Musaküçə Masallının mərkəzə yaxın yerləşən qədim tarixi və ənənələri olan kəndlərindəndir. Kəndimiz Viləş çayının sahilində yerləşir. Camaatımız həsirçiliklə qədim zamanlardan məşğuldur. Burada elə ailələr var ki, öz halal çörəyini həsirçiliklə təmin edirlər.
Məlumdur ki, respublikamızın cənub zonasında qədim el sənətlərini, o cümlədən həsirtoxumanı yaşadan kəndlər az deyil. Bu da zonanın rütubətli olması, burada həsirçiliyin xammalı hesab edilən qamış, dala, çətən kimi təbii materialların bolluğu, həsir məmulatlarına tələbatla bağlıdır. Qamış, dala, çətən payızda biçilir, qurudulur, həmin bitkilərin uzun, ensiz yarpaqlarından xüsusi formaya malik olan kəndir hörülür. Həsir ustaları bu kəndirlərdən öz həyətlərində qurduqları dəzgahlarda xüsusi zövq və bacarıqla xalça-palazın altından döşəməyə salınan həsirlər, müxtəlif ölçudə və formada zənbillər, səbətlər, çantalar, şlyapalar və başqa məmulatlar toxuyurlar. Sonra həsir məmulatları Bakı kəndlərinə, ölkəmizin ayrı-ayrı rayonlarına, cənub zonasının bazarlarına göndərilir.
Həsir ilboyu toxunur. Onu əvvəllər ailədə hər kəs toxuyurdusa, indi bu işlə daha çox qadınlar məşğul olurlar. Musaküçə kəndində həsir toxuyan qadınlar mərkəz yaradaraq kollektiv şəkildə fəaliyyət göstərirlər. Həmin qadınlar "Rooted Hands" layihəsinin iştirakçılarıdır. Təqribən 2 ay əvvəl Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva Masallıya səfəri çərçivəsində bizim Musaküçəyə də gəlmiş, həsir toxuyan qadınlarla görüşmüşdür. Leyla xanım "Rooted Hands" layihəsinin iştirakçıları ilə söhbət etmiş, onların əl işləri və yaradıcılıq fəaliyyətləri ilə tanış olmuş, onlarla birlikdə həsir toxumuşdur. Görüşdə layihədən bəhs edən film nümayiş olunmuşdur. Leyla xanımın dəstəyi ilə bu işlə məşğul olan qadınlar üçün yenilənmiş məkan yaradılmışdır.
Məlumat üçün bildirim ki, "Rooted Hands" layihəsi 2025-ci ildə Milan Moda Həftəsində dayanıqlı moda işləri çərçivəsində təqdim olunaraq Azərbaycanın bataqlıq ərazilərindən toplanan təbii materialların, qadın sənətkarların əl əməyinin, müasir dizaynın və ənənəvi sənətkarlığın uğurlu vəhdətini nümayiş etdirir. Leyla xanımın bu sahəyə dəstəyi mərkəzin maliyyə imkanlarının artmasına imkan yaradır, qədim el sənətinin daha da inkişafına, beynəlxalq miqyasda tanıdılmasına xidmət edir.
Əlihüseyn ŞÜKÜROV,
Masallı şəhər sakini
314444444 - Copyjpg_1793831795.jpg)
jpg_1793052405.jpg)
