Bizim üçün ölkələrimizin iqtisadi rifahı və qarşılıqlı maraqları hər zaman prioritet təşkil edir. İnkişaf və tərəqqi yalnız şəffaf, qarşılıqlı etimada əsaslanan əməkdaşlıqla mümkündür. Bankımız da bu prinsiplər əsasında, əsas mandatına uyğun olaraq fəaliyyətini davam etdirir.
AZƏRTAC xəbər verir ki, bunu Qara Dəniz Ticarət və İnkişaf Bankının (BSTDB) vitse-prezidenti Ziya Əliyev iyunun 18-də Milli Məclisdə keçirilən Qara Dəniz İqtisadi Əməkdaşlıq Təşkilatının Parlament Assambleyasının (QDİƏT PA) 65-ci plenar sessiyasında deyib
O qeyd edib ki, Qara dəniz regionunda son illər baş verən geosiyasi gərginliklərə baxmayaraq, bölgənin nümayiş etdirdiyi iqtisadi dözümlülük və dirəniş təqdirəlayiqdir. Bu da bir daha sübut edir ki, birgə səylər və qarşılıqlı dəstək regional sabitliyin və inkişafın təməlidir.
“2025–2026-cı illər üçün bank olaraq fəaliyyətimizi daha yüksək səviyyəyə qaldırmağı və regionda sosial-iqtisadi təsiri olan yeni layihələrə imza atmağı planlaşdırırıq. BSTDB tərəfindən dəstəklənən layihələr isə regionun iqtisadi strukturuna müsbət təsir göstərib. Bankımızın dəstəyi ilə həyata keçirilən yatırımlar arasında turizm, nəqliyyat, daşınmaz əmlak, yaşıl maliyyə, eləcə də kiçik və orta sahibkarlığın inkişafı kimi sahələr xüsusi yer tutur. Dayanıqlı inkişafa dair götürdüyümüz öhdəliklər yalnız niyyət deyil - real nəticələrlə öz təsdiqini tapır”, - deyə BSTDB-nin vitse-prezidenti vurğulayıb.
Onun sözlərinə görə, hazırda Qara dəniz regionunda 50-dən çox layihə - təxminən 1,5 milyard avro dəyərində - ekspertlər tərəfindən nəzərdən keçirilir və dəyərləndirilir. Bu layihələr regionun iqtisadi potensialını daha da artırmağa xidmət edəcək.
