Parisdə "Carrousel du Louvre"da keçirilən sərgidə bir qrup azərbaycanlı rəssamla birgə əsərləri nümayiş olunan gənc rəssam Fəxriyyə Əliyeva həyəcanla heyranlarını seyr edirdi. Nəzərlər azərbaycanlı rəssamın yaratdığı qadın fiqurlarına yönəlmişdi...
Onunla vədələşdiyimiz kimi, Parisdən birbaşa redaksiyamıza təşrif buyurmuşdu. Yüksək əhvali-ruhiyyədə idi. Söhbətə elə Paris səfəri ilə cığır açdıq. O, sevinclə Fransa səfərindən söz açdı:
- 18-20 oktyabrda Parisdə "Carrousel du Louvre"da keçirilən sərgidə iştirakım yaradıcılığımın mühüm bir mərhələsini təşkil edir. Bəri başdan qeyd edim ki, sərgidə iştirak etməyim bir rəssam kimi mənə göstərilən etimad idi. Əsərlərimlə ölkəmizi təmsil etmək xoşbəxtliyinin mənə də nəsib olduğunun qürurunu yaşayırdım. Eyni zamanda bunun məsuliyyətini də dərk edirdim. Onu da qeyd edim ki, mən tək deyildim. Mənimlə birlikdə Əsmər Nərimanbəyova, Ramina Səadətxan və Anar Hüseynzadə də bu sərgidə əsərləri ilə iştirak edirdilər.
Qadınların müxtəlif rol və vəziyyətlərini, eləcə də onların emosional ifadələrini əks etdirən kompozisiyalarla zənginləşdirilmiş işlərimi təqdim etmişdim. Bu əsərlər həmçinin qadınların tarixi və mədəni kontekstdəki yerini müəyyən edirdi. İlk andan hiss etdim ki, əsərlərim ziyarətçilərdə böyük maraq yaradaraq dərin düşüncə və müzakirələrə yol açır.
Dünyanın müxtəlif ölkələrindən gəlmiş rəssamların iştirak etdiyi bu möhtəşəm tədbirə çox insan gəlmişdi. Əsərlərimdən birinin dünyaca məşhur bir kolleksiyaçı tərəfindən satın alınması mənim beynəlxalq səviyyədə tanınma arzumun reallaşmasına mühüm bir töhfə oldu. Parisdəki bu sərgi yalnız yeni əlaqələr qurmaq deyil, həm də yaradıcılığımda yeni istiqamətlər açmaq imkanı yaratdı.
Öyrənirik ki, gənc rəssam Fəxriyyə Əliyeva hələ kiçik yaşlarından meylini rənglərə salıb. 1999-cu ildən etibarən Respublika İncəsənət Gimnaziyasında rəssamlıq ixtisasında təhsil almağa başlayıb. 2008-ci ildə Əzim Əzimzadə adına Rəssamlıq Kollecinin Təsviri sənət fakültəsinin rəngkarlıq ixtisasına daxil olan Fəxriyyə Əliyeva 4 illik təhsildən sonra - 2012-2016-cı illərdə Azərbaycan Dövlət Rəssamlıq Akademiyasının bakalavr pilləsini bitirib. 2016-cı ildən Azərbaycan Rəssamlar İttifaqının üzvüdür. 2017-2019-cu illərdə Azərbaycan Dövlət Rəssamlıq Akademiyasının magistr pilləsini uğurla tamamlayıb.
Fəxriyyə xanım deyir ki, rəssamlıq mənim üçün peşə deyil, yaradıcılıq, həyat tərzimdir: - Mən özümü bu rənglər dünyasında tapmışam. Hər rəngin öz mənası, fəlsəfəsi var. Rənglərdən yaşılı daha çox sevirəm. Bütün əsərlərimdə özümdən asılı olmayaraq, yaşıl rəngə üstünlük verməyə çalışıram. Yaşıl mənim arzularımın, xəyallarımın rəngidir. Yaşılda bir həyat var... Yaradıcılığımda daha çox güllər, natürmort, tarixi abidələr, milli motivlər, fiqurativ və mifoloji mövzulara üstünlük verirəm. Səyahət etmək, yeni məlumatlar toplamaq isə məni ilhamlandırır... İş prosesi zamanı musiqiyə qulaq asmağı və audiokitabları dinləməyi çox sevirəm...
