İyunun 24-də Dövlət İmtahan Mərkəzi (DİM) və Dövlət Qulluğu üzrə Astana Regional Xabın birgə təşkilatçılığı ilə Bakı şəhərində “Dövlət qulluğunda səriştə əsaslı seçim və fəaliyyətin qiymətləndirilməsi” mövzusunda beynəlxalq seminar keçirilib.

AZƏRTAC xəbər verir ki, tədbirdə Azərbaycan, Türkiyə, Bosniya və Herseqovina, Şimali Makedoniya, Gürcüstan, Qazaxıstan, Qırğızıstan, Özbəkistan və Tacikistanın dövlət qulluğu orqanlarının rəhbər şəxsləri, dövlət sektorunda insan resurslarının idarə edilməsi siyasətinin formalaşdırılması və həyata keçirilməsinə cavabdeh olan rəsmi qurumların nümayəndələri, Dövlət İdarəçilik akademiyalarının rektorları iştirak ediblər.

Seminarın məqsədi dövlət qulluğunda səriştə əsaslı seçim və qiymətləndirmə sahəsində qabaqcıl təcrübəni bölüşmək, bu sahədə əldə edilmiş bilikləri paylaşmaq, eyni zamanda, ölkələrin dövlət qulluğu üzrə rəhbər şəxsləri və mütəxəssisləri arasında dövlət qulluqçularının inkişafına dair müasir təcrübələr üzərindən müzakirələr aparmaqdır. Səriştə modelinə keçid dövlət qulluğuna daha peşəkar, bacarıqlı, şəxsi keyfiyyətləri yüksək olan dövlət qulluqçularının cəlb olunmasını təmin edir. Bu da nəticədə dövlət qulluğunun səmərəliliyini və vətəndaşlara dövlət adından göstərilən xidmətlərin şəffaflığını və effektivliyini təmin edir.

DİM-in Direktorlar Şurasının sədri Məleykə Abbaszadə belə tədbirlərin digər ölkələr ilə mövcud sistemlərimizi müqayisə etməyə, onların mənfi və müsbət tərəflərini təhlil edərək inkişaf perspektivlərini müəyyənləşdirməyə imkan verdiyini söyləyib.

Daha sonra Dövlət Qulluğu üzrə Astana Regional Xabın Rəhbər Komitəsinin sədri Alixan Baimenov və Qazaxıstan Respublikasının Dövlət Qulluğu Məsələləri üzrə Agentliyinin sədri Darxan Jazıkbay açılış tədbirində öz fikirlərini bölüşüblər.

Qeyd edək ki, seminarın iki gün davam etməsi nəzərdə tutulur.

Tədbirin ilk günü Qazaxıstan Respublikasının Dövlət Qulluğu Məsələləri üzrə Agentliyinin sədri Darxan Jazıkbay və Gürcüstanın Dövlət Qulluğu Bürosunun rəhbər müavini Maya Dvalişvili dövlət qulluğu sistemi və son yeniliklər barədə ölkə təcrübələrini bölüşüblər.

Eyni zamanda, Qazaxıstan İnsan Resursları Menecerləri Assosiasiyasının Koordinasiya Şurasının sədri Gülmira Raissova “Strateji insan resursları və istedadların idarə edilməsi”, Şimali Makedoniya Respublikasının Tetova Universitetinin professoru Yahi Yahiya “Dövlət sektorunda kadrlarının işə qəbulu: müqayisəli yanaşma”, DİM-in Səriştələrin və peşəkar potensialın qiymətləndirilməsi şöbəsinin müdiri Pərviz Kazımov isə “Azərbaycanda səriştə əsaslı qiymətləndirmə: inkişaf, alətlər və çağırışlar” mövzusunda təqdimatlar ediblər.

Seminarın növbəti günü isə yerli dövlət qurumlarının müvafiq struktur bölmələrinin rəhbərləri tərəfindən təqdimatların nümayişi nəzərdə tutulur.