Bakı Beynəlxalq Multikulturalizm Mərkəzində (BBMM) bu qurumun Himayəçilik Şurasının sədri, Azərbaycan Dillər Universitetinin rektoru, Xalq yazıçısı, akademik Kamal Abdulla ilə görüş keçirilib.
AZƏRTAC xəbər verir ki, görüşdə çıxış edən BBMM-in icraçı direktoru Rəvan Həsənov akademik Kamal Abdullanın multikulturalizm ideyalarının inkişafına verdiyi töhfələrin, onun zəngin elmi irsinin milli-mədəni dəyərlərin təbliğində və ölkəmizin elmi-mədəni həyatında xüsusi yer tutduğunu söyləyib. Qeyd edib ki, onun ensiklopedik biliyi, yüksək idarəçilik keyfiyyətləri, milli-mənəvi dəyərlərə bağlılığı və gənc nəslə göstərdiyi qayğı hər birimiz üçün örnəkdir. İcraçı direktor diqqətə çatdırıb ki, BBMM-in fəaliyyətində akademik Kamal Abdullanın rəhbərliyi ilə həyata keçirilən layihələr ölkəmizin dünyaya tolerantlıq məkanı kimi təqdim edilməsində mühüm rol oynayır.
Tədbirdə digər çıxış edənlər vurğulayıblar ki, akademik Kamal Abdulla yalnız Azərbaycan elminə və ədəbiyyatına mühüm töhfələr vermiş görkəmli ziyalı deyil, həm də ölkəmizdə multikultural dəyərlərin möhkəmləndirilməsi və beynəlxalq aləmdə təbliği istiqamətində misilsiz xidmətləri olan şəxsiyyətdir. O, geniş dünyagörüşü, dərin elmi biliyi, milli və mənəvi dəyərlərə bağlılığı ilə Azərbaycan cəmiyyətində və multikultural mühitin inkişafında mühüm rol oynayır. Görkəmli alimin yaradıcılığı və ictimai fəaliyyəti gələcək nəsillər üçün örnəkdir.
Səmimi görüş üçün təşəkkürünü bildirən akademik Kamal Abdulla deyib: “Mənim üçün bu yubiley yalnız şəxsi bir tarix deyil, bütün ömrüm boyu xidmət etməyə çalışdığım milli-mənəvi dəyərlərə, Azərbaycan elminə, ədəbiyyatına, multikultural mühitin inkişafına verilən qiymətin təzahürüdür. Bu gün haqqımda söylənilən dəyərli fikirlər, göstərilən hörmət və etimad böyük məsuliyyətdir”.
jpg_1772528933.jpg)
19 (1)jpg_1771885865.jpg)
