Heydər Əliyev Fondu  göstərdi ki, əgər istək, iradə və xoş niyyət olarsa, istənilən məsələ həllini tapa bilər

Tariximizə müstəqil dövlət qurucusu kimi daxil olmuş Ulu Öndər Heydər Əliyevin xatirəsinə xalqımızın ehtiramını ifadə etmək arzusundan, zəngin mənəvi irsini yaşatmaq, azərbaycançılıq fəlsəfəsinin ölkəmiz üçün əhəmiyyətini vurğulamaq, milli dövlətçilik ideyalarını yeni nəsillərə aşılamaq zərurətindən irəli gələrək onun adına yaradılan fondun genişmiqyaslı fəaliyyəti Azərbaycanın hüdudlarından kənarda da yüksək dəyərləndirilir.
2004-cü ilin mayından fəaliyyətə başlayan Heydər Əliyev Fondu təhsil, səhiyyə, mədəniyyət, idman, elm və texnologiya, ekologiya, sosial və digər sahələrdə müxtəlif layihələr həyata keçirərək yeni cəmiyyət quruculuğunda fəal iştirak edir, ölkənin sosial-iqtisadi inkişafına öz töhfəsini verir. Xalqımızın mənəvi irsinin qorunması və təbliği, hazırda tarixə qovuşan Qarabağ münaqişəsinin əsl mahiyyətinin beynəlxalq ictimaiyyətə  əsaslı şəkildə çatdırılması  istiqamətlərdə Heydər Əliyev Fondunun atdığı addımlar Azərbaycanın diplomatik mübarizədə qələbəsinə  öz töhfələrini verib və bu gün də davam edir. Xeyriyyəçilik və humanizm prinsipləri fondun fəaliyyətində əsas yer tutur. Azərbaycanın Birinci vitse-prezidenti, Heydər Əliyev Fondunun prezidenti Mehriban xanım Əliyevanın özünün də vurğuladığı kimi, bu fəaliyyət sarsılmaz həqiqətlərə söykənir: "Əxlaq və mənəviyyat, insaniyyət və şəfqət, inam və məhəbbət, xeyirxahlıq və saf niyyətlər Yaradanın hər birimizə bəxş etdiyi ən gözəl keyfiyyətlərdir".
Ümummilli Lider Heydər Əliyevin şah əsəri olan müasir müstəqil Azərbaycan demokratik, hüquqi, dünyəvi dövlət quruculuğu yolunu seçərək bu istiqamətdə bir-birindən mühüm addımlar atır. Ulu Öndərin hakimiyyətə  qayıdışından sonra insan hüquqlarının qorunması dövlətimizin siyasətində prioritet istiqamətlərdən birinə çevrildi. Milli  Konstitusiyamızın bütün maddələrində insan amilinə diqqət, dövlətçiliyin möhkəmləndirilməsi üçün vətəndaşların üzərinə düşən vəzifələr  tam aydınlığı ilə müəyyənləşdirildi. Şərqdə ilk dəfə olaraq Azərbaycanda ölüm hökmünün ləğv olunması, amnistiya aktları və əfv sərəncamları ilə azadlıqdan məhrum edilmiş minlərlə məhbusun cəzasının çəkilməmiş hissəsindən azad olunması insan amilinə diqqətin nümunəsi kimi dəstəkləndi. 
