Oğul belə olar

Azərbaycan torpaqlarının 30 illik erməni işğalından azad edilməsi uğrunda gedən döyüşlərin iştirakçılarından biri də Şəmkir rayon Təzəkənd kəndinin yetirməsi Kamal Füzuli oğlu Süleymanovdur. O, 2002-ci il iyunun 18-də anadan olub. Orta təhsilini kənddəki Səməd Vurğun adına Təzəkənd orta məktəbində alıb. Həmyaşıdları kimi o da ermənilərin ölkəmizlə həmsərhəd kəndlərində, habelə Qarabağda törətdikləri vandallıqlardan çox narahat olurdu. Hələ məktəbdə oxuduğu zaman həmyaşıdları arasında bu barədə söhbət düşəndə "Vətən mənə oğul desə, nə dərdim", gedib ermənilərlə üzbəüz döyüşərdim, elədikləri vəhşiliklərin cavabını verərdim... özümü bir az rahat hiss edərdim" deyərdi.   

Kamal 2020-ci il iyulun əvvəllərində Vətənə borcunu yerinə yetirmək üçün Milli Ordu sıralarına çağrılanda çox sevindi. 2020-ci ilin sentyabrında ölkəmizin ərazi bütövlüyü uğrunda Ermənistan işğalçı qüvvələrinə qarşı Vətən müharibəsi başlayanda Kamal dörd ay idi Beyləqan istiqamətindəki "N" saylı hərbi hissədə xidmət edirdi. O,  çoxdan bəri ürəyində gəzdirdiyi - erməni quldurlarından qisas almaq məqamının yetişdiyinə sevindi. Dərhal bölük komandirinə yaxınlaşıb "Komandir, döyüş bölgəsinə - ön cəbhəyə göndərilmək üçün seçim olsa, birinci məni nəzərdə tutun" deyib özünü ermənilərlə üzbəüz döyüşdə görmək istədiyini bildirdi...

Kamalın bu istəyi özündən xəbərsiz gündəmə gəldi. Artıq iki gündən sonra o, Xocavənd rayonunun Domi kəndində əsgər yoldaşları ilə hücum əmrini gözləyirdi.

Domidən başlayan döyüş yolu Dağdöşü, Qoçbəyli, Bulutan, Kiş, Köhnə Tağlar, Qarqar, Ağcakənd, Quşçular, nəhayət, Tuğ kəndindən keçmişdir. Bu kəndlərin işğaldan azad edilməsi uğrunda gedən döyüşlərdə onun igidlik göstərdiyi anlar çoxdur. Ancaq Kamal bu şücaətlərin hər birində bölük yoldaşlarının əvəzsiz xidməti olduğunu bildirir və heç vaxt unuda bilmədiyi bir epizodu dilə gətirərək deyirdi: "Gecə yarıdan sonra Xırmançay yaxınlığında beş nəfərlə erməni tərəfə kəşfiyyata getmişdik. Bizdən sağda, xeyli aralıda mina partlayışı nəticəsində qonşu alaydan olan Azərbaycan əsgərlərinin itki verdiyini hiss etdik, nəticədə erməni quldurlarının mühasirəsinə düşdük. İki gün ermənilərdən xəbərsiz onlarla eyni dərəni bölüşdük. Komandirin tapşırığına əsasən, yolumuzun üstündə keşikdə olan erməni quldurunu çətinliklə də olsa, səsi çıxmadan məhv etdik. Beləliklə, mən və yoldaşlarım komandir Adil Bəşirovun səyi nəticəsində mühasirədən itkisiz çıxa bildik". 

Xocavənd erməni işğalçılarından azad edildikdən sonra komandanlığın əmri ilə Kamalın üzv olduğu alay Ağdama doğru istiqamət götürür. 1993-cü il iyunun 23-dən 85 faizi ermənilər tərəfindən işğal olunun rayonun ətraf ərazilərində mövqe tuturlar. Kamal Süleymanov kəşfiyyat tapşırıqlarını yerinə yetirmək üçün dəfələrlə Sarıcalı və Gülablı kəndlərinin ətrafındakı erməni səngərlərinə tək gedib, amma əli-qolu bağlı terrorçu erməni silahlısı ilə cüt qayıdır. O, Silahlı Qüvvələrin  Ali Baş Komandanı tərəfindən Azərbaycan əsgərinin qarşısına qoyulan məqsədə nail olmaq üçün neçə-neçə döyüş və kəşfiyyat əməliyyatlarının əsas iştirakçılarından olur. Kamalın çevikliyinin, bəlkə də Tanrının qismətidir ki, onun və əsgər yoldaşlarının kəşfiyyat, həmçinin döyüş əməliyyatları həmişə uğurla nəticələnirdi.

