Yeni layihələr Azərbaycanda elm və təhsilin inkişafına yönəlib
"Xankəndidə Qarabağ Universitetinin açılması Azərbaycan elminin və təhsilinin uğurlarından xəbər verir. Dövlət başçısının sərəncamı onu göstərir ki, Qarabağda quruculuq və bərpa işləri uğurla gedir. Dini, tarixi abidələrin, mədəniyyət abidələrinin bərpası göz qabağındadır. O cümlədən ali təhsil pilləsi üzrə bir müəssisənin açılmasına da ehtiyac var idi".
Bu sözləri "Azərbaycan" qəzetinə açıqlamasında Milli Məclisin deputatı Anar İsgəndərov deyib. Deputat bildirib ki, Xankəndidə vaxtilə Pedaqoji Universitetin filialı olmuş, sonra o, müstəqil ali məktəbə çevrilmişdir, bu gün isə universitet Azərbaycan müəllimlərinin və tələbələrin iştirakı ilə yenidən açılır: "Elm və təhsil naziri də çıxışında qeyd etdi ki, 2024-2025-ci tədris ili üçün Dövlət İmtahan Mərkəzi xətti ilə imtahanlar keçiriləcək. 1000 nəfər tələbənin universitetdə təhsil alması nəzərdə tutulur. Təbii ki, universitetdə yaradılacaq ixtisasların ən birincisi tarix olmalıdır. Qarabağın tarixini ixtisasımızdan asılı olmayaraq, hər birimiz əzbər bilməliyik. Ona görə də bu ixtisasların açılması onu göstərir ki, Qarabağ Universitetində tarix fənnini tədris edən müəllim həm kitablardan Qarabağın tarixini öyrədəcək, həm də orada canlı tarixi öz tələbələri ilə bölüşəcək. Təbii ki, Xankəndidə Qarabağ Universitetinin açılması tək ali məktəb olmayacaq. Yəqin ki, Qarabağın bərpası nəticəsində əhalinin mərhələli şəkildə köçürülməsi ilə bağlı yeni ali məktəblər təsis ediləcək, digər universitetlərin filialları da açılacaq. Filialların da olmasına böyük ehtiyac var. Bununla yanaşı, bizim kontingentimiz məhdud olmayacaq. Təkcə Qarabağdakı yaşayanlar deyil, hətta xaricdən bu ali məktəblərə gələnlər olacaq".
Deputatın sözlərinə görə, Qarabağda bir neçə ali təhsil müəssisəsinə ehtiyac var: "Bu gün 4 minə yaxın əhali işğaldan azad olunmuş ərazilərə köçürülüb. Son nəticədə qaçqın və köçkün düşən bütün insanlar bu əraziyə köçürülərsə, onların sayı milyondan yuxarı olacaq. Ona görə də bu ərazilərdə universitetlərin açılması lazımdır".
A.İsgəndərov qeyd edib ki, bu ali məktəblərin yaradılması Azərbaycanda elm və təhsilin inkişafı deməkdir: "Qarabağda yaradılan ali məktəblərin bir məsuliyyəti də o olacaq ki, onlar illər ərzində düşmənin bizə qarşı törətdiyi soyqırımını unutmamaq üçün tarixi mənbələr əsasında öyrədəcək və Azərbaycan gənci xalqımızın düşmənlərini tanıyacaq. Bunun üçün Qarabağ tarixi ilə bağlı nə sənədlər varsa, dünyanın hansı arxivindədirsə, onlar Azərbaycana gətirilməlidir. Hər bir ali məktəb uğur deməkdir, tələbə sevinci deməkdir. Cəbhədə böyük uğur qazanan Azərbaycan əsgəri Qarabağ Universitetinin auditoriyasında da uğura imza atacaq".
Əsmər QARDAŞXANOVA,
"Azərbaycan"