Son 20 ildən artıq dövrdə Ümummilli Lider Heydər Əliyevin siyasi kursunu bütün sahələrdə uğurla davam etdirən Prezident İlham Əliyevin hər bir çağırışında insan amilinin prioritetliyi özünü aydın şəkildə nümayiş etdirir. İnsan hüquq və azadlıqlarının müdafiəsinin səmərəliliyinin artırılması, hüquq mədəniyyətinin inkişaf etdirilməsi, normativ-hüquqi bazanın və hüquq müdafiə sisteminin təkmilləşdirilməsi istiqamətində tədbirlərin davamlılığının təmin edilməsi məqsədilə Milli Fəaliyyət Proqramının təsdiqlənməsi, İnsan Hüquqları Gününün təsis edilməsi də bunun bariz nümunəsidir. Konstitusiyamızın qəbulundan bu günədək bu ali sənədə əlavə və dəyişikliklərin edilməsi məqsədilə üç dəfə keçirilən ümumxalq səsverməsində müzakirəyə çıxarılan əsas məsələlərdən biri məhz insan hüquqlarının qorunması və yeni müdafiə mexanizmlərinin yaradılmasıdır. Ümummilli Lider Heydər Əliyevin əsasını qoyduğu humanizm siyasəti  ölkəmizin hüquqi dövlət quruculuğu prosesində mühüm yerə malikdir. Məhkumların cəzasının yüngülləşdirilməsi, yaxud onların cəzadan tam azad edilməsi tədbirlərini həyata keçirmək məqsədilə 1995-ci ildə bağışlanma məsələləri üzrə komissiya yaradılıb, 2001-ci ildə isə Əfv məsələləri komissiyası ilə əvəz olunub. Bütövlükdə, 1995-2003-cü illərdə 7 amnistiya aktı və 32 əfv fərmanı imzalanıb. Bu sərəncamlar əsasında 3 mindən artıq şəxs bağışlanaraq cəzalarından azad edilib. Prezident İlham Əliyevin son 20 ildən artıq dövrdə imzaladığı çoxsaylı əfv sərəmcamları Ulu Öndər Heydər Əliyevin əsasını qoyduğu humanizm siyasəti və ənənələrinin davamıdır. Bayram və əlamətdar günlərdə bu mühüm addımın atılması ənənə halını alıb. Ulu Öndərin mərhəmət, insanpərvərlik məfkurəsindən çıxış etmək, humanizm ideyalarını həyata keçirmək Heydər Əliyev Fondunun da başlıca məramlarından biridir. Məhz Heydər Əliyev Fondunun təşəbbüsü ilə ölkəmizdə 2007-ci ildə Ulu Öndərin xatirəsinə həsr olunmuş, 2009-cu ildə Novruz bayramı, 2013-cü ildə  Heydər Əliyevin 90 illik yubileyi, 2018-ci ildə Respublika Günü münasibətilə amnistiya elan edilib. 2007-ci ildən başlayaraq Heydər Əliyev Fondunun təşəbbüsü ilə qəbul edilən amnistiya aktları əsasında 30 minə yaxın məhbus müxtəlif növ cəzalarından azad ediliblər. Mehriban xanım Əliyeva 2016-cı ildə Milli Məclisdə təşəbbüskarı olduğu 28 May Respublika Günü münasibətilə amnistiya elan edilməsi ilə bağlı çıxışında bildirmişdir: "Fond hər bir addımında, hər bir fəaliyyətində insanpərvərlik və humanizm ideyalarını rəhbər tutur, qayğı ilə yardıma ehtiyacı olan insanlara daim yardım etməyə çalışır. Təsadüfi deyil ki, bu gün bizə üz tutan insanlar Heydər Əliyev Fondunu son ümid yeri kimi qiymətləndirirlər və biz bu ümidi daim, hər zaman doğrultmağa çalışmışıq. Bu gün azadlıqdan məhrum edilən minlərlə həmvətənlərimizin ən böyük ümidi azadlığa çıxmaq, ailələrinə qovuşmaq və normal həyat tərzini qurmaqdır. Onları bağışlamaq, onlara yeni şans vermək, həyatlarında başqa yolu, cinayətə yer olmayan, qanunlara hörmətlə yanaşmaq prinsiplərində qurulan yeni ömür yolunu vermək deməkdir. Hər bir cinayət törədən insan öz səhvlərini təbii ki, dərk etməlidir və gələcəkdə bu səhvlərə yol verməməlidir". Heydər Əliyev Fondunun prezidenti onu da əlavə etmişdir ki, eyni zamanda həm dövlətimiz, həm ictimaiyyətimiz, hər birimiz azadlığa çıxan insanlara onların normal həyat tərzini qurmağında yardım etməlidir. Hər bir cəmiyyətdə mərhəmət, insanpərvərlik, qayğı kimi hisslər əsas yer tutmalıdır. Mərhəmət təkcə çətinliyə düşən insanlara yardım əlini uzatmaq deyil, mərhəmət bəzən çətin və məsuliyyətli qərar qəbul etmək tələb edir. Bir dəfə səhv etmiş insanların bağışlanmaq hüququ var. Bu gün biz onlara yenidən cəmiyyətdə öz yerlərini tutmalarına, layiqli həyat yaşamalarına şans verməliyik.
