Əmək və əhalinin sosial müdafiəsi naziri Anar Əliyev Ağdam rayonunda Ağdam və Tərtər rayonlarının sakinlərinin müraciətlərini dinləyib.
Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən AZƏRTAC-a verilən məlumata görə, əvvəlcə Anar Əliyev və Ağdam Rayon İcra Hakimiyyətinin başçısı Vaqif Həsənov Ümummilli Lider Heydər Əliyevin abidəsini ziyarət ediblər.
Həmin gün vətəndaşlar məşğulluq, əlillik, mənzil təminatı, sosial xidmət və digər məsələlərlə bağlı müraciət ediblər. Müraciət edənlər sırasında şəhid ailələrinin üzvləri və müharibə iştirakçıları da olub. Hər bir müraciət fərdi qaydada araşdırılıb və nəticəsinə uyğun tədbirlər görülüb.
Sorğu xarakterli müraciətlərlə bağlı qanunvericiliyə uyğun izahatlar verilib. Vətəndaşlar müraciətləri əsasında aktiv məşğulluq proqramlarına, habelə özünüməşğulluq proqramına və sosial xidmətlərə cəlb edilmək üçün qeydiyyata alınıblar.
Özünüməşğulluq proqramı çərçivəsində Ağdam rayon sakinləri Ülvi Şəhriyar oğlu İdriszadə və Esmira Abil qızı Rzayeva üçün qurulmuş kiçik təsərrüfatlara baxış keçirilib. Proqramın dəstəyi ilə Ülvi İdriszadə üçün avtoçilingər xidmətləri, Esmira Rzayeva üçün un məmulatları istehsalı üzrə kiçik təsərrüfatlar qurulub. Hər iki proqram iştirakçısı işsiz və işaxtaran şəxslərin kiçik biznesə çıxışına imkan yaradılması üçün göstərilən dəstəyə görə Prezident İlham Əliyevə minnətdarlıqlarını ifadə ediblər.
Qeyd edək ki, ötən dövrdə özünüməşğulluq proqramı çərçivəsində Ağdamda 2600-dək şəxs üçün kiçik təsərrüfatlar yaradılıb.
Nazirlik tərəfindən Ağdamda yaradılan İxtisaslaşmış Sosial Xidmət Mərkəzinə də baxış keçirilib. Hazırda mərkəzdə əlilliyi olan və digər həssas kateqoriyalardan olan 36 uşağa psixoloji, pedaqoji, loqopedik və aktiv terapiya xidmətləri göstərilir. Uşaqların valideynləri üçün qrup terapiyaları və təlimlər də təşkil olunur.
