Bu gün “SABAH.city” innovasiya şəhərciyinə mediatur təşkil olunub.
AZƏRTAC xəbər verir ki, Yüksək Texnologiyalar Parkının baş direktoru Nihat Məcidov jurnalistlərə açıqlamasında bildirib ki, “SABAH.city” elm, təhsil, texnologiya, sahibkarlıq və investisiya ekosisteminin əsas iştirakçılarını vahid məkanda bir araya gətirən yeni nəsil innovasiya platformasıdır: “Layihənin əsas məqsədi universitet–sənaye əməkdaşlığını gücləndirmək, yüksək ixtisaslı insan kapitalının inkişafına dəstək olmaq, tətbiqi tədqiqatları və texnologiya transferini təşviq etmək, startap və texnologiya şirkətləri üçün əlverişli mühit yaratmaqdır. “SABAH.city”də tədris və tədqiqat sahələri, startaplar üçün kovörkinq məkanları, texnologiya şirkətləri üçün ofislər, 200 nəfərlik tədbir zalı, restoran və kofeşoplar, həmçinin idman və istirahət zonaları yaradılıb. Birinci mərhələdə 3 ali təhsil müəssisəsi, 8 texnologiya və innovasiya yönümlü şirkət və 12 startap olmaqla, ümumilikdə 23 əsas ekosistem iştirakçısı şəhərciyə cəlb edilib. Şəhərcikdə mühəndislik, informasiya texnologiyaları, süni intellekt, robototexnika, kibertəhlükəsizlik və digər istiqamətləri əhatə edən 13 tədris, tədqiqat və inkişaf laboratoriyası fəaliyyət göstərəcək. “SABAH.city”nin tam fəaliyyətə başlaması ilə gündəlik istifadəçilərin sayının təxminən 3 min nəfərə çatacağı gözlənilir. Şəhərcik həmçinin startapların inkişafı və yerli və beynəlxalq innovasiya tədbirlərinin keçirilməsi üçün platforma rolunu oynayacaq”.
Mediatur çərçivəsində jurnalistlər ASAN Süni İntellekt Mərkəzi (ASAN AI Hub) ilə də yaxından tanış olublar. “ASAN AI Hub”ın rəhbəri Ləman İbrahimova bildirib ki, mərkəzin əsas məqsədi Azərbaycanda süni intellekt (Sİ) sahəsində innovativ təşəbbüsləri dəstəkləmək, tədqiqatçıları, dövlət qurumlarını, özəl sektoru və fərdi istifadəçiləri vahid rəqəmsal platformada — www.asanhub.ai — bir araya gətirməkdir. Platforma açıq innovasiya modelini təşviq etməklə dövlət, biznes və təhsil müəssisələri arasında əməkdaşlığın gücləndirilməsinə xidmət edir. Real texnoloji problemlər və ehtiyaclar platformada açıq şəkildə elan olunur. Tələbələr, universitet və elmi müəssisələrin nümayəndələri, sahibkarlar və digər maraqlı tərəflər öz həlləri ilə müraciət edərək mükafat fondu uğrunda müsabiqədə iştirak etmək imkanı əldə edirlər. Bu günədək ümumilikdə 50 süni intellekt həlli təqdim olunub”.
Ləman İbrahimova qeyd edib ki, “ASAN AI Hub” tədqiqat fəaliyyətlərinin dəstəklənməsi və süni intellekt sahəsində elmi potensialın inkişafına töhfə vermək məqsədilə ölkədə fəaliyyət göstərən 8 universitet və Azərbaycan Milli Elmlər Akademiyası ilə, eyni zamanda, elmi əməkdaşlığın genişləndirilməsi məqsədilə bir sıra nüfuzlu xarici universitetlərlə də - Tsinghua Universiteti (Çin), Oksford Universiteti (Birləşmiş Krallıq) və Boğaziçi Universiteti (Türkiyə) əməkdaşlıq əlaqələri qurub.
“ASAN AI Hub” süni intellekt sahəsində maarifləndirməyə və insan kapitalının inkişafına xüsusi önəm verir. Bu məqsədlə “Hub Apolitical”, “Duco Digital Learning”, “AI Certs+”, “MinnaLearn”, “AI Academy Asia”, “GenAI Works”, “Breakthrough Social Enterprise” və “Geneva Innovation Movement Association” kimi beynəlxalq tərəfdaşlarla əməkdaşlıq əlaqələri qurub və onların təqdim etdiyi onlayn təlim imkanlarını yerli istifadəçilər üçün əlçatan edib.
