Tovuz əkinçiləri bol məhsul gözləyirlər
Kəndlərdə təsərrüfat işlərinin qızğın çağıdır. Belə bir vaxtda tovuzlular da hər gün sabah obaşdan əkin sahələrinə çıxır, bir də gün batanda evlərinə dönürlər. Havaların yağmurlu keçməsinə baxmayaraq, əkinçilər payızda əlləri boş qalmamaq üçün var qüvvələri ilə çalışırlar.
Tovuzun aqrar sektorunda əkinçilik və heyvandarlıq aparıcı sahələr sayılır. Rayonda ən çox diqqət taxıl istehsalına yönəldilmişdir. Ötən mövsüm hər hektardan 33,3 sentner məhsul götürən fermerlər bu il əkin sahələrini bir qədər də artırmışlar. 12054 hektarda payızlıq taxıl səpilmişdir ki, onun da 10070 hektarı payızlıq buğda, 1984 hektarı payızlıq arpadır. Əkilmiş taxıl sahələrinin 7461 hektarı suvarılan, 4593 hektarı dəmyədir. 7325 hektarda birinci, 4714 hektarda ikinci vegetasiya suvarması aparılmışdır. Hazırda sahələrin suvarılması davam edir. Taxılçılar yetişmiş məhsula yüksək səviyyədə qulluq edirlər. Bu məqsədlə 9210 hektara yemləmə gübrəsi verilmişdir. Taxılın ziyanvericilərdən qorunması üçün də mübarizə tədbirləri aparılır. İndiyəcən 5230 hektarda belə tədbirlər görülmüşdür.
Rayonda iqtisadi cəhətdən gəlirli olan üzümçülüyə də maraq az deyil. İlk növbədə yerli şəraitə uyğun, məhsuldar üzüm sortlarına üstünlük verilir. Hazırda rayonda 1150 hektar üzüm bağı vardır ki, onun da 1070 hektarı barverəndir. Bağbanlar keçən il həmin bağların hər hektarından 284 sentner məhsul götürmüşlər. Bu, əvvəlki ildəkindən xeyli çoxdur. Cari mövsüm üzüm sahələrinin 980 hektarında suvarma, 1020 hektarında cərgələrarası şum, 1105 hektarda xəstəlik və ziyanvericilərə qarşı mübarizə işləri aparılmışdır. Ümumiyyətlə, payız-qış mövsümündə bağlarda aparılan aqrotexniki tədbirlər onu deməyə əsas verir ki, bu il də tovuzlular yüksək məhsul əldə edə biləcəklər.
Son illər ölkəmizdə kartofçuluğa maraq xeyli çoxalıb. Görünür, bu, həm də kartofun qiymətindəki bahalaşma ilə bağlıdır. Bu baxımdan, ölkədə kartofçuluğun daha çox inkişaf etdiyi Tovuz da istisna deyil. Keçən il rayon üzrə 5496 hektarda kartof əkən rayon sakinləri orta hesabla hər hektardan 298 sentner məhsul götürmüşlər. Faraş kartof istehsalına da böyük maraq var. Yəqin ki, bu faraş kartofun baha satılması ilə əlaqədardır. Hazırda rayonda kartof səpini davam edir. İndiyədək 3850 hektarda kartof əkilmişdir.
"Tovuz Aqrokompleks" MMC keçən il 102,3 hektarda "Marabel", "Kolomba", "Silvana", "Orkestra" və "Arizona" sortları əkmiş və bol məhsul götürmüşdür. Yeri gəlmişkən, qeyd edək ki, Tovuzun iri fermer təsərrüfatları yetişdirilmiş kartofu saxlamaq üçün müasir soyuducu anbarlar tikmişlər.
Artıq 8-ci ildir ki, rayonda barama istehsal edilir. Bir neçə gündür ki, rayon sakinləri barama istehsalına başlamışlar. Artıq 20 kənddə 20 kümçüyə 40 qutu baramaqurdu paylanmışdır. Kümçülər deyirlər ki, yem sarıdan problemləri yoxdur.
Tovuz meyvə və giləmeyvəsinin özgə dadı olur. Bu sahə həm də gəlirlidir. Son məlumata görə, rayonda 1559,1 hektar bağ vardır. Həmin bağların hamısında budama aparılmış, 1279 hektarında suvarma, 1322,2 hektarında cərgələrarası şum və 1320,8 hektarında xəstəlik və zərərvericilərə qarşı mübarizə işləri görülmüşdür. Bütün bunlarsa bol məhsula hesablanıb, təbii ki, aşırı yağışlar imkan versə.
Sabir ƏLİYEV,
"Azərbaycan"
