Ukraynanın İrpen şəhərində Azərbaycanın görkəmli elm xadimi, oftalmoloq-alim, akademik Zərifə Əliyevanın vəfatının 41-cı ildönümü ilə bağlı anım tədbiri keçirilib.
AZƏRTAC xəbər verir ki, tədbir iştirakçıları tərəfindən əvvəlcə Zərifə Əliyevanın İrpen şəhərindəki büstü önünə tər çiçəklər düzülüb, əziz xatirəsinə ehtiram ifadə olunub.
Daha sonra İrpen şəhərindəki Zərifə Əliyeva adına humanitar “Linqvist” liseyində akademikin xatirə muzeyi ziyarət edilib.
Səfir Seymur Mərdəliyev bildirib ki, akademik Zərifə Əliyevanın elmi irsi, tibbin müxtəlif sahələri üzrə apardığı tədqiqatlar, yaratdığı fundamental əsərlər Azərbaycan elminin parlaq səhifələrini təşkil edir.
Kiyev vilayətinin Buça rayon Şurasının deputatı Roman Baxtiqareyev AZƏRTAC-a açıqlamasında bildirib ki, Zərifə Əliyevə nəinki Azərbaycanda, həm də Ukraynada tanınan şəxsiyyətdir: “Mən vaxtilə Azərbaycanda yaşamışam və o vaxtlar Heydər Əliyevlə görüşmək şərəfinə nail olmuşam. Zərifə Əliyevə Azərbaycan və Ukrayna xalqları arasında dostluq simvoludur. Biz ukraynalılar da Zərifə Əliyevanı böyük məhəbbətlə anırıq”.
İrpen şəhər Dövlət Vergi Universitetinin prorektoru Artyom Bulqari də AZƏRTAC-a açıqlamasında bildirib ki, hər il olduğu kimi İrpendə Zərifə Əliyevanın xatirəsi anılır: “Zərifə Əliyeva Azərbaycan xalqının böyük şəxsiyyətidir. Azərbaycan və Ukrayna xalqları həmişə öz tanınmış şəxsiyyətlərini birgə anırlar. Sevincimizi və kədərimizi birgə bölüşürük. Azərbaycan dövlətinin İrpenə göstərdiyi dəstəyə görə xüsusi təşəkkürümü bildirirəm”.
jpg_1775472819.jpg)