Kamal qürur hissi ilə bildirir ki, 44 günlük müharibə dövründə onun  bölüyündən ölüm-itim olmayıb. "Əlbəttə, yaralanan, xəstəxanaya düşənlər var idi, elə məqamlar olurdu ki, yaralı əsgər yoldaşımı kilometrlərlə çiynimdə özümlə aparırdım. Bölüyümüzdən olan yaralıların köməksiz qalmasına, əsir düşməsinə imkan vermədik..."   

Bütün bu şücaətlər, genişliyi ilə bələd olmadıqları dağ və ərazilərdə terrorçu  erməni qoşun birləşmələri üzərində qazanılan hər qələbə Kamalın və onun döyüş yoldaşlarının vətənə olan sevgisi sayəsində başa gəlirdi. Silaha sarılan igidlərimizin bir məqsədi var idi: ancaq irəli getmək, təpədən-dırnağadək silahlanmış terrorçu erməni silahlılarını torpaqlarımızdan qovmaq, Qarabağı işğalçılardan azad etmək. Sıravi əsgər Kamal Süleymanov bu sıradan olan hərbi tapşırıqları ləyaqətlə yerinə yetirdiyinə görə qulluq etdiyi  hərbi hissənin rəhbərliyi tərəfindən dəfələrlə təşəkkür və fəxri fərmanlara layiq görülüb. Xocavənd rayonunun işğaldan azad edilməsi uğrunda aparılmış döyüş əməliyyatlarında şəxsi igidlik və şücaət nümayiş etdirdiyinə görə Silahlı Qüvvələrin Ali Baş Komandanı İlham Əliyevin 25 dekabr 2020-ci il tarixli sərəncamı ilə "Xocavəndin azad olunmasına görə" medalı ilə, habelə Ali Baş Komandanın 29 dekabr 2020-ci il tarixli sərəncamı ilə "Ağdamın azad olumasına görə" medalı ilə təltif edilmişdir.

Kamal Süleymanov o günlərdə yaşadığı duyğu dolu anları əsgər yoldaşları,  dostları və ailə üzvləri ilə bölüşəndə Zəfərə gedən yolun iştirakçısı və Müzəffər Azərbaycan Ordusunun sıralarında olması ilə fəxr edir. Döyüş yoldaşlarını, torpaqlarımız uğrunda canından keçən şəhidlərin igidliyini fəxarətlə anır. Onların vətənpərvərliyi haqqında qürurla danışır.

Vətən müharibəsi iştirakçısı Kamal Süleymanovla söhbətimizdən o da aydın oldu ki, Böyük Qələbə xəbərinin sevincini hər biri fərqli, amma oxşar duyğular içərisində dadıblar. Kamal Qələbə xəbərini döyüşə hazırlaşdıqları məqamda aldıqlarını deyir: "Noyabrın 9-u gecə döyüş hazırlığı aparılırdı, xəbər gəldi ki, düşmən təslim oldu".

Bu təslimiyyət uğurlu və qətiyyətli siyasətin, rəşadətli ordunun, yumruq kimi birləşmiş xalqın ümumi qələbəsi idi. Artıq bütün dünya, nəhayət, nankor ermənilər də dərk etdilər ki, Qarabağ Azərbaycandır! 

Qalib ordunun qalib əsgəri kimi geri dönəndə Kamal Süleymanovun vətənpərvərliyinə, müharibədə  göstərdiyi şücaətə görə doğmaları, onu yaxından tanıyanlar qürur hissi ilə deyirdilər: "Oğul belə olar! Allah saxlasın!"

Müzəffər Ali Baş Komandan İlham Əliyevin tapşırıq və tövsiyələrinə görə, digər  Vətən müharibəsi iştirakçıları ilə yanaşı, Kamal Süleymanova da  Şəmkir Rayon İcra Hakimiyyəti, habelə rayon hərbi komissarlığı tərəfindən lazımi diqqət və qayğı göstərilir. Müharibədən qələbə ilə qayıdan Kamal üç il bundan öncə həmkəndlisi Mirvari xanımla ailə qurub, Ağa adlı oğul atasıdır.

Rəhman SALMANLI,

"Azərbaycan"