“Qarabağ”ın UEFA Çempionlar Liqasının əsas mərhələsində Bakıda Almaniyanın "Ayntraxt" komandası üzərində qazandığı tarixi qələbə (3:2) xarici mətbuatda geniş işıqlandırılıb.
AZƏRTAC xəbər verir ki, Avropanın bir sıra nüfuzlu aparıcı idman nəşrlərində Azərbaycan çempionunun doğma meydanda əldə etdiyi zəfər barədə materiallar dərc olunub.
Nüfuzlu “BeIN Sports” beynəlxalq idman kanalları şəbəkəsi matçın statistikalarını və geniş icmalını təqdim edərək Ağdam təmsilçisinin pley-off şanslarını necə artırdığına diqqət çəkib. Qeyd edilib ki, “Qarabağ” son dəqiqə qolu ilə Çempionlar Liqasındakı pley-off ümidlərini artırdı. Bəhlul Mustafazadənin 90+4-cü dəqiqədə vurduğu qol, Kamilo Duranın dublu və "Qarabağ"ın oyun boyu göstərdiyi əzmkarlıq ön plana çıxarılıb.
Britaniyanın məşhur BBC yayım şirkəti 28 yaşlı müdafiəçinin oyunun taleyini həll edən zərbəsini xüsusi qeyd edərək, onun bu turnirdə qol vuran ilk azərbaycanlı futbolçu kimi tarixə düşdüyünü yazıb. BBC “Qarabağ”ın bu qələbə ilə Avropanın ən güclü 24 komandası sırasına daxil olmaq yolunda nəhəng bir addım atdığını bildirib.
Afrika və Avropada geniş izləyici kütləsi olan “SuperSport” nəşri "Qarabağ” son saniyə qolu ilə almanları məyus etdi" ifadəsini işlədib.
Asiyanın ən böyük xəbər portallarından biri olan “CNA” “Reuters” agentliyinə istinadən qələbənin "Qarabağ"ın turnir cədvəlindəki mövqeyini (18-ci pillə) necə möhkəmləndirdiyindən yazıb.
Dünyanın ən çox oxunan idman nəşrlərindən olan “Sky Sports” və “Eurosport” B.Mustafazadənin qolunu "dramatik sonluq" kimi xarakterizə edib.
Almaniya Bundesliqasının rəsmi saytı olan Bundesliga.com dərc etdiyi rəsmi hesabatda bu məğlubiyyəti "Ayntraxt" üçün ağır zərbə kimi qiymətləndirib. Frankfurt klubunun 2:1 hesabı ilə öndə olduğu halda üstünlüyü əldən verməsi və Bakıdakı atmosferin rəqib üçün nə qədər çətin olması xüsusi vurğulanıb.
İngilis dilində yayımlanan “Türkiye Today” portalı "Qarabağ"ın Avropa arzusunun davam etdiyini vurğulayıb.
Türkiyə millisinin üzvü Can Uzunun vurduğu qolun belə almanları xilas edə bilməməsi diqqətə çatdırılıb.
Beynəlxalq idman xəbərləri platforması olan “VAVEL” Tofiq Bəhramov adına Respublika stadionundakı ab-havanı xüsusi qeyd edib. Stadionda matç boyu möhtəşəm coşqunun hökm sürdüyündən bəhs olunub. "Qarabağ"ın bu qələbə ilə turnir cədvəlində 18-ci pilləyə yüksəlməsi "Avropa nağılının davamı" kimi təsvir edilib.
jpg_1771336752.jpg)
jpg_1771317111.jpg)
