Hazırda Azərbaycan 12 ölkəyə qaz ixrac edir. Gürcüstan və Türkiyədən sonra qaz idxal edənlərin hamısı Avropa ölkələridir: Yunanıstan, Türkiyə, Bolqarıstan, İtaliya, Rumıniya, Macarıstan, Serbiya, Sloveniya, Xorvatiya, Şimali Makedoniya və Slovakiya. Şimali Makedoniya bu sıraya keçən ilin sonunda qoşulub.
Şimali Makedoniya Respublikasının Prezidenti Qordana Silyanovska-Davkovanın ölkəmizə rəsmi səfəri zamanı bu, bir daha vurğulanıb. Prezident İlham Əliyev mətbuata bəyanatla çıxış edərkən deyib: "Son ayların müsbət əlaməti də ondan ibarətdir ki, iki ölkə energetika sahəsində əməkdaşlığa başlamışdır. Azərbaycan qazı artıq Şimali Makedoniyanın bazarına çatdırılmışdır və bu, keçən ilin sonlarında baş verdi, bu il artıq müntəzəm olaraq Azərbaycan sizin bazarınızı təbii qazla təmin edəcəkdir. Gələcəkdə biz lazım olan həcmdə qaz təchizatını artıra bilərik. Çünki biz bu gün yeni qaz yataqlarının istismara verilməsi istiqamətində fəal iş aparırıq. Bildirməliyəm ki, hazırda Azərbaycan 12 ölkəyə təbii qaz ixrac edir və bizim müştərilərimizin coğrafi yerləşməsi də Avrasiya məkanını əhatə edir. On iki ölkədən 10 ölkə Avropa ölkəsidir. Keçən il Azərbaycan xarici bazarları 25 milyard kubmetr qaz ilə təchiz etmişdir. Təbii ki, bizim istehsalımız bundan daha çoxdur. Çünki biz yerli tələbatı da ödəyirik. Ancaq əhatə dairəsi, qaz təchizatımızın coğrafiyasının genişləndirilməsi də gündəlikdə duran məsələdir. Avropa Azərbaycan qazına ehtiyac duyur. Təxminən üç il bundan əvvəl Bakıda imzalanmış Avropa İttifaqı ilə Azərbaycan arasında energetika sahəsində strateji tərəfdaşlıq Bəyannaməsi bunun əyani təzahürüdür. Bu gün Azərbaycan qazı bir çox Avropa ölkəsinin enerji təhlükəsizliyini təmin edir və Avropadakı tərəfdaşlarımızın xahişlərinə biz hər zaman böyük diqqətlə yanaşmışıq".
Energetika sahəsində ikitərəfli formatda əməkdaşlıq ölkələrimiz üçün çox önəmlidir. Məhz bu praktiki əməkdaşlıq digər sahələrdə də əməkdaşlığın inkişafına geniş yol açacaq. Belə ki, bu günə qədər ticari-iqtisadi əlaqələr sahəsində o qədər də böyük nəticələr əldə edilməyib. Dövlətimizin başçısı ümidvar olduğunu bildirib ki, energetika sahəsində başlanmış ikitərəfli praktiki əməkdaşlıq digər sahələrdə də əməkdaşlığa gətirib çıxaracaq.
Xatırladaq ki, Şimali Makedoniya Respublikasının Prezidenti Qordana Silyanovska-Davkova bir neçə ay əvvəl də ölkəmizdə olub və COP29-da iştirak edib.
Ümumiyyətlə, ikitərəfli münasibətlərimizin inkişafı üçün fəal iş aparılır. Ölkələrimiz arasında siyasi dialoq dinamik xarakter alır. Prezident İlham Əliyev qeyd edib ki, siyasi əlaqələrin inkişafı üçün əlavə tədbirlər görülməli, müvafiq dövlət qurumları sıx təmasda olmalıdırlar. Eyni zamanda iqtisadi sahədə, sərmayə qoyuluşu sahəsində imkanlar araşdırılmalıdır.
Şimali Makedoniyanın Prezidenti də öz bəyanatında gələcəkdə iqtisadi əlaqələrin genişlənəcəyini bildirib: "Azərbaycan nəinki beynəlxalq geosiyasi səhnədə mühüm yerləşməsi ilə seçilir, o cümlədən bizim kimi kiçik ölkələrin ehtiyac duyduğu təbii qaz, bərpaolunan enerji baxımından çox maraqlı tərəfdaşa çevrilir. Mən cənab Prezidentə söylədiyim məsələləri bir daha vurğulayıram ki, biz irəliyə doğru addımın atılmasını gözləyirik və əməkdaşlığa dair bəyannaməyə və ya razılaşmaya imza atacağıq. Bu, o demək deyil ki, biz yalnız qaz təchizatında Azərbaycandan yardım alacağıq, o cümlədən iqtisadi əməkdaşlıq üçün də imkanlar yaranacaq".
Ali qonaq Azərbaycanı əyani görən insanın ölkəmizə valeh olduğunu, bu gözəlliyin hətta təyyarədən baxanda da göründüyünü bildirib. Və bu, əlbəttə, gəlişigözəl olduğu üçün deyilən sözlər deyil. Şimali Makedoniya Prezidentinin gəldiyi qənaət belədir ki, "bu səbəbdən turizm sahəsi də əməkdaşlıq edə biləcəyimiz sahələrdəndir".
Qordana Silyanovska-Davkova həmçinin vurğulayıb ki, bu günədək iqtisadiyyat sahəsində əhəmiyyətli addımlar atılmayıb: "Coğrafi mövqeyimizə görə, biz Balkanlarda, Avropanın mərkəzində, bir sıra marşrutların kəsişməsində yerləşirik. Bu, Avropaya və dünyaya açıq olan hər bir ölkə üçün olduqca vacibdir. Sonuncu dəfə ölkənizdə olarkən bu fikri söyləmişdim və bu gün də təkrar bəyan etmək istəyirəm ki, biz bir-birimizdən bir çox şey öyrənə bilərik və bu səfər dərin dostluğun təməli olacaqdır. Mən təkcə Dövlət Neft Şirkəti ilə müqaviləni nəzərdə tutmuram. Hesab edirəm ki, gələcəkdə əldə olunan bütün razılaşmalar bizi daha da yaxınlaşdıracaq".
Göründüyü kimi, Azərbaycan və Şimali Makedoniya arasında iqtisadi əməkdaşlığı inkişaf etdirmək və getdikcə şaxələndirməyə imkanlar var. Ali səviyyədə qarşılıqlı səfərlər, ayrı-ayrı qurumların sıx təmasları, eləcə də qaz ixracı sahəsində atılan addımlar buna böyük təkan verəcək.
Flora SADIQLI,
"Azərbaycan"
