İsrail Prezidenti İshaq Hersoq "Ynet" və "Yediot Ahronot" nəşrlərinin ictimai konfransının açılışında çıxış edərək İsrail cəmiyyətinin üzləşdiyi əsas problemlərə, o cümlədən Yəhudeya və Samariyada siyasi sabitlik, cinayətkarlığın səviyyəsi və təhlükəsizlik məsələlərinə toxunub.
Dövlət başçısının dediyinə görə, ölkə rəhbərlik və vətəndaşlardan balanslı qərarlar tələb edən kritik bir mərhələdədir. Qarşıdan gələn seçkilərlə bağlı şərh verən İ.Hersoq uzun sürən siyasi böhranın qəbuledilməzliyini vurğulayıb.
"Ynet"-in məlumatına əsasən, Prezident təkrar seçki dövrünün qarşısını almaq üçün mümkün olanları etmək niyyətindədir. "İsraildə sabit bir hökumətin qurulması və təkrar seçkilərin olmaması üçün hər şeyi edirəm", - deyə o bildirib. Siyasətçi vətəndaşların məsuliyyət nümayiş etdirəcəyinə və seçki nəticələrinin bütün tərəflərin qəbul edəcəyinə əminliyini də ifadə edib. Prezident həmçinin təhlükəsizlik və asayiş məsələsinə xüsusi diqqət yetirib.
O, ərəb sektorunda geniş yayılmış cinayətkarlığı fəlakət adlandırıb və mövcud hüquq-mühafizə orqanlarının resurslarının çatışmazlığını qeyd edib. Lakin Yəhudeya və Samariyada vəziyyətin onu ən çox narahat etdiyini söyləyib. "Yəhudeya və Samariyada baş verən zorakılıq məni gecələr oyaq saxlayır. Bu, ölkənin nüfuzuna böyük bir ləkədir, mənəvi ləkədir", - deyən İ.Hersoq vurğulayıb ki, bəzi hallarda inzibati həbslər daha fəal tətbiq olunmalıdır.
Baş nazir Benyamin Netanyahunun məhkəməsinə toxunan Prezident tez bir zamanda nəticəyə gəlməyin vacibliyini bildirib. Onun fikrincə, optimal nəticə ictimai gərginliyin azaldılmasına kömək edəcək təqsirin etiraf edilməsi olardı.
İ.Herzoq həmçinin 7 oktyabr faciəsinin bütün hallarının dövlət istintaq komissiyası tərəfindən hərtərəfli araşdırılmasını tələb edib. Komissiyanın tərkibi seçki prosesi başa çatdıqdan sonra müəyyən olunmalıdır. Xatırladaq ki, İsraildə parlament seçkiləri bu ayın 27-də keçiriləcək.
Rizvan CƏFƏROV
