mükafatçısı;
Orxan Səfərov - cüdo üzrə 23 yaşadək cüdoçular arasında Avropa çempionatının bürünc mükafatçısı, böyüklər arasında keçirilən dünya çempionatının bürünc və gümüş mükafatçısı, Avropa Oyunlarının gümüş medalçısı, böyüklər arasında Avropa çempionatının qızıl, gümüş və bürünc mükafatçısı, “Masters” yarışlarının müvafiq olaraq gümüş və qızıl mükafatçısı, İslam Həmrəyliyi Oyunlarının qalibi;
Dadaş Dadaşbəyli - ağırlıqqaldırma üzrə Avropa çempionatının qızıl və bürünc, V İslam Həmrəylik Oyunlarının gümüş mükafatçısı, II MDB Oyunlarının qalibi, dünya çempionatının gümüş və bürünc medalçısı, yeniyetmələr arasında Avropa birinciliyinin gümüş, gənclər arasında Avropa birinciliyinin qızıl və gümüş medalçısıdır. Dadaş Dadaşbəyli 23 illik fasilədən sonra Azərbaycanın dünya çempionatında gümüş medal qazanan ilk ağırlıqqaldıranı olub;
Xəyyam Orucov - milli idman növləri üzrə dördqat Avropa çempionu, ikiqat Dünya Kubokunun sahibi, dünya çempionatının altıqat mükafatçısı, IV İslam Həmrəyliyi Oyunlarının gümüş və bürünc mükafatçısı, əməkdar məşqçi.
Rizvan CƏFƏROV,
"Azərbaycan"
jpg_1745568114.jpg)
jpg_1745260093.jpg)
