Vətənin bütövlüyü və azadlığı naminə həyatını qurban verən, müqəddəs torpaqlarımızı qanı ilə qoruyaraq şəhidlik zirvəsinə ucalan qəhrəman oğullarımızdan biri də şəhid Astanlı İqbal İlqar oğludur. O, gənc yaşlarından Vətənə sədaqət, xalqına sevgi və torpağa bağlılıq hissi ilə böyüyüb. Hər zaman Vətənin müdafiəsinə hazır olan İqbal döyüş meydanında göstərdiyi rəşadəti və igidliyi ilə seçilib.
AZƏRTAC-ın bölgə müxbiri xəbər verir ki, 44 günlük Vətən müharibəsi zamanı o, ön cəbhədə düşmənə qarşı mərdliklə vuruşub, torpaqlarımızın azadlığı uğrunda misilsiz fədakarlıq nümayiş etdirib. İqbal Astanlı son nəfəsinə qədər döyüş yoldaşlarına nümunə olub, qorxmazlığı və vətənpərvərliyi ilə yaddaşlarda dərin iz buraxıb.
1997-ci il avqustun 10-da Biləsuvar rayonunda anadan olan İqbal uşaqlıq illərindən idmana, xüsusilə də güləşə böyük maraq göstərib. Kiçik yaşlarından məşqlərə başlayaraq daim səylə çalışıb və qısa müddətdə öz bacarığı, iradəsi və zəhməti sayəsində diqqət mərkəzinə olub. İdman karyerasında ardıcıl uğurlar qazanan İqbal bir çox yarışda fəxri yerlərə layiq görülüb. Buna görə də İqbalın hərbi bacarığının formalaşmasında onun idman keçmişi mühüm rol oynayıb.
Şəhidin atası İlqar Astanlı qürur və kədər dolu bir hisslə deyir ki, İqbal uşaqlıqdan çox çevik, dözümlü və iradəli uşaq olub. “Güləş onun həyatı idi. Gecə-gündüz məşq edərdi, yorulmaq nədir bilməzdi. Dəfələrlə rayon və respublika yarışlarında birinci yerə çıxmışdı. Evə hər dəfə boynunda medal, əlində diplomla gələndə gözlərim sevincdən yaşarırdı. Bilirdim ki, bu uşağın içində böyük güc, böyük Vətən sevgisi var. O, hər şeyə ciddi yanaşırdı. “N” saylı hərbi hissənin kəşfiyyat bölüyündə xidmət edirdi. Komandirləri tez-tez mənə deyirdilər ki, İqbal çox mərd, qorxmaz və intizamlı əsgərdir. Hər tapşırığı böyük məsuliyyətlə yerinə yetirirdi. Mən o sözləri eşidəndə həm sevinirdim, həm də içimdə bir narahatlıq olurdu. Müharibə başlayan ilk gündən döyüşlərə qatıldı. Xidmətini bitirib qayıtmasına cəmi üç ay qalmışdı... İdmanda qazandığı dözüm, güc və inam onu döyüş meydanında da qorxmaz etdi” , - deyə şəhid atası bildirir.
Suqovuşan istiqamətində gedən ağır döyüş əməliyyatlarında iştirak edən Azərbaycan Ordusunun hərbi qulluqçusu İqbal Astanlı sentyabrın 29-da baş verən şiddətli döyüşlər zamanı qəhrəmancasına şəhid olub. Şəhidin nəşi doğulduğu Biləsuvar rayonunda böyük izdihamla qarşılanaraq, şəhər qəbiristanlığında torpağa tapşırılıb.
Azərbaycanın ərazi bütövlüyünün təmin edilməsi uğrunda döyüşlərdə göstərdiyi igidliyə görə İqbal Astanlı Prezident İlham Əliyevin sərəncamlarına əsasən ölümündən sonra “Vətən uğrunda”, “Cəsur döyüşçü” və “Suqovuşanın azad olunmasına görə” medalları ilə təltif edilib.
jpg_1773122500.jpg)
