Futbol üzrə dünya çempionatı yaxınlaşdıqca turnirə ev sahibliyi edəcək ABŞ, Meksika və Kanadanın hazırlıq səviyyəsi diqqət çəkir. 2022-ci il mundialından sonra həm komandaların durumu, həm də gözləntilər xeyli dəyişib.
AZƏRTAC xəbər verir ki, ABŞ millisinin bu turnirə gedən yolu həm uğurlu, həm də çətin mərhələlərlə zəngin olub. Komanda 2023-cü ildə Meksikanı məğlub edərək Mərkəzi Amerika və Karib hövzəsi Futbol Konfederasiyalarının (KONKAKAF) Millətlər Liqasını qazandı. Lakin daha sonra Amerika Kuboku (Copa Amerika) ağır məğlubiyyətlər aldı və yığmada baş məşqçi dəyişikliyi gerçəkləşdi. Yeni baş məşqçi Mauricio Poçettino komandaya yeni nəfəs gətirdi. Nəticələr hələ tam sabit olmasa da, son yoldaşlıq oyunları ümidverici alınıb. ABŞ Yaponiya, Avstraliya və Paraqvayı məğlub edib, Uruqvay üzərində isə 5:1 hesablı qələbə qazanıb. Bu nəticələr komandanın özünəinamını artırıb.
Meksika millisi dünya çempionatına üçüncü dəfə ev sahibliyi edəcək. Komanda son illərdə KONKAKAF Millətlər Liqasını və Qızıl Kuboku qazansa da, ümumi performans qeyri-sabitdir. 2025-ci ildə İsveçrə və Kolumbiyaya məğlubiyyətlər bu durumu açıq-aşkar göstərdi. Hazırda baş məşqçi Xavyer Aqirre heyəti gəncləşdirməyə çalışır. Ancaq əsas oyunçuların böyük hissəsi 2022-ci ildəki komanda ilə eynidir. Evdə oynamaq Meksika üçün üstünlükdür, amma eyni zamanda böyük təzyiq yaradır. Uğur üçün oyunçuların daha məsuliyyətli və inamlı çıxış etməsi vacibdir.
Kanada üçün bu turnir xüsusi əhəmiyyət daşıyır. Ölkədə futbol hələ də hokkeydən geri qalır, lakin gənclər arasında maraq sürətlə artır. Baş məşqçi Cessi Marşın rəhbərliyi altında Kanada 2025-ci ildə keçirdiyi 14 oyunun yalnız ikisində uduzub. Komandanın əsas məqsədi qrup mərhələsini keçməkdir. Bu, Kanada üçün dünya çempionatları tarixində ilk olacaq. Son matçlarda Kolumbiyaya qarşı nümayiş etdirilən oyun komandanın həm taktiki, həm də psixoloji cəhətdən inkişaf etdiyini göstərib. Hücum xəttində problemlər qalsa da, Kanada sürpriz etməyə qadir komandadır.
Nəticə
Hər üç ev sahibi turnirə fərqli vəziyyətdə hazırlaşır. ABŞ daha geniş oyunçu seçiminə və yüksək potensiala malikdir. Meksika təcrübəyə güvənir, amma üzərində böyük təzyiq var. Kanada isə gənc, eyni zamanda enerjili komandadır və sürpriz etmə ehtimalı yüksəkdir.
Bu komandaların iyunun 11-dən iyulun 19-dək keçiriləcək DÇ-2026-dakı çıxışı təkcə nəticələr baxımından deyil, futbolun həmin ölkələrdə gələcəyi üçün də böyük əhəmiyyət daşıyacaq.
