Aprel döyüşlərinə həsr olunmuş "Qələbəni qanı ilə yazanlar" adlı çox maraqlı və məzmunlu bir tədbirə dəvət olunmuşduq. 

Çıxışlar başa çatandan sonra bədii hissə başladı. Musiqiçilər vətənpərvərliyi, qəhrəmanlığı tərənnüm edən mahnılar oxudular. Bu mahnılar ovqatımıza ovqat qatdı, bulaq suyu kimi ürəyimizə, qəlbimizə axdı. Mahnılar bitən kimi şagirdlər mövzuya uyğun olan ədəbi-bədii kompazisiya nümayiş etdirdilər. Məktəblilərin çıxışı maraqla qarşılandı. Sonra şeir söyləmək üçün hərbi forma geyinmiş balaca bir uşaq səhnəyə dəvət edildi. Yerişindən, duruşundan, geyimindən ona "balaca əsgər" də demək olardı. İti addımlarla səhnəyə çıxan uşaq mikrofona yaxınlaşıb şeir deməyə başladı. Onun şeir söyləmək bacarığı, intonasiyası bir an içində tədbir iştirakçılarını heyran etdi. Tədbirdə ən çox alqışlanan da elə "balaca əsgər" oldu.
Tədbir başa çatandan sonra onunla söhbət edib, yaxından tanış olduq. Öyrəndik ki, adı Rahil, soyadı da Məmmədzadədir. 7 yaşı olan "balaca əsgər" tədbirlərdə tez-tez iştirak edir. Vətənə, qəhrəmanlığa həsr olunmuş şeirlər söyləyir. Deyir ki, məktəbə gedəndə dərslərimi yaxşı oxuyacam, şeir yazacam, əsgər olacam.
"Balaca əsgər" tədbirə anası Reyhan Məmmədova ilə gəlmişdi. Reyhan xanım dedi ki, Rahil poeziyaya xüsusi həvəs göstərir. Beş yaşından onda bu sahəyə maraq yaranıb. Bir gün Rahil atasına dedi ki, mənə əsgər paltarı alın. Emin də  onun arzusunu yerinə yetirdi. İndi oğlum hərbi formanı böyük həvəslə əyninə geyinərək tədbirlərə gedir.
Söhbətimiz başa çatandan sonra Rahil tədbir iştirakçıları ilə şəkil çəkdirdi. "Balaca əsgər"in söz-söhbəti hamıya xoş gəldi. Yaşından irəli söylədiyi fikirlərə əsaslanıb demək olar ki, indidən əyninə əsgər forması geyinmiş Rahil gələcəkdə qoynunda doğulduğu doğma ölkəsinə layiqli vətəndaş olacaq.  

Vahid MƏHƏRRƏMOV,
"Azərbaycan"