Mart–aprel aylarında intensiv və təkrarlanan yağıntılar nəticəsində Bakı şəhərində genişmiqyaslı daşqın və subasma hadisələri baş verib. Bu proses xüsusilə aşağırelyefli və drenaj sistemi zəif olan rayonlarda daha kəskin müşahidə olunub.
Bu barədə AZƏRTAC-a Elm və Təhsil Nazirliyinin Coğrafiya İnstitutunun Geosiyasət və iqtisadi coğrafiya laboratoriyasının müdiri, coğrafiya elmləri doktoru, dosent Nəriman Paşayev məlumat verib.
Onun sözlərinə görə, ən çox zərər çəkən rayonlardan biri Binəqədi rayonu olub. Burada səthi axının sürətlə artması nəticəsində küçələr və yaşayış massivləri su altında qalıb, nəqliyyatın hərəkəti ciddi şəkildə məhdudlaşdırılıb. Sulutəpə və Binəqədi qəsəbələrində subasma hadisələri təkrarlanan xarakter daşıyıb.
Xəzər rayonu da daşqın və subasmanın intensiv müşahidə olunduğu ərazilər sırasındadır. Şüvəlan, Buzovna və Mərdəkan qəsəbələrində sahilyanı yerləşmə və zəif drenaj səbəbindən suyun uzun müddət qalması müşahidə edilib. Bu ərazilərdə fərdi yaşayış evləri və həyətlər ciddi zərər görüb.
Sabunçu rayonunda (Zabrat, Maştağa, Balaxanı) daşqın və subasma daha çox lokal xarakter daşısa da, geniş sahələrdə təkrarlanıb. Bu rayonlarda əsas problem suyun qeyri-bərabər paylanması və bəzi ərazilərdə yığılması olub.
Suraxanı rayonunda (Əmircan, Bülbülə, Qaraçuxur) subasma əsasən köhnə kanalizasiya sistemlərinin yüklənməsi nəticəsində baş verib. Bu ərazilərdə küçələrdə suyun uzun müddət qalması müşahidə olunub.
Qaradağ rayonunda yerləşən Lökbatan qəsəbəsində isə çökək relyef səbəbindən suyun toplanması maksimum səviyyəyə çatıb, magistral yollar belə su altında qalıb.
Ümumilikdə, ölkə üzrə məlumatlara görə, bu hadisələr nəticəsində yüzlərlə insan evlərini tərk etməyə məcbur olub, yalnız Bakı daxilində isə onlarla insanın təxliyəsi həyata keçirilib.
jpg_1777559054.jpg)
