Prezident İlham Əliyevin AMEA-nın 80 illik yubiley yığıncağındakı çıxışında vurğulanan məsələlərdən biri də elm və təhsilin inteqrasiyası, gənc kadrların təşviqi, innovativ düşüncənin gücləndirilməsi və ölkənin uzunmüddətli inkişafına xidmət edən rəqabətqabiliyyətli elmi mühitin formalaşdırılmasının vacibliyi olub. Hazırda ölkəmizdə elm və təhsilin inteqrasiyası istiqamətində ardıcıl və məqsədyönlü tədbirlər həyata keçirilir.
Bu barədə AZƏRTAC-a AMEA-nın müxbir üzvü, professor Elşad Qurbanov məlumat verib. O bildirib ki, AMEA-nın institut və müəssisələrinin bir qisminin Elm və Təhsil Nazirliyinin tabeliyinə verilməsi elm və təhsil sahəsində idarəetmənin təkmilləşdirilməsinə və mövcud elmi potensialdan daha səmərəli istifadə olunmasına xidmət edən mühüm addım idi. Bu qərar elm və təhsilin qarşılıqlı əlaqəsinin gücləndirilməsi və kadr hazırlığının keyfiyyətinin yüksəldilməsi baxımından xüsusi əhəmiyyət kəsb edir. Ümumilikdə, elm və təhsilin inteqrasiyası sahəsində görülən işlər təqdirəlayiqdir və artıq praktik nəticələrini verməkdədir. Bu yanaşma tələbələrə yalnız nəzəri biliklərlə kifayətlənməməyə, eyni zamanda, təcrübi sahədə bilik və bacarıqlar əldə etməyə geniş imkan yaradır. Auditoriyalarda keçirilən dərslərdən fərqli olaraq, tələbələrin elmi-tədqiqat institutlarında aparılan real elmi işlərlə yaxından tanış olması onların ixtisaslaşma prosesinə və peşəkar kadr kimi formalaşmasına müsbət təsir göstərir.
E.Qurbanov vurğulayıb ki, Elm və Təhsil Nazirliyinin tabeliyinə verilmiş institutlarda fəaliyyət göstərən tədqiqatçı-alimlərin universitetlərdə tədris prosesinə cəlb olunması da mühüm nəticələr verir. Bu, elmi biliklərin birbaşa tədrisə transferini təmin etməklə yanaşı, təhsil prosesinin məzmununun zənginləşdirilməsinə və müasir elmi nailiyyətlərin tələbələrə daha operativ şəkildə çatdırılmasına şərait yaradır.
“Şəxsi təcrübəmə gəldikdə isə, Botanika və bitki fiziologiyası kafedrasına rəhbərlik etdiyim dövrdə 70-ə yaxın magistrantın elmi rəhbəri olmuşam. Onların elmi-tədqiqat işlərinin hazırlanması, metodik istiqamətləndirilməsi və dissertasiya işlərinin müdafiəsi prosesində yaxından iştirak etmişəm. Eyni zamanda, 200-ə yaxın magistrantın dissertasiya işlərinin müdafiəsi zamanı Müdafiə Şurasının sədri qismində fəaliyyət göstərmişəm. Bu müddət ərzində gənc alim və mütəxəssislərin peşəkarlığının artırılmasına və elmi biliklərinin dərinləşdirilməsinə dəstək vermişəm. Bu fəaliyyətlər yalnız mənim pedaqoji və elmi işimlə bağlı deyil, həm də ölkədə elm və təhsilin inteqrasiyasının real nəticələrinin formalaşmasına, gənc kadrların hazırlanmasına verdiyim töhfələrin bariz nümunəsidir. Hesab edirəm ki, gənc alimlərin, yüksəkixtisaslı kadrların yetişdirilməsi və onların elmi potensialının artırılması, həm akademik mühitin inkişafı, həm də Azərbaycan elminin uğurlu gələcəyinin təmin olunması baxımından strateji əhəmiyyət kəsb edir”, - deyə alim bildirib.
