Azərbaycanın turizm potensialı Almaniya paytaxtında keçirilən Berlin Beynəlxalq turizm sərgisində (ITB Berlin 2026) təbliğ olunur.
AZƏRTAC xəbər verir ki, turizm sahəsində dünyanın ən nüfuzlu sərgilərindən olan “ITB Berlin”də ölkəmizin turizm imkanları Dövlət Turizm Agentliyinin və Azərbaycan Turizm Bürosunun təşkilatçılığı ilə milli stenddə təqdim edilir. Milli stenddə “Azərbaycan Hava Yolları” QSC (AZAL), hotellər, turizm agentlikləri daxil olmaqla 13 sənaye tərəfdaşının iştirakı ilə ölkə turizminin təbliği və təşviqi məqsədilə B2B görüşlər keçirilir və əməkdaşlıq imkanları müzakirə olunur.
Azərbaycanın Almaniyadakı səfiri Nəsimi Ağayev, bir sıra xarici şirkətlərin nümayəndələri milli stendimizi ziyarət ediblər.
Azərbaycan Turizm Bürosunun Avropa və Yaxın Şərq üzrə iş sektorunun müdiri Xədicə Nəsirova milli stendimizə xüsusi marağın müşahidə olunduğunu vurğulayaraq deyib: “Almaniyalı turistlər və almandilli ölkələrin nümayəndələri Azərbaycanda daha çox mədəniyyət, mədəni irs, “İpək Yolu” və təbiət turizminə maraq göstərirlər. Ona görə də milli stendimizdə əsasən bu sahələrlə maraqlanırlar. Son illər Azərbaycanda qış turizminə də maraq artıb. Keçən ildən etibarən Azərbaycan Dövlət Turizm Agentliyi Beynəlxalq Xizək Federasiyası ilə tərəfdaşlığa başlayıb. Artıq ölkəmizdə xizəkçilik üzrə də yarışlar keçirilir. Eyni zamanda, Azərbaycanın brendi müxtəlif ölkələrdə bu yarışlarda reklam olunur”.
“ITB Berlin”in özünəməxsusluğu ilə seçildiyini vurğulayan X.Nəsirova sərgi çərçivəsində keçirilən görüşlərdə Azərbaycana satışların və ölkəmizə gələn turistlərin sayının artırılmasına dair müzakirələrin aparıldığını, əsasən “İpək Yolu” marşrutu, qastronomiya, sağlamlıq, biznes turizmi sahələrində imkanların təqdim olunduğunu vurğulayıb.
Azərbaycan stendini ziyarət edən “Inspirational Adventures” şirkətinin nümayəndəsi Harri Kasvel AZƏRTAC-a müsahibəsində bildirib: “Biz səyahəti sevən kiçik qrupları dünyanın autentik və unikal məkanlarına aparmağa fokuslanırıq. Biz kütləvi turistik istiqamətlərə diqqət yetirmirik. Qərb ölkələrindən - Böyük Britaniya, ABŞ, Kanada, Avstraliyadan gələn səyahətçilərə əsasən daha az araşdırılmış regionların yerli mədəniyyətini göstərmək istəyirik. Çünki insanlar fərqli bir şey axtarırlar. Azərbaycan məhz bu baxımdan maraqlıdır. Azərbaycanı mədəniyyəti, “İpək Yolu” üzərində yerləşməsi, Qafqaz dağları və bölgələr, fərqli ləhcələri olan bənzərsiz kəndlər, - bütün bunlar yeni yerlər kəşf etmək öz mədəniyyətindən tamamilə fərqli mədəniyyət görmək istəyən insanlar üçün çox maraqlıdır”.
Fransada fəaliyyət göstərən “Addeom” şirkətinin təsisçisi Fransua Brianson-Marjole də Azərbaycanın əcnəbi turistlər üçün maraqlı olduğunu vurğulayaraq bildirib: “Mənim şirkətim ölkələrin Fransada və Avropada tanıdılmasına imkan yaradır. İnsanlar yeni istiqamətləri kəşf etmək istəyirlər. Fransız turistlər Azərbaycan haqqında elə də çox məlumatlı deyil, buna görə də yeni ölkələri kəşf etmək onların marağına səbəb ola bilər. Azərbaycanın turizm imkanları böyükdür, amma Azərbaycan hələ tam kəşf edilməyib, öyrənilməyə ehtiyacı var. Biz fransızlar bu ölkə haqqında daha çox öyrənmək istəyirik. Ölkənizdə həm inkişaf, həm də geniş imkanlar var”.
Dünyanın ən böyük turizm sərgilərindən olan “ITB Berlin”i hər il 100 min nəfər ziyarət edir. Bu il 60 illiyini qeyd edən sərgiyə 190 ölkədən turizm sahəsində fəaliyyət göstərən 5800-dən çox qurum və turist şirkəti qatılıb. Sərgi çərçivəsində Azərbaycan milli stendində “Gizli xəzinələr: təcrübələrin kəşfi” mövzusunda Azərbaycanın dağ piyada marşrutlarını və tarixi “İpək Yolu” irsini əks etdirən təqdimatın da nümayişi planlaşdırılır.
Qeyd edək ki, ötən il Almaniyadan Azərbaycana gələn turistlərin sayı 11 faiz artaraq 24 minə çatıb.
jpeg_1782203232.jpeg)
