Rusiya Prezidenti  hökumətin istefası haqqında fərman imzalayıb
 
Mayın 7-də Rusiya Prezidenti Vladimir Putin ölkə hökumətinin istefası haqqında fərman imzalayıb. Müvafiq sənəd hüquqi aktların saytında yerləşdirilib.
Eyni zamanda o, istefa vermiş hökumətə yeni Nazirlər Kabineti formalaşana qədər fəaliyyət göstərməyi tapşırıb.
Həmin günün əvvəlində, inauqurasiya zamanı Putin and içərək, yeni müddətə Rusiya Federasiyasının prezidenti vəzifəsinin icrasına başlayıb. Böyük Kreml Sarayının salonlarına 2,6 minə yaxın qonaq toplaşıb. Prezident inauqurasiya nitqində ölkə vətəndaşlarına onlara göstərilən etimadı doğruldacaqlarına söz verib və rusiyalıların birliyinin vacibliyini qeyd edib.
Beşinci dəfə Rusiya prezidenti postuna gələn Vladimir Putin inauqurasiyadan sonra xüsusi hərbi əməliyyatın (SVO) iştirakçılarına müraciət edib: “Mən qəhrəmanlarımızın, xüsusi hərbi əməliyyat iştirakçılarının, Vətən uğrunda döyüşən hər kəsin qarçısında baş əymək istəyirəm”.
Prezidentin andiçmə mərasimindən dərhal sonra Rusiya hökuməti istefa verib. Yeni hökumətin formalaşdırılması proseduru Nazirlər Kabinetinin sədrinin təyin edilməsi ilə başlayır. Dövlət Duması namizədliyi təsdiqlədikdən sonra bu barədə fərman prezident tərəfindən imzalanır. Təyin edildikdən sonra bir həftə ərzində hökumət başçısı federal icra hakimiyyəti orqanlarının strukturu ilə bağlı təkliflərini prezidentə təqdim edəcək.
Vladimir Putin Rusiyada keçirilən prezident seçkilərində 87,28 faiz səslə qalib gəlib. Əsas ümumrusiya səsverməsi üç gün ərzində - martın 15-dən 17-dək baş tutub. Ümumi seçici fəallığı 77,44 faiz təşkil edib. Mərkəzi Seçki Komissiyasının (MSK) rəhbəri Ella Pamfilova bu rəqəmləri ölkənin müasir tarixində rekord göstərici adlandırıb.
Vladimir Putin ölkəyə 2030-cu ilə qədər rəhbərlik edəcək.

Rizvan HILALOĞLU,

"Azərbaycan"