"Bu gün düşmən bizim qarşımızda acizdir. Bu gün təkcə bizim tələbimizlə heç bir başqa, necə deyərlər, vasitəyə əl atmadan Qazaxın dörd kəndi bizə qaytarılır. Bir tələbimlə qaytarılır, bax, belə də olmalıdır. Bundan sonra belə də olacaq. Burada söz sahibi bizik, Qafqazda aparıcı dövlət bizik, iqtisadi, siyasi, hərbi, hər cəhətdən aparıcı dövlət bizik, bizimlə hər kəs hesablaşmalıdır. Həm Ermənistan, həm onun arxasında duran, onlara yalançı vədlər verən xarici dairələr bizimlə hesablaşmasalar peşman olacaqlar".
Mayın 10-da Prezident İlham Əliyev və birinci xanım Mehriban Əliyeva Şuşada birinci yaşayış kompleksinin açılışı və şəhərə köçmüş ilk sakinlərlə görüş zamanı qalib komandan bir daha Zəfərin zirvəsindən Azərbaycanın qələbəsini həzm edə bilməyən, ölkəmizə iftiralar atan, eləcə də məğlub Ermənistan və onun arxasında durub yalan vədlər verən dairələrə ciddi xəbərdarlıq ünvanladı. 
Prezident bir daha xatırlatdı ki, regionda söz sahibi Azərbaycandır və Cənubi Qafqazda marağı olan istənilən dövlət bütün məsələlərdə ölkəmizlə razılaşmalıdır. 
Bütün zamanlarda yürütdüyü siyasət beynəlxalq hüquqa və ədalətə əsaslanan İlham Əliyev Hayastandakı revanşist qüvvələrə, onlara dəstək olan Fransaya da ayrıca mesaj göndərdi: "Əgər bu gün yenə də görsək ki, Ermənistanda revanşistlər baş qaldırır, Fransa Ermənistana öldürücü silahlar verir, o silahların kritik həddə çatmasını görsək, onda bizdən heç kim inciməsin". 
Dövlət başçısının söylədiyi kimi, artıq hər kəs Azərbaycanın nəyə qadir olduğunu yaxşı bilir. Siyasi və iqtisadi müstəqilliyə, qüdrətli orduya, sarsılmaz xalq-iqtidar birliyinə sahib olan ölkə kimi Cənubi Qafqazın liderinin məqsədi yalnız bölgənin təhlükəsizliyinin təminatıdır. 
Azərbaycan heç zaman müharibə istəməyib və bu gün də istəmir. 
Azərbaycanın heç kimin torpağında gözü olmayıb, bu gün də yoxdur. 
Azərbaycanın yeganə istəyi bölgədə sülhün bərqərar olması və Qafqazda yeni dönəmin başlanmasıdır. Əgər sülh olarsa, regionda yeni əməkdaşlıq platformalarının yaranması da qaçılmazdır. Bu isə, əlbəttə ki, region ölkələrinin iqtisadiyyatına öz müsbət təsirini göstərəcək.  
Yox əgər regionda marağı olan qüvvələr Azərbaycanın xəbəri olmadan hansısa layihəni, hansısa mənfur planı həyata keçirmək istəsə, onda vəziyyət dəyişəcək. İlham Əliyev bir daha bölgə ilə bağlı çirkin planlar düşünən, buna cəhd etmək istəyən qüvvələrə səslənərək dedi ki, Azərbaycansız bölgədə heç bir proses alınmayacaq. Ölkəmizin nəyə qadir olduğunu həmin qüvvələr də yaxşı bilir. İstənilən təxribata layiqli cavab veriləcək. Heç kim Azərbaycanın qarşısında dura bilməz: "Hər kəs yaxşı bilir ki, biz nəyə qadirik, ordumuz nəyə qadirdir və iradəmiz nə qədər möhkəmdir. Heç kim bizim qabağımızda dura bilməz. Heç kim bizə heç nə diktə edə bilməz və bizim daxili işlərimizə müdaxilə edə bilməz. Nəyi lazım biliriksə, onu da edəcəyik". 
Qalib Komandan bir daha həm Ermənistana, həm onun havadarlarına, həm də bütün antiazərbaycançı şəbəkəyə xəbərdarlığını etdi. Yəqin ki, bu gün Ermənistanda küçələrə düşüb Azərbaycanla sülh müqaviləsinin imzalanmasının əleyhinə çıxan keçmiş hərbi xuntanın tör-töküntüləri, revanşist qüvvələr İlham Əliyevin xəbərdarlığından dərs götürəcəklər. Çünki həmin qüvvələrə yaxşı bəllidir ki, Azərbaycan Prezidenti elə-belə söz demir. İlham Əliyev deyir və edir. 
Dövlət başçısı keçmiş Minsk qrupunun iki üzvünə də sözünü çatdırdı. Hələ müharibədən öncəki illəri xatırladan İlham Əliyev dedi ki, konkret olaraq ABŞ və Fransa keçmiş Dağlıq Qarabağ problemini həll etmək istəməyiblər. Çünki həmin ölkələr bu torpaqları ermənilərə vəd vermişdilər: "Necə ki, sovet dövründə ermənipərəst Qorbaçov və ondan sonra Yeltsin bu torpaqları ermənilərə vəd vermişdilər və Fransa da, Amerika da həmçinin eyni addımı atmışdı". 
Əgər diqqət etsək görərik ki, İkinci Qarabağ müharibəsindən sonra da Azərbaycana qarşı təxribatlarda əsas rol oynayanlar - Fransa və ABŞ-dir. Fransa prezidenti Emmanuel Makron "ermənidən çox ermənilik" prinsipinə sadiq qalaraq Azərbaycana qarşı bütün çirkin kampaniyalarda iştirak edir. ABŞ isə sözdə Azərbaycanın yaratdığı reallıqları dəstəklədiyini bildirsə də, əməldə Ermənistanın sülh müqaviləsini imzalamaması üçün çalışan Fransanın yanındadır. Ona görə də İlham Əliyev bir daha həqiqətləri söyləyərək hər iki ölkəyə fikirlərini çatdırdı: "Onlar da bilməlidirlər ki, bizim iradəmizdən kənar bu bölgədə heç bir məsələ həll olunası deyil. Burada, bu torpaqda söz sahibi bizik... Həm Azərbaycan xalqına, həm də bu bölgəyə maraq göstərənlərə bir daha demək istəyirəm ki, bizimlə hesablaşmadan burada bir addım da atılmamalıdır bundan sonra. Əminəm ki, mənim sözümü eşidirlər, bilirlər mən nəyi deyirəmsə, onu da edirəm".
Bir sözlə, İlham Əliyev Zəfərin zirvəsi olan Şuşadan tək Ermənistana, ona dəstək verən Fransa və ABŞ-yə deyil, dünyaya səslənərək Azərbaycanın mövqeyini, məqsədini açıqladı. Azərbaycan yalnız sülh istəyir. Müharibə istəyən qüvvələrlə də mübarizə aparmaq gücünə, qüdrətinə sahibdir.  

Rəşad BAXŞƏLİYEV,
"Azərbaycan"