Yanvarın 17-də Respublika Sarayında baş tutan "Natiq - Ritmin 50 il ömrü" adlı xüsusi proqram və ritm şousu Azərbaycan musiqi tarixində əlamətdar hadisələrdən biri kimi yadda qaldı.
O gecə təkcə bir sənət yubileyi deyildi - Azərbaycan xalqının ruhunun, döyünən ürəyinin, qəhrəmanlıq yaddaşının ritmlərlə danışdığı bir sənət bayramı idi.
Azərbaycan musiqisinin qüruru, dünya səhnələrində milli ritmimizi layiqincə təmsil edən, nağara ifaçılığı sənətində Xalq artisti fəxri adına yüksələn görkəmli və nadir ritm ustası Natiq Şirinov yarıməsrlik sənət yolunu tamaşaçı ilə birgə yaşadı. Bu proqramda ritm təkcə səs deyildi, həm də tarix, yaddaş, ruh idi.
Konsert, əslində, Natiqin və oğlu Ümidin ifaçılığı ilə Azərbaycan ritminin təqdimatı idi. Ata ilə oğulun eyni səhnədə yaratdığı sənət harmoniyası nəsildən-nəslə ötürülən musiqi ənənəsinin canlı sübutuna çevrildi.
Gecənin yaddaqalan məqamlarından biri də dünyaşöhrətli xanəndə Alim Qasımovun çıxışı oldu. Alimin səsi ilə Natiqin ritmlərinin yaratdığı ecazkar harmoniya tamaşaçılar tərəfindən böyük maraq və alqışlarla qarşılandı. Bu sintez Azərbaycan musiqisinin klassik ruhu ilə ritmik enerjisinin vəhdətini bir daha ortaya qoydu.
Xüsusi vurğulamaq lazımdır ki, Natiq Şirinov indiyədək dünyanın bir sıra ölkələrində, xüsusilə Avropada nağara ilə solo konsert verən yeganə azərbaycanlı ifaçıdır. O, milli ritmimizi qlobal musiqi dilinə çevirərək Azərbaycan mədəniyyətini dünya səhnələrində tanıdan nadir nağara ifaçısıdır.
Natiq Şirinov Azərbaycan əsgərinin qəhrəmanlıq salnaməsini ritmlərlə danışmağı bacaran sənətkardır. Onun ifasında nağara döyüntüləri bəzən səngərdən gələn ürək səsi, bəzən zəfər marşı, bəzən də xalqın içindən qopan bir haray kimi səslənir. O, xalqımızın ürəyinin döyüntüsünü duyan və bunu ritmlərə çevirib dünyaya təqdim edən nadir sənətkardır.
Gecədə bir daha sübut olundu ki, Natiq Şirinovun ritmləri zamana tabe olmur, çünki o ritmlər xalqın ruhundan yaranır. "Ritmin 50 illik ömrü" proqramı isə bu böyük sənət yolunun şərəfli və qürurverici hesabatı oldu.
Elşən QƏNİYEV,
İlham BABAYEV (foto),
"Azərbaycan"
jpg_1768806878.jpg)
