Mürəkkəb qlobal gərginlikdə respublikamız sabitliyini və inkişafını uğurla təmin edir
Çağdaş dünyamızın vəziyyəti mürəkkəb, ziddiyyətli və təzadlıdır. Çünki planetimizin tablosunda inkişaf da var, tənəzzül də. Rifah da var, səfalət də. Müharibə də var, sülh də.
Dünyada kataklizmlər nəinki səngiyir, əksinə, daha da çoxalır
Diqqəti daha çox çəkən isə odur ki, hərbi və siyasi kataklizmlər nəinki səngiyir, əksinə, daha da çoxalır. Başa çatan bir müharibədən və ya münaqişədən sonra başqaları yaranır. Bəzi ölkələr etnik, dini qarşıdurmaların və terrorçuluğun fəsadlarından, bəziləri isə bitməyən siyasi çəkişmələrdən əziyyət çəkir. Texnoloji inkişafın yaratdığı imkanlardan yararlanaraq son illərdə daha da güclənən kibercinayətkarlıq qlobal təhlükə kimi bütün dövlətləri təhdid edir.
Nəticə etibarilə bütün bunlar xalqların taleyində dərin iz buraxır, onlara ağır mənəvi zərbə vurur və məhrumiyyətlərə düçar edir. Müharibə dövlətlərin və onların xalqlarının faciəsi, iqtisadi, milli və mənəvi tənəzzülü deməkdir. Məhv edilən iqtisadiyyatın bərpası üçün uzun onilliklər belə bəs etmir. Yaxın Şərqdə, ərəb ölkələrində uzun illərdir davam edən qarşıdurmaların sonu görünmür. Elə Azərbaycana nisbətən yaxın olan bəzi coğrafiyalarda da mürəkkəb hərbi-siyasi konyunktura müşahidə edilir. İraqda, Suriyada terrorun kökünü tamamilə kəsmək hələ də mümkün olmayıb.
Bütün bu deyilənlər bir daha təsdiq edir ki, sabitlik hər bir dövlət və xalq üçün olduqca vacib məsələdir. Lakin müasir dünyamızın reallıqları həm də ondan xəbər verir ki, sabitlik yolunu addımlamaq, inkişafa nail olmaq, nailiyyətlər əldə etmək heç də hər ölkəyə nəsib olmur.
Beynəlxalq miqyasda özünü göstərən belə gərgin şəraitdə Azərbaycanda sabitliyin hökm sürməsi dövlətimizin və xalqımızın ən böyük uğurlarından biridir. Respublikamızın əldə etdiyi bütün nailiyyətlərin kökündə dayanan əsas amillərdən biri məhz sabitlikdir.
Azərbaycanın inkişafının təməlində dayanan əsas faktorlardan biri sabitlikdir
Azərbaycanı bugünkü sabitliyə gətirən yollar heç də hamar olmayıb. Ötən əsrin 90-cı illərinin əvvəllərində respublikamızda cərəyan edən proseslər orta və yaşlı nəslin yaxşı xatirindədir. Həmin illərdə anarxiyanın, xaosun, separatizmin baş alıb getdiyi, hakimiyyətdə olan qüvvələrin səriştəsizliyi, idarəçilikdə buraxdıqları bağışlanmaz səhvlər şəraitində hansı sabitlikdən danışmaq olardı. Hansı ki, bunlar Azərbaycanın müstəqilliyi və dövlətçiliyi üçün böyük təhdidlər doğurmuşdu.
Yalnız Ulu Öndər Heydər Əliyevin xalqın istək və arzusu ilə siyasi hakimiyyətə gəlişindən sonra respublikamız bütün bu problemlərdən xilas oldu. Başlıcası siyasi-ictimai sabitlik təmin edildi. Bunun üçün təhlükə doğuran zərərli meyillərə, qanunsuz silahlı birləşmələrə qarşı uğurlu və təxirəsalınmaz tədbirlər həyata keçirildi.
Azərbaycanın uğurları çoxdur. Ən böyük uğurlarından biri isə qeyd etdiyimiz kimi sabitlikdir. Sabitliyin təmin olunması qarşıda dayanan vəzifələrin yerinə yetirilməsində əsas amildir. Azərbaycan dünyanın ən təhlükəsiz ölkələrindən biri olaraq tanınmaqdadır. Bakının beynəlxalq tədbirlər mərkəzinə çevrilməsinin də əsas səbəblərindən biri məhz ölkəmizdəki möhkəm sabitlikdir. NATO və Rusiya hərbi komandanları arasında yüksəksəviyyəli görüşlərin keçirilməsi üçün Bakının seçilməsi də respublikamızdakı sabitliyə görədir.
İlham ƏLİYEV: "Azərbaycan bu gün dünya miqyasında sabitlik məkanı, sabitlik adası kimi tanınır"
Azərbaycan həm də makroiqtisadi baxımdan davamlı və dayanıqlı iqtisadi inkişafa malik ölkə kimi tanınır. Bir neçə il qlobal səviyyədə özünü göstərən iqtisadi böhran da respublikamızın iqtisadi və sosial sabitliyinə xələl gətirə bilmədi və Azərbaycan bütün bu sınaqlardan alnıaçıq çıxdı.
Prezident İlham Əliyevin qeyd etdiyi kimi, Azərbaycan dünya miqyasında sabitlik məkanı, sabitlik adası kimi tanınır: "Biz görürük ki, sabitlik pozulanda inkişafdan söhbət gedə bilməz. Sabitlik pozulanda xarici müdaxilə baş verir, ölkələr idarəolunmaz vəziyyətə düşür, qardaş qanı tökülür və ölkələrin gələcəyi böyük sual altına düşür. Azərbaycanda sabitliyin təminatçısı Azərbaycan xalqıdır və bizim siyasətimizdir. Ona görə xalq-iqtidar birliyi bizim uğurlarımızın əsas şərtidir. Azərbaycan bu gün dünya miqyasında sabitlik məkanı, sabitlik adası kimi tanınır və bu, bizim böyük nailiyyətimizdir".
Son illərədək Azərbaycandakı sabitliyə təhdid yaradan əsas problemlər torpaqlarımızın Ermənistan tərəfindən işğal olunması və Qarabağdakı erməni separatizmi idi. Vətən müharibəsində və antiterror tədbirlərində qazanılan zəfərlərdən sonra bütün bu təhdidlər tam aradan qaldırıldı. Ərazi bütövlüyümüzün bərpası ilə Azərbaycan torpaqlarının hər bir nöqtəsində sabitlik bərqərar olundu.
Bu gün Azərbaycana yaxın coğrafiyalarda, qonşu dövlətlərdə təhlükəsizliklə, sabitliklə bağlı problemlər mövcuddur. Ən pisi odur ki, bu problemlərin sonu görünmür və pessimist proqnozlar doğurur. Belə bir regional konyunktura şəraitində Azərbaycan dövləti özünün sabitliyini və inkişafını uğurla təmin edir.
Rəşad CƏFƏRLİ,
"Azərbaycan"