2017-ci ildə Prezident İlham Əliyevin sərəncamı ilə Mehriban xanım Əliyeva Azərbaycanın Birinci vitse-prezidenti təyin ediləndə də Heydər Əliyev Fondunun xidmətləri nəzərə alınmışdır. Cənab İlham Əliyev Təhlükəsizlik Şurasının iclasında Mehriban xanım Əliyevanı təqdim edərkən bildirmişdir ki, 2004-cü ildən bu günə qədər Mehriban Əliyeva Ulu Öndərin adını daşıyan Heydər Əliyev Fondunun prezidentidir. Heydər Əliyev Fondu onun rəhbərliyi ilə nəinki Azərbaycanın, regionun ən böyük və nüfuzlu ictimai təşkilatına çevrilmişdir. Heydər Əliyev Fondunun çoxşaxəli fəaliyyəti Azərbaycan xalqı tərəfindən yüksək qiymətləndirilir. Fondun təşəbbüsü ilə bir çox önəmli layihələrə, proqramlara start verilib. Onların arasında "Yeniləşən Azərbaycana yeni məktəb" proqramı xüsusi qeyd edilməlidir. Digər layihələr ölkəmizin hərtərəfli inkişafına xidmət göstərir. Heydər Əliyev Fondunun xətti və dəstəyi ilə minlərlə insan tibbi müalicə ilə təmin edilib.  Fondun fəaliyyəti məhz o məqsədi güdür ki, ehtiyacı olan insanlara yardım etsin və ən az müdafiə olunan vətəndaşlara imkan daxilində öz dəstəyini göstərsin.
Heydər Əliyev Fondunun mədəniyyətlə, incəsənətlə bağlı layihələri  mənəvi, tarixi, mədəni irsimizin qorunması işində əvəzolunmaz rol oynayır. Milli sərvətimiz olan muğam sənətinin yenidən inkişafı və beynəlxalq arenaya çıxarılması məhz Heydər Əliyev Fondunun və Mehriban Əliyevanın şəxsi təşəbbüsü nəticəsində mümkün olmuşdur. 
Gənc nəslin tərbiyə olunmasında milli-mənəvi dəyərlər, ənənələr xüsusi rol oynayır. Bu baxımdan, belə təşəbbüslər çox böyük ictimai məna daşıyır. Dünya miqyasında muğamın məhz Azərbaycan sənəti kimi təqdim olunmasında Heydər Əliyev Fondunun çox böyük rolu olub. Azərbaycanı dünyada tanıtmaq üçün müxtəlif təqdimatlar, sərgilər, tədbirlər keçirilir. Çoxsaylı tədbirlər nəticəsində dünya ictimaiyyəti ölkəmizi daha yaxından tanımağa, öyrənməyə, görməyə başladı. Azərbaycanın multikultural, müasir dövlət kimi dünyada tanıdılmasında da Heydər Əliyev Fondunun müstəsna xidmətləri var.
