2026-cı ilin birinci rübü ərzində “Azəri-Çıraq-Günəşli” (AÇG) üzrə fəaliyyətlərə təqribən 134 milyon dollar əməliyyat məsrəfləri və 363 milyon dollar əsaslı məsrəflər xərclənib. 2025-ci ilin eyni dövrü ilə müqayisədə əməliyyat məsrəfləri 16,5 faiz və əsaslı məsrəflər 44,6 faiz artıb.
AZƏRTAC bp-nin 2026-cı ilin birinci rübünün yekunlarına dair hesabatına istinadən xəbər verir ki, AÇG üzrə Hasilatın Pay Bölgüsü haqqında Sazişin podratçı tərəfləri adından “BP Exploration (Caspian Sea) Limited” şirkəti operatordur.
AÇG yatağında aparılan 4-ölçülü (4D) yüksək dəqiqlikli dənizdibi qovşaqlarla seysmik tədqiqat proqramı çərçivəsində 2025-ci ildə əldə olunmuş məlumatların emalı birinci rüb ərzində davam edib.
Rüb ərzində, həmçinin Dərinsulu Günəşli ərazisində bir çox quyularda sualtı müdaxilə proqramı çərçivəsində dəniz əməliyyatları davam edib. Bu əməliyyatların bir hissəsi olaraq ilk quyuda sualtı müdaxilə işi uğurla tamamlanıb və quyu lazımı məlumatlar toplandıqdan sonra yenidən suvurma fəaliyyətini davam etdirib.
2026-cı ilin birinci rübündə AÇG-dən stabil hasilat təhlükəsiz və etibarlı şəkildə davam edib. Rüb üçün AÇG-dən ümumi hasilat – “Çıraq” (19 min 500), “Mərkəzi Azəri” (89 min 800), “Qərbi Azəri” (74 min 800), “Şərqi Azəri” (43 min 900), Dərinsulu Günəşli (47 min 700), “Qərbi Çıraq” (22 min 600) və ACE (26 min 700) platformalarından birlikdə – gündə orta hesabla 325 min barel və ya ümumilikdə təxminən 29 milyon barel, yəni 4 milyon ton olub. Əvvəlki ilin eyni dövrü ilə müqayisədə ümumilikdə 1 milyon barel azalma olub.
Rübün sonunda AÇG-də ümumilikdə 149 neft hasilat quyusu, 50 su injektor quyusu və 11 qaz injektor quyusu istismarda olub.
Birinci rüb ərzində AÇG-də 2 neft hasilatı quyusu, 3 su injektoru və 1 qaz injektoru quyusunun qazıntısı tamamlanıb.
2026-cı ilin birinci rübü ərzində AÇG-dən Azərbaycan dövlətinə əsasən Səngəçal terminalından, həmçinin “Neft Daşları”ndakı qurğu vasitəsilə gündə orta hesabla 12 milyon kubmetr, ümumilikdə isə 1 milyard kubmetr səmt qazı təhvil verilib. Hasil edilən səmt qazının qalan hissəsi təzyiqi saxlamaq məqsədilə yenidən kollektora vurulub.
AÇG üzrə mövcud hasilatın pay bölgüsü sazişinə (HPBS) sərbəst təbii qazla (STQ) bağlı yeni əlavənin imzalanmasından sonra ilkin hasilat quyusu planlaşdırılıb və mövcud “Qərbi Çıraq” platformasından təhlükəsiz şəkildə qazılıb. Bu quyu qiymətləndirmə baxımından da çox əhəmiyyətlidir, çünki quyudan əldə edilən məlumatlar AÇG-dəki STQ ehtiyatlarının işlənməsi üçün gələcək planların hazırlanmasına kömək edəcək.
2025-ci ildə quyuda qazma işləri uğurla bitib və hazırda hasilatda olan neft laylarının altında yerləşən iki prioritet STQ layına - daha dayaz Qırmakıüstü Qumlu (QÜQ) və daha dərin Qırmakıaltı (QA) lay dəstlərinə çıxış təmin edilib.
Quyu ilk STQ hasilatı üçün əsas hədəf lay sayılan QÜQ lay dəstində qaz ehtiyatlarının mövcudluğunu təsdiqləyib. Bu laydan ilk hasilat bu ilin ikinci yarısına planlaşdırılır.
Bundan əlavə, quyu QA lay dəstində də yüksək təzyiqli qaz ehtiyatlarının mövcudluğunu aşkar edib. Bu laydan ilk STQ hasilatı 2026-cı ilin birinci yarısına planlaşdırılır. Bu, ilkin dövr hasilatı olmaqla yanaşı, həmçinin quyuda və lay dəstində sınaq işlərinin aparılmasını da əhatə edir. Bundan sonra quyu yenidən tamamlanacaq və ilin ikinci yarısından başlayaraq hasilat daha dayazda yerləşən və ilk qaz üçün əsas hədəf sayılan QÜQ layından həyata keçiriləcək.
