Dünyada baş verən siyasi kataklizmlər, Rusiya ilə Ukrayna, İranla İsrail arasında artan gərginlik dünya düzənində arzuolunmaz hadisələrin anonsunu verməkdədir. Hadisələrin təhlili göstərir ki, dünyanı idarə etmək iddiasında olan supergücləri  köhnə qaydalar qane etmir. 
Yeni dünyanın konturlarını cızanlar, yeni güc mərkəzləri formalaşdırmaq istəyənlər dövlətlərarası münasibətləri gərginləşdirərək müharibələr üçün meydanlar açırlar. Bəzi analitiklər artıq üçüncü dünya müharibəsinin başlandığını, hadisələrin sonluğunun dünyanın siyasi çoğrafiyasında ciddi dəyişikliklərlə başa çatacağını iddia edirlər.
Dünyanın belə gərgin çağında ən düzgün variant balanslaşdırılmış siyasət yürütmək, heç bir qlobal siyasi oyunların alətinə çevrilməməkdir. Təəssüf doğuran faktdır ki, artıq cənub qonşumuz İranla İsrail arasında münasibətlər gərginləşərək son həddə çatmışdır. Avropanın geosiyasi oyunlarının alətinə çevrilmiş Ermənistan isə müttəfiqi Rusiyaya diş qıcıtmaqla regionda gərginliyi artırmaqla məşğuldur. Görünən odur ki, hadisələrin gedişi region üçün yaxşı heç nə vəd etmir.
Dünya siyasətində ardıcıl  prinsipial mövqeyi ilə seçilən, qonşuluq münasibətlərində sülhə, sabitliyə, qarşılıqlı anlaşmaya daim sadiq qalan Azərbaycan isə yaxın qonşuları ilə münasibətdə həmişə səmimi mövqe sərgiləyərək nümunəvi davranış göstərib. O cümlədən cənub qonşumuz İranla da həmişə normal qonşuluq münasibəti qurmağa çalışıb. Amma təəssüf ki, həmişə islam dövləti İrandan qeyri-səmimi davranış görmüşük.
Hər şeyi bir kənara qoysaq belə, islam dövləti İranın Qarabağda dini abidələrin dağıdılması və təhqir olunmasına susqunluğunu başa düşmək mümkün deyil...
Martın 5-də Azərbaycan Respublikasının xarici işlər naziri Ceyhun Bayramov İslam Əməkdaşlıq Təşkilatının (İƏT) Xarici İşlər Nazirləri Şurasının fövqəladə iclasında iştirakı çərçivəsində İran İslam Respublikasının xarici işlər naziri Hüseyn Əmir-Abdullahian ilə görüşüb. Xarici işlər nazirləri görüşdə bəhs etdiyimiz problemlər ətrafında müzakirələr aparıb, situasiyadan çıxış yolları aranıb. Görüş zamanı rəsmilər vurğulayıblar ki, ölkələrimizin mehriban qonşuluq və əməkdaşlıqdan savayı seçimi yoxdur: bu, tarixi, siyasi, iqtisadi və s. baxımından zərurətdir. Səbəb sadədir: Azərbaycanla İran dünya coğrafiyasında və siyasi münasibətlər arealında bir-biri ilə tarixi, mədəni və s. bağlara malik dövlətlərdir. Təəccüblü budur ki, rəsmi görüşlər zamanı Azərbaycanla dostluq münasibətlərində maraqlı olduğunu bəyan edən İran əməldə səmimiyyətini göstərmir. Nazirlərin görüşündən cəmi bir neçə gün sonra İranın Ermənistandakı fövqəladə və səlahiyyətli səfiri Mehdi Subhani yenidən sakitliyi pozub. Aprelin 16-da mətbuat konfransında deyib ki, "İkinci Qarabağ müharibəsində erməni əsgərləri İsrail silahı ilə öldürülüb". İran səfiri işğalçı dövlətin əsgərlərinin məhvini faktiki olaraq faciə kimi təqdim edir. Bəlkə İran səfiri Ermənistan ordusunun törətdikləri vəhşiliklərdən, insanlığa yaraşmayan əməllərindən, torpaqlarımızı 30 ilə yaxın bir zaman ərzində  işğal altında saxlamalarından xəbərsizdir. Bir düşünübmü ki, o əsgərlər Azərbaycan ərazisində nələr edirdilər?
Və yaxud, sabah İsrail əsgərləri işğalçılıq məqsədilə İran ərazisinə girsələr, onun ölkəsi işğalçını gül-çiçəkləmi qarşılayacaq? Görünən budur ki, İran münasibətlərində səmimi deyil. Yoxsa hər məqamda, imkan düşən kimi Azərbaycanı ittiham edən səfirinin ipini çəkər, cəzasını verərdi.

Elşən QƏNİYEV,
"Azərbaycan"