Prezident İlham Əliyev çıxışlarında bu mühüm məqamı da xüsusi qeyd edir ki, Heydər Əliyev Fondu, sözün əsl mənasında, ümumxalq fondu olmuşdur. Bu fond sübut etdi ki, əgər istək,  iradə və  xoş niyyət olarsa, istənilən sahədə istənilən məsələ həll oluna bilər. Fondun çoxşaxəli fəaliyyətini əgər bir sözlə xarakterizə etmək mümkündürsə, buna "Xoş niyyət" deyərdim. Çünki bütün sahələrdə biz bunu görürük.
Bu gün Heydər Əliyev Fondu qarşısında yeni vəzifələr dayanır.  Fondun təşəbbüsü ilə azad edilmiş torpaqlarda hazırda tarixi və  dini abidələrimizin əsaslı təmiri, bərpa edilməsi və inşası prosesinə start verilib. Şuşa şəhərində Yuxarı Gövhər ağa, Aşağı Gövhər ağa, Saatlı məscidləri, Ağdam, Zəngilan  şəhər məscidləri Heydər Əliyev Fondu tərəfindən əsaslı bərpa edilir. Eyni zamanda Daşaltıda, Hadrutda və Şuşa şəhərində yeni məscidlərin tikintisi də məhz Heydər Əliyev Fondunun təşəbbüsü ilə həyata keçirilir. Təkcə sadalanan  dini abidələrimizin sayı 8-ə bərabərdir. 
Heydər Əliyev Fondunun işğaldan azad edilmiş ərazilərimizdə aparılan bərpa-quruculuq işlərinə töhfələrinin tərkib hissəsi olan Şuşada reallaşdırdığı layihələri sırasında Üzeyir bəy Hacıbəylinin heykəlinin açılışını da qeyd etməliyik. Birinci Qarabağ müharibəsi zamanı erməni vandalizminə məruz qalaraq məhv edilmiş heykəl Azərbaycan Prezidenti İlham Əliyevin tapşırığına uyğun olaraq yenidən hazırlandı. Heydər Əliyev Fondunun dəstəyi ilə bürüncdən hazırlanan heykəl Şuşa şəhərində öz əvvəlki yerində ucaldıldı. Şuşada dahi Azərbaycan şairi Molla Pənah Vaqifin muzey-məqbərə kompleksinin bərpası və yenidənqurma işləri Heydər Əliyev Fondu tərəfindən aparılıb. Mehmandarovların da malikanəsi məhz ermənilərin çirkin niyyətlərinin qurbanı olmuşdu. Mühüm mədəni-tarixi memarlıq abidəsi olan bu malikanə kompleksində də bərpa işlərini Heydər Əliyev Fondu həyata keçirib. Bu sıralamanı daha da artıra bilərik.   
Fondun reallaşdırdığı layihələr qlobal xarakteri və keyfiyyətinə görə hətta beynəlxalq layihələri üstələyir.  BMT, İslam Əməkdaşlığı Təşkilatı, ICESCO və onlarca mötəbər qurumun dünyanın dörd bir tərəfində çalışan, peşəkarcasına müqayisə aparmaq imkanına malik yüksəkvəzifəli şəxslərinin Heydər Əliyev Fondunun layihələrindən təsirlənərək gördüklərini sözlə ifadə etməkdə  çətinlik çəkdikləri diqqətdən kənarda qalmır. 
Fondun həyata keçirdiyi layihələr çərçivəsində artıq onlarca uşaq bağçası da istifadəyə verilib. Bu uşaq müəssisələri müasir avadanlıqla təchiz edilib. Uşaqlara qayğı fondun prioritet istiqamətlərindən biridir. Bu baxımdan, "Uşaq evləri və internat məktəblərinin inkişafı" proqramını xüsusi qeyd etmək lazımdır. Diabetli, hemofiliyalı, fiziki cəhətdən qüsurlu uşaqların sağlamlığı qayğısına qalan Mehriban xanım Əliyevanın  bilavasitə diqqət və qayğısı ilə həyata keçirilən "Talassemiyasız həyat naminə", "Diabetli uşaqlara ən yüksək qayğı", "Kor və zəif görən uşaqların İKT-yə çıxışının təmin olunması" kimi layihələr üzrə görülən işlər, Bakıda Talassemiya Mərkəzinin, tələbatı ödəyəcək qədər ehtiyata malik Qan Bankının yaradılması xeyirxahlıq, vətənpərvərlik hisslərini birləşdirən humanist duyğulardır.
