Görüşdə AMEA-nın müxbir üzvü, Müasir Azərbaycan Psixoloqları Cəmiyyətinin İdarə Heyətinin sədri, Milli Məclisin deputatı, professor Bəxtiyar Əliyev, Psixologiya Elmi Tədqiqat İnstitutunun sədri, f.ü.f.d. Elnur Rüstəmov və institutun əməkdaşları iştirak ediblər.
Əvvəlcə şəhidlərimizin əziz xatirəsi bir dəqiqəlik sükutla yad edilib.
Daha sonra professor Bəxtiyar Əliyev 20 Yanvar faciəsinin tarixi, siyasi və mənəvi əhəmiyyəti barədə geniş məruzə ilə çıxış edib. O bildirib ki, 36 il əvvəl baş verən bu qanlı hadisələr Azərbaycan xalqının mərdliyini, əyilməzliyini və azadlıq iradəsini bütün dünyaya nümayiş etdirdi. Sovet ordusunun ağır texnika və silahlarla dinc əhaliyə qarşı törətdiyi qırğınlara baxmayaraq, xalqımız müstəqillik ideyasından geri çəkilmədi və bu yol uğrunda canından keçməyə hazır olan yüzlərlə qəhrəman yetişdirdi.
Professor qeyd edib ki, 20 Yanvar faciəsi yalnız dərin hüzn günü deyil, eyni zamanda milli oyanışın, azadlıq və suverenlik mübarizəsinin dönüş nöqtəsidir. O vurğulayıb ki, müstəqillik əldə edildikdən sonra da Azərbaycan dövləti ciddi siyasi və hərbi təzyiqlərlə üz-üzə qalmışdı. Məhz Ulu Öndər Heydər Əliyevin hakimiyyətə qayıdışı ilə ölkədə siyasi sabitlik təmin olundu, hüquqi dövlət quruculuğuna və güclü milli ordu formalaşdırılmasına başlanıldı.
Bəxtiyar Əliyev çıxışında xüsusi vurğulayıb ki, Cənab Prezident İlham Əliyevin uğurlu, qətiyyətli və uzaqgörən siyasəti nəticəsində Azərbaycan dövləti öz suverenliyini tam bərpa edib, milli maraqlarını beynəlxalq müstəvidə inamla müdafiə edən güclü siyasi subyektə çevrilib. O bildirib ki, Prezident İlham Əliyevin liderliyi ilə həyata keçirilən strateji qərarlar Azərbaycanın hərbi, iqtisadi və diplomatik gücünü daha da möhkəmləndirib, xalqımızın tarixi ədaləti bərpa etməsinə şərait yaradıb. Professor qeyd edib ki, bu gün Azərbaycan siyasi iradəsi, milli birliyi və qüdrətli ordusu ilə dünyaya öz sözünü deyən qalib dövlətdir.
Daha sonra Psixologiya Elmi Tədqiqat İnstitutunun sədri, f.ü.f.d. Elnur Rüstəmov çıxış edərək 20 Yanvar hadisələrinin psixoloji və mənəvi aspektlərinə toxunub. O bildirib ki, bu faciə xalqımızın kollektiv yaddaşında dərin izlər buraxmaqla yanaşı, milli kimliyin formalaşmasında, vətənpərvərlik ruhunun güclənməsində mühüm rol oynayıb. Elnur Rüstəmov vurğulayıb ki, şəhidlik anlayışı Azərbaycan cəmiyyətində yalnız itki deyil, eyni zamanda mənəvi güc, milli qürur və tarixi məsuliyyət simvoludur.
İnstitut sədri qeyd edib ki, belə faciələrin xatırlanması və düzgün şəkildə dəyərləndirilməsi cəmiyyətin mənəvi sağlamlığının qorunması, gənc nəsildə sağlam milli şüurun formalaşdırılması baxımından xüsusi əhəmiyyət daşıyır.
Görüş zamanı institutun əməkdaşları da çıxış edərək 20 Yanvar şəhidlərinin xatirəsinin əbədiləşdirilməsinin, bu faciənin gənc nəsillərə düzgün və obyektiv şəkildə çatdırılmasının vacibliyini bildiriblər. Onlar qeyd ediblər ki, bu kimi anım tədbirləri milli yaddaşın qorunmasına, cəmiyyətimizdə birlik və həmrəyliyin daha da möhkəmlənməsinə xidmət edir.
Şəhidlərimizin xatirəsinin hər zaman qürur və ehtiramla anılması, şərəfli tariximizin unudulmaması hər bir Azərbaycan vətəndaşının mənəvi borcudur.
Allah şəhidlərimizə rəhmət eləsin!
