Diasporla İş üzrə Dövlət Komitəsinin sədri Fuad Muradov Böyük Britaniyaya səfəri çərçivəsində Birləşmiş Krallıqda yaşayan Azərbaycan icması ilə görüşüb, Koordinasiya Şurasının toplantısında iştirak edib.
Dövlət Komitəsindən AZƏRTAC-a bildirilib ki, Komitə sədri Fuad Muradov ölkəmizin diaspor siyasətindən danışıb və çıxışında Prezident İlham Əliyevin 2022-ci il aprelin 22-də Şuşa şəhərində keçirilən Dünya Azərbaycanlılarının V Zəfər Qurultayındakı tarixi nitqindəki bu sözləri xatırladıb: “Əlbəttə, mən çox şadam ki, xaricdə fəaliyyət göstərən diaspor təşkilatlarımız Azərbaycan ilə daim təmasdadırlar, Dövlət Komitəsi ilə təmasdadırlar və müxtəlif ölkələrdə fəaliyyət göstərən diaspor təşkilatları arasında koordinasiya da təkmilləşir. Bu da çox vacibdir”.
Görüş iştirakçılarına dünya azərbaycanlılarının birliyinin möhkəmləndirilməsi, diaspor qurumları arasında koordinasiyanın genişləndirilməsi istiqamətində komitənin gördüyü işlər barədə müfəssəl məlumat verilib.
Azərbaycanın Böyük Britaniya və Şimali İrlandiya Birləşmiş Krallığındakı səfiri Elin Süleymanov bu ölkədə fəaliyyət göstərən diaspor təşkilatlarının fəallığını və ölkəmizin maraqlarının müdafiəsi istiqamətində gördükləri işləri yüksək qiymətləndirib.
İcma görüşü interaktiv müzakirə ilə davam edib.
Tədbirdə diaspor fəaliyyətində xüsusi xidmətləri olan soydaşlarımıza dövlət mükafatları təqdim edilib.
Daha sonra Birləşmiş Krallıqda Yaşayan Azərbaycanlıların Koordinasiya Şurasının toplantısı keçirilib.
Tədbir bədii hissə ilə davam edib.
Qeyd edək ki, görüş Diasporla İş üzrə Dövlət Komitəsinin, Birləşmiş Krallıqda Yaşayan Azərbaycanlıların Koordinasiya Şurasının və Britaniya Azərbaycan Cəmiyyətinin birgə təşkilatçılığı ilə keçirilib.