Heydər Əliyev Fondunun xətti ilə  ölkə daxilində  və respublikamızdan kənarda həyata keçirilən tədbirlər Azərbaycanın dünya miqyasında tanınması, milli-mənəvi sərvətlərimizin təbliği istiqamətində görülən əhəmiyyətli layihələr olmaqla xeyirxahlıq və humanistlik, mənəvi zənginlik baxımından da fərqlənir. Heydər Əliyev Fondunun xətti ilə   Parisdə Notr-Dam,  Strasburqda  Kafedral kilsələrində, Versal, Berlin şəhər saraylarının bərpası ilə əlaqədar görülən işlər  xalqımızın   müxtəlif din və millətlərə məxsus millətlərin birgəyaşayış  prinsipinə verdiyi  dəyərdir.  
"Biz öz tarixi köklərimizə, ənənələrimizə bağlıyıq. Bununla belə dünyaya açığıq. Bizim üçün dözümlülük, tolerantlıq, multikulturalizm təkcə son zamanlar dəbdə olan sözlər deyil. Bu Azərbaycan xalqının çoxəsrlik həyat tərzi və fəlsəfəsidir" söyləyən  Mehriban xanım  Əliyeva dünyada dini zəmində baş verən antisemitizm hallarına qarşı çağırışları ilə də diqqəti cəlb edir. Azərbaycanı müsəlman aləminin ayrılmaz parçası adlandıran Mehriban xanım "Eyni zamanda bizi Avropa ölkələri ilə güclü əlaqələr birləşdirir. Biz siyasi, iqtisadi, enerji, humanitar sahələrdə əməkdaşlıq qurmuşuq, Azərbaycan həm İslam Əməkdaşlıq Təşkilatına, həm də  Avropa Şurasına üzv olan nadir ölkələrdən biridir" sözləri ilə  ölkəmizin sivilizasiyalararası  multikultural mərkəz olduğunu bildirir. Heydər Əliyev Fondunun və onun rəhbəri Mehriban xanım Əliyevanın  təşəbbüsü ilə  həyata keçirilən layihələr bir məqsədə, amala xidmət edir: Qarşılıqlı hörmət, dözümlülük, ksenofobiya, radikalizm və terrora qarşı birgə mübarizə ilə narahat dünyamızda əmin-amanlığı qorumaq.
Yaranmasının 20 illiyini saysız-hesabsız uğurları ilə qeyd edən Heydər Əliyev Fondunun ötən dövr ərzində gördüyü işləri bir yazıda əhatə etmək qeyri-mümkündür. 20 illik yol sabaha daha yeni-yeni hədəflərlə qədəm qoymağa stimul verir. Fondun qazandığı ən böyük nailiyyət xalqın sevgisidir. Dahi şəxsiyyət Heydər Əliyevin adını daşıyan fond daim insanların üz tutduğu ünvanlardandır. Mehriban xanım Əliyevanın  "Mən bu kürsüdən istifadə edərək bir daha hamını əmin etmək istərdim ki, Heydər Əliyev Fondu Azərbaycanın bu günü və sabahı naminə gələcəkdə də çalışmağa hazırdır" fikirləri keçilən yolun təqdimatı olmaqla yanaşı, gələcək hədəfləri də özündə ehtiva edir.

Rəşad QOŞQARLI,
Binəqədi Rayon Məhkəməsinin hakimi