Ermənistanın baş naziri Nikol Paşinyanın Avropa Siyasi Birliyinin 6-cı Zirvə toplantısı çərçivəsində azərbaycanlı jurnalistin sualına verdiyi cavablar onun sülhlə bağlı fikirlərində səmimi olmadığını bir daha göstərdi. Bu ölkənin rəsmi şəxsləri tərəfindən tez-tez sülhlə bağlı ümidverici çıxışlar eşidilsə də, bütün bunların manipulyasiyadan başqa bir şey olmadığı açıq-aydın ortadadır.
Milli Məclisin deputatı Sahib Alıyev qəzetimizə açıqlamasında bildirib ki, Nikol Paşinyanın İctimai TV-yə açıqlaması zamanı onun hərəkətlərində, dediklərində nə isə yeni bir şey müşahidə etmədik. Onun səsinin tonunun bütövlükdə mülayim xarakter daşımasına baxmayaraq, burada konstruktivlikdən danışmaq qətiyyən mümkün deyil: "Biz yenə Ermənistan baş nazirinin səmimiyyətdən uzaq, sülh gündəliyindən çıxış etsə də, sülhə xidmət etməyən yanaşmasını gördük. Baş nazir gözəl bilir və dərk edir ki, konstitusiyalarına dəyişiklik etmədikcə, orada Azərbaycan torpaqlarının bir hissəsinin Ermənistanın tərkib hissəsi kimi təsbitini aradan qaldırmayınca və Minsk qrupunun buraxılması ilə bağlı Azərbaycanla birgə addım atmayınca arzuladıqları sülh müqaviləsi mümkün deyil. Sülh sazişi isə indiki vaxtda Paşinyana hava və su kimi lazımdır. Çünki onun hakimiyyətdə qalmasını təmin edəcək ən güclü arqument Azərbaycanla sülh anlaşması ola bilər. Əks təqdirdə aparılan sosioloji sorğular da göstərir ki, Paşinyan seçkini uduzacaq. Ermənistandakı quzğunların hədələrindən, terror ənənəsi olanların dediklərindən belə bəlli olur ki, Paşinyanın seçkidə məğlub olması həmçinin həyatını itirməsi anlamını daşıyır. Ona görə yaxşı olar ki, Ermənistan baş naziri belə sadə, fırıldaqçı yanaşmalardansa, dəqiq addımlar atsın və Prezident İlham Əliyevin əvvəlki xəbərdarlıqlarından düzgün nəticə çıxarsın".
Deputat qeyd edib ki, Prezident İlham Əliyev dəfələrlə xəbərdarlıq edib, Paşinyanı sülh sazişi imzalamağa çağırıb. Əgər o müqavilə imzalansaydı, Ermənistanın baş naziri indiki vəziyyətlə üzləşməyəcəkdi. Hələ vaxt var. O, düzgün nəticə çıxarmalı və verilən vaxtdan özü və ölkəsi üçün də doğru istifadə etməlidir.
S.Alıyev sonda vurğulayıb ki, Azərbaycanın Ermənistanla sülh müqaviləsi imzalaması deyilən tələblərin yerinə yetirilməsindən keçir.
Əsmər QARDAŞXANOVA,
"Azərbaycan"
jpg_1779707872.jpg)