Bir əsər üzərində işləyərkən tam olaraq ətraf mühitlə əlaqəmi kəsib fırçamla, öz rəngarəng dünyamla baş-başa qalıram. Hərdən mənə elə gəlir ki, sənətinə pərəstiş etdiyim, sevdiyim, rəng dünyasının sirli-sehrli uzmanları - Səttar Bəhlulzadə, Rasim Babayev, Nadir Əbdürrəhimov, Klod Mone, Henri Matis, Mixail Vrubel, Gustav Klimt, Anders Zorn, Jon Singer Sargent və Giovanni Boldini kənardan məni seyr edirlər. Onların yaratdıqları sənət yadigarları mənim yaradıcılığıma dərin təsir göstərir. Onları düşündükcə yaradıcılıq həvəsim daha da artır.
Fəxriyyə Əliyeva hazırda rəssamların binasındakı fərdi emalatxanasında fəaliyyət göstərir. O deyir ki, yaradıcı insan azad olmalıdır. Şükür ki, bu imkanım var. Bu mühit yaradıcılığımı irəlilətmək üçün mənə ilham verir və yeni ideyalar inkişaf etdirməyə imkan yaradır.
Fəxriyyə Əliyeva 2003-cü ildən bir çox sərgilərdə və yaradıcılıq layihələrində uğurla iştirak edib. 2006-cı ildə 8 Mart Beynəlxalq Qadınlar Gününə həsr olunmuş sərgidə iştirak edib. 2008-ci ildə dövlət proqramı çərçivəsində "Xüsusi istedada malik olan uşaqların potensialının üzə çıxarılması üzrə" sərgidə iştirakına görə fəxri fərman alıb. 2011-2012-ci tədris ilində Azərbaycan Tələbə Gənclər Təşkilatının yaradıcılıq fəaliyyətində fərqləndiyinə görə sertifikatla təltif edilib. 2012-ci ildə Azərbaycan Rəssamlar İttifaqının Gənclər Gününə aid təşkil etdiyi sərgidə, elə həmin ildə Azərbaycan Gənclər Fondunun dəstəyi ilə təşkil olunmuş Gənclik Yaradıcılıq İnkişaf layihəsində və 2 fevral Azərbaycan Gəncləri Günü münasibətilə keçirilən inteqrativ festivalda iştirak edib. 2013-cü ildə Xocalı faciəsinə aid sərgidə, 2014-cü ildə Heydər Əliyev Fondunun təşkil etdiyi və Heydər Əliyev Mərkəzində keçirilən Mixail Lermontovun 200 illiyinə həsr olunmuş sərgidə iştirak edərək xüsusi mükafata layiq görülüb.
2016-2017-ci illərdə "25 Gallery"nin təşkil etdiyi səyyar sərgilərdə, 2021-2023-cü illərdə Rəssamlar İttifaqının və Mədəniyyət Nazirliyinin təşkil etdiyi Qarabağa aid sərgilərdə iştirak edib.
2024-cü ildə "İçərişəhər" Dövlət Tarix-Memarlıq Qoruğu İdarəsi, Azərbaycan Dövlət Rəssamlıq Akademiyası və Azərbaycan Rəssamlar İttifaqının təşkilatçılığı ilə keçirilən "İçərişəhərim" adlı rəsm müsabiqəsində onun "Şah Sarayı" adlı əsəri birinci yerə layiq görülüb.
Fəxriyyə xanım deyir ki, yaradıcılığında Qarabağ mövzusu xüsusi yer tutur:
- Bir zamanlar Qarabağ mövzusuna dərdlərimizi ifadə etmək üçün müraciət edirdiksə, indi Qarabağ qürur yerimizin ünvanıdır. Əsgərlərimizin göstərdiyi qəhrəmanlıqlar sənət nümunələri yaratmaq üçün üzümüzə geniş imkanlar açıb.
Qəhrəman döyüşçülərimizin rəsmini çəkərkən nə qədər qürur yaşayıramsa, şəhidlərimizin portretlərini yaradanda gərginlik keçirirəm. Çalışıram ki, öz əsərlərimdə onların qələbəyə olan böyük inamlarını, bitib-tükənməyən vətən sevgilərini verə bilim.
Fəxriyyə xanım söyləyir ki, rəssamlıq arzunu, xəyalı rənglərlə canlandırmaq deməkdir: "Beynəlxalq sərgilərdə iştirak etmək, fərdi sərgilər təşkil etmək və yaradıcılığımı daha inkişaf etdirmək niyyətindəyəm. Hələ yolun başlanğıcındayam. Çalışacağam ki, bu rəngarəng, çoxçalarlı dünyada rəssam kimi iz qoya bilim. Bu da mənim arzumdur".
Elşən QƏNİYEV,
İlham BABAYEV (foto),
"Azərbaycan"
