“Rusiya təmaslardan imtina etmir və istənilən məsələdə, o cümlədən Ukrayna məsələsi üzrə danışıqlara həmişə açıqdır”.
AZƏRTAC xəbər verir ki, bu sözləri Rusiya Prezidenti Vladimir Putin dünyanın aparıcı informasiya agentliklərinin rəhbərləri ilə görüşü zamanı almaniyalı jurnalistin sualını cavablandırarkən deyib.
Rusiya dövlət başçısı qeyd edib ki, iki il əvvəl Almaniya Kansleri Olaf Şolts və digər Avropa liderləri ilə fəal müntəzəm danışıqlar aparılırdı. Putin bildirib ki, bu təmaslar elə Qərb tərəfdaşlarının təşəbbüsü ilə dayandırılıb. “Onlar özləri bu əlaqələrə son qoyublar. Buyursunlar, bərpa etsinlər. Biz açığıq, bunu dəfələrlə demişəm”, – deyə Putin vurğulayıb.
Bununla yanaşı o, Almaniyanın Rusiya ilə Ukrayna arasında vasitəçi rolunu oynamaq qabiliyyətinə şübhə ilə yanaşdığını bildirib. “Vasitəçi neytral mövqedə olmalıdır. Amma biz döyüş meydanında alman tanklarını, “leopard”ları görəndə, üstəlik, Federativ Respublika artıq Rusiya ərazisinə hücumlar üçün “Taurus” raketlərinin tədarükünü nəzərdən keçirdiyi və buna Bundesver zabitlərinin də cəlb olunduğu bir vaxtda böyük suallar yaranır", – deyə o qeyd edib.
Putin əlavə edib ki, bu addımlar hərbi əməliyyatların gedişinə təsir göstərməyəcək, lakin “münasibətlərimizi tamamilə korlayacaq”. Onun sözlərinə görə, mövcud şəraitdə Almaniya Rusiya tərəfindən neytral tərəf kimi deyil, Ukraynanı dəstəkləyən, bəzən isə döyüşlərdə birbaşa iştirak edən tərəf kimi qəbul olunur.
Bununla belə, Rusiya istənilən təklifi müzakirə etməyə hazırdır: “Əgər bu mövzu ətrafında danışmaq istəyi varsa, hansısa ideyalar təqdim etməyə hər zaman hazırıq”, – deyə o yekunlaşdırıb.
Qeyd edək ki, Prezident Vladimir Putin Sankt-Peterburqda dünyanın aparıcı informasiya agentliklərinin rəhbərləri ilə ənənəvi görüş keçirir. Görüşdə Azərbaycan, Belarus, Böyük Britaniya, Vyetnam, Almaniya, İndoneziya, İspaniya, Qazaxıstan, Çin, ABŞ, Türkiyə, Özbəkistan və Fransadan olan agentliklərin nümayəndələri iştirak edirlər. Tədbirin moderatoru TASS agentliyinin baş direktorunun birinci müavini Mixail Qusmandır.
jpg_1750284293.jpg)
jpg_1765830577.jpg)
jpg_1765830356.jpg)
