Yanvarın 29-da yerli özünüidarəetmə orqanlarına seçkilər keçirildi. Səsvermənin şəffaflığını təmin etmək üçün öncədən geniş hazırlıq işləri aparıldı. Seçki gününədək məntəqələrə 6 milyon 52 min 721 seçki bülleteni paylandı. Məntəqələr zəruri avadanlıqlarla təmin edildi. Beləliklə bələdiyyə seçkilərində səsvermə hüququ olan hər bir seçicinin rahat şəkildə azad və sərbəst səs vermələri üçün lazımi şərait yaradıldı.
Məzahir Pənahovun sədrliyi ilə fevralın 14-də keçirilən Mərkəzi Seçki Komissiyasının (MSK) iclasında bələdiyyə seçkilərinin ümumi yekunlarına dair məsələlərə baxıldı. Media nümayəndələrinin və digər maraqlı subyektlərin iştirak etdikləri iclasda seçkilərin yüksək səviyyədə keçdiyi qeyd olundu. Bütün seçki kampaniyası ərzində proseslərin başlıca mərhələlərinin və digər zəruri tədbirlərin qanunvericiliyin tələblərinə uyğun, vaxtında və keyfiyyətlə reallaşdırıldığı bildirildi.
Qeyd olundu ki, ötən il ölkədə keçirilən iki mühüm seçki zamanı ard-arda silsilə maarifləndirmə layihələri olsa da, spesifik xarakteristikasından irəli gələrək bələdiyyə seçkilərində də MSK-nın proqramına uyğun olaraq, əlaqədar qurumlarla sıx əməkdaşlıq şəraitində müxtəlif statuslu seçki subyektləri üçün fərqli istiqamətlər üzrə çoxsaylı maarifləndirmə layihələri reallaşdırılmışdır.
Bələdiyyə seçkilərində 125 seçki dairəsinin 118-də 5846 seçki məntəqəsi üzrə keçirildiyi, ölkədəki 685 bələdiyyəni əhatə edən seçkilərdə 8071 bələdiyyə üzvlüyü uğrunda 16092 namizədin mübarizə apardığı diqqətə çatdırıldı. MSK siyasi partiyaların budəfəki bələdiyyə seçkilərində xüsusi fəallıq nümayiş etdirməsini və 23 siyasi partiyanın öz namizədləri ilə seçkilərdə iştirakını bələdiyyə seçkilərinə geniş ictimai-siyasi marağın göstəricisi kimi qeyd etdi.
MSK-nın iclasında həmçinin seçkiqabağı təşviqat kampaniyası dövründə bütün namizədlərə bərabər şərait və eyni imkanlar yaradıldığı vurğulandı. Diqqətə çatdırıldı ki, Seçki Məcəlləsinin tələbləri əsas götürülməklə bütün ölkə ərazisində 3730-u açıq və 2182-si qapalı olmaqla ümumilikdə 5912 yer ayrılaraq namizədlərin ixtiyarına verilmiş və onlar sadəcə dairə seçki komissiyalarını məlumatlandırmaqla həmin yerlərdən də ödənişsiz istifadə edərək öz seçiciləri ilə sərbəst şəkildə görüşlərini keçirmişlər.
Bələdiyyə seçkilərində akkreditasiyadan keçən 70625 müşahidəçinin 26260-ı 24 siyasi partiyanı təmsil etmişdir. Bu da siyasi partiyaların seçkilərə olan yüksək marağının daha bir göstəricisi idi.
İclasda seçki günü ölkə üzrə seçicilərin 31,42 faizinin səsvermədə iştirak etdiyi qeyd olundu. Bildirildi ki, səsvermə başa çatdıqdan bir neçə saat sonra, elə həmin gün seçki keçirilən bələdiyyələrin 96,35 faizini əhatə edən məlumatlar əsasında ilkin nəticələr ictimaiyyətin diqqətinə çatdırılmışdır. İclasda həmçinin səsvermə günü MSK və ya aşağı seçki komissiyalarına hər hansı qanun pozuntusu barədə heç bir şikayət və ya müraciət daxil olmadığı açıqlandı. O da qeyd olundu ki, MSK-nın müvafiq qərarları ilə ümumilikdə 6 seçki məntəqəsi üzrə səsvermənin nəticələri və 1 bələdiyyəyə seçkilər etibarsız hesab edilmişdir. Bələdiyyə üzvü seçilənlərdən biri sonradan vəfat etdiyi üçün isə 1 bələdiyyə tam tərkibdə formalaşmamışdır.
MSK-nın yekdilliklə qəbul etdiyi qərara əsasən, Azərbaycan Respublikası Konstitusiyasına, Seçki Məcəlləsinə və digər qanunvericilik aktlarına uyğun keçirilməklə baş tutan bələdiyyə seçkilərində ümumilikdə 27 seçki məntəqəsi üzrə səsvermənin nəticələrinin və 3 bələdiyyə üzrə seçkilərin etibarsız sayılması nəzərə alınmaqla 8039 nəfər bələdiyyə üzvü seçilmiş, 1 bələdiyyə tam olmayan və 681 bələdiyyə isə tam tərkibdə formalaşmışdır.
Zöhrə FƏRƏCOVA,
"Azərbaycan"
19 (1)jpg_1771885865.jpg)
