Bəzi Qərb dövlətləri isə məkrli gedişləri ilə özlərini ifşa edirlər
İqtisadi gücü, qüdrəti artdıqca, beynəlxalq təşkilatlarla qarşılıqlı əməkdaşlığı genişləndirdikcə Azərbaycan dünyanın nüfuzlu dövləti, regionun lider ölkəsi kimi tanınır. Bütün bu amillər Prezident İlham Əliyevin dünyada həmişə yüksək olmuş nüfuzunu daha da yüksəldir. Aparılan uğurlu daxili və xarici siyasətin nəticəsidir ki, böyük sərmayə gətirən beynəlxalq əhəmiyyətli layihələr ölkəmizin iştirakı olmadan regionda həyata keçirilmir.
Uzun illər ərzində qurub yaratdığı, daim gücləndirdiyi, ən müasir silahlarla təchiz etdiyi ordusu ilə ərazi bütövlüyünü və suverenliyini tam bərpa edən Azərbaycan Cənubi Qafqazda yeni reallıqlar yaratdı. Ölkəmiz qüdrətini göstərərək, sözün həqiqi mənasında tarixin gedişini dəyişdi. Bütün bunlar xalqımıza böyük sevinc və başucalığı gətirdi. Bir milyondan çox məcburi köçkünün doğma ocaqlarına qayıtması üçün tarixi şərait yarandı. Amma təəssüflər olsun ki, xalqımızın qazandığı bu uğurları həzm etməyən bəzi ölkələr Azərbaycana qarşı qərəzli mövqe nümayiş etdirdilər. Belə ki, Qərbin təsir dairəsində olan bəzi beynəlxalq təşkilatlar da ölkəmizə qarşı xoş olmayan münasibət göstərməyə başladılar. Hansı ki, ölkəmiz BMT Nizamnaməsinə uyğun torpaqlarından işğalçını, Ermənistan silahlı qüvvələrini çıxarmış, ərazi bütövlüyünü və suverenliyini bərpa etmişdir. Buna görə Azərbaycana yalnız və yalnız təşəkkür etmək lazım idi. Amma təəssüflər olsun ki, ölkəmiz qərəzli mövqe ilə üzləşdi. Fransa başda olmaqla, erməni lobbisinin təsiri altında olan qüvvələr, beynəlxalq təşkilatlar Azərbaycana qarşı mənasız və reallıqdan uzaq olan bəyanatlar qəbul etməklə iç üzlərini açdılar.
Qəribə idi ki, otuz il Azərbaycan torpaqlarının erməni separatatçılarının işğalında qalmasına, bir milyon soydaşımızın köçkün vəziyyətinə düşməsinə, ev-eşiyindən olmasına, uzun illər əzab-əziyyətlər içində yaşamasına, soyqırımına məruz qalmasına əhəmiyyət verməyən Qərb ölkələri zəfərlə başa çatmış 44 günlük Vətən müharibəsindən sonra yenidən separatçıların müdafiəsinə qalxdılar. Şübhə yoxdur ki, bütün bunlar xaricdə yaşayan erməni milyonerlərinin pulundan doğan təsirlər idi. Qərb ölkələrinin bu addımları həm də onu göstərirdi ki, onlar İkinci Qarabağ müharibəsində Ermənistanın məğlubiyyətini, Azərbaycanınsa qələbəsini həzm edə bilmirlər.
Qərbin bəzi ölkələri çirkin məqsədlərinə çatmaq üçün əlində olan bütün vasitələrdən istifadə etməyə çalışırlar. Onlar yeni media resurslarının yaradılması və Azərbaycan ictimaiyyətinə təsir göstərmək üçün mövcud resursların gücləndirilməsi yolu ilə niyyətlərinə çatmaq istəyirlər. Qərb Azərbaycan vətəndaş cəmiyyəti mühitində öz təsir agentlərini saxlamaq üçün belə səylərini artırmağa çalışır. Qərbin və onun təsir dairəsində olan beynəlxalq təşkilatların qeyri-standart və geosiyasi ambisiyalara söykənən maraqları isə təkcə ölkəmizdə deyil, dünyada böyük narazılıqlarla qarşılanır. Narazılıqlara səbəb isə ikili standartlara əsaslanan qərəzli mövqedir.
Azərbaycan həm beynəlxalq təşkilatlarla, həm də nüfuzlu ölkələrlə qarşılıqlı əməkdaşlığa böyük önəm verir. Amma təəssüflər olsun ki, biz Qərb ölkələri tərəfindən bunun qarşılığını görmürük. Biz hər zaman Avropa parlamentarilərinin ikili standartları ilə üzləşmişik. 30 il ərzində Avropa Şurası Ermənistanın Azərbaycana qarşı təcavüzü və ərazilərin işğalı faktına qarşı heç bir tədbir görmədi. Ermənistana işğalçı ölkə demədi. Halbuki bir quruma üzv olan iki ölkədən birinin digərinin ərazisini işğal etməsi faktına görə ən azından işğalçının səs hüququnu əlindən almaq mümkün idi. Lakin arxada qalan illərdə biz bunu Avropa Şurasından görmədik. Bu təşkilat nəinki Ermənistanın işğalçı siyasətini tanımadı, əksinə, erməni lobbisinin maraqlarına uyğun olaraq ölkəmizə qarşı müxtəlif vaxtlarda qərəzli qətnamələr qəbul etdi. Hansı ki, Avropa Şurasının əsas meyarı insan hüquqlarının qorunmasıdır. Onlar isə meyarlarını erməni separatçılarını müdafiə etməkdə görürlər.
Avropa Şurası COP29-un ölkəmizdə keçirildiyi günlərdə də qərəzli mövqe göstərdi. Qərb dairələri yaxşı bilirdilər ki, Azərbaycan bəşəriyyət üçün əhəmiyyətli olan bu beynəlxalq tədbiri yüksək səviyyədə keçirəcək, dünyaya nümunə olacaq. Bütün bu amillər isə Azərbaycanın dünyadakı nüfuzunu daha da artıracaq. Belə də oldu. Bundan narahatlıq keçirən Qərb ölkəmizin qazandığı uğurları qısqanclıqla qarşıladı. Buna görə də ölkəmizə qarşı hər addımda ikiüzlü siyasət yürüdür, qərəzli münasibət göstərir. Bəzi ölkələrin əsas istəyi Ermənistan vasitəsilə Cənubi Qafqazda möhkəmlənmək və çirkin siyasətlərini həyata keçirməkdir.
Qərb ölkələrinin hansı siyasət yürütdüyünə, hansı addımlar atdığına əhəmiyyət verməyən Azərbaycan tutduğu düzgün yolu ilə gedir. Uğurlu daxili və xarici siyasəti ilə dünyanın aparıcı dövlətləri və nüfuzlu beynəlxalaq təşkilatları ilə qarşılıqlı əlaqələr qurur, daim öz maraqlarını müdafiə edir. Erməni milyarderlərinin sifarişi əsasında ölkəmizə qarşı qərəzli mövqe nümayiş etdirən təşkilatlar isə yalnız və yalnız özlərini dünyada hörmətdən və gözdən salırlar.
Vahid MƏHƏRRƏMOV,
"Azərbaycan"
