Azərbaycan nümayəndə heyəti Türkiyənin Ankara şəhərində keçirilən 3-cü Beynəlxalq Keçiören Türk Dünyası Festivalında iştirak edib.
AZƏRTAC xəbər verir ki, ölkəmizi festivalda Azərbaycan Şəhər Bələdiyyələrinin Milli Assosiasiyasının (AŞBMA) və Nərimanov bələdiyyəsinin sədri Təmraz Tağıyevin rəhbərlik etdiyi nümayəndə heyəti təmsil edib. Tovuz bələdiyyəsinin sədri Kamil Abdullayev, Yevlax bələdiyyəsinin sədri İsmayıl Hüseynli, Sumqayıt bələdiyyəsi sədrinin müavini Orxan Adıgözəlzadə, Binəqədi bələdiyyəsi sədrinin müavini Qüdrəddin Verdixanov və AŞBMA-nın baş məsləhətçisi Rövşən Məmmədov heyətdə yer alıblar.
Keçiören bələdiyyəsinin sədri Mesut Özarslanın dəvəti ilə Azərbaycan nümayəndə heyəti əvvəlcə Keçiören bələdiyyəsini ziyarət edib. Görüşdə qardaş ölkələrin bələdiyyələri arasında əməkdaşlığın daha da genişləndirilməsi, qarşılıqlı təcrübə mübadiləsinin inkişaf etdirilməsi və birgə layihələrin həyata keçirilməsi imkanları müzakirə olunub.
Sonra nümayəndə heyəti Keçiören bələdiyyəsi və TÜRKSOY tərəfindən qardaş şəhərlər formatında təşkil edilən festivalda iştirak edib. Tədbirdə Türkiyə və Türk dünyası ölkələrindən nümayəndələr, eləcə də Türkiyə Böyük Millət Məclisinin Ankara üzrə deputatı, Ədalət və İnkişaf Partiyasının (AK Parti) sədr müavini Kürşad Zorlu, Türk Dünyası Bələdiyyələr Birliyinin sədri Taha Zahid Özdemir, Kipr Türk Bələdiyyələr Birliyinin sədri Mahmut Özçınar və digər rəsmi şəxslər iştirak ediblər.
Tədbirdə çıxış edən AŞBMA-nın və Nərimanov bələdiyyəsinin sədri Təmraz Tağıyev Türk dünyasının müxtəlif ölkələrindən festivala qatılan nümayəndələrə Azərbaycan Prezidenti İlham Əliyevin “Bizim ailəmiz Türk dünyasıdır, bizim başqa ailəmiz yoxdur” fikrini çatdırıb. Türk dövlətləri arasında mövcud qardaşlıq münasibətlərinin və əməkdaşlığın yerli özünüidarəetmə səviyyəsində də ardıcıl və məqsədyönlü şəkildə inkişaf etdirilməsinin vacibliyi vurğulanıb.
Festival proqramı çərçivəsində Azərbaycandan dəvət olunmuş mədəniyyət və incəsənət nümayəndələrinin iştirakı ilə konsert proqramı təqdim edilib.
Azərbaycan nümayəndə heyəti səfər çərçivəsində Türkiyə Cümhuriyyətinin qurucusu Mustafa Kamal Atatürkün məqbərəsi – Anıtkabiri və Ümummilli Lider Heydər Əliyevin adını daşıyan parkı ziyarət edib.
