Birləşmiş Millətlər Təşkilatı Efiopiyanın Amhara bölgəsində humanitar yardım işçilərinə hücumlardan sonra ərzaq tədarükü də daxil olmaqla, yardım əməliyyatlarını dayandırmağı düşünür. Bu barədə Röyter agentliyi BMT-nin daxili sənədinə istinadən məlumat yayıb.

Bu ilin birinci yarısında vətəndaş müharibəsinin getdiyi bölgədə BMT-nin beş yardım işçisi həlak olub. Təşkilatın hesabatına görə, daha 10 nəfər hücuma məruz qalıb və ya yaralanıb, 11 nəfər isə cinayətkar qruplar tərəfindən qaçırılıb. Əməliyyatların dayandırılması təklifi BMT-nin Humanitar Məsələlərin Əlaqələndirilməsi İdarəsi tərəfindən hazırlanıb və donorlar, QHT-lər və BMT agentliklərinin daxil olduğu Efiopiya Humanitar Yardım Qrupuna təqdim edilib. Bildirilib ki, BMT “bölgədə yardım əməliyyatlarının müvəqqəti dayandırılmasını ciddi şəkildə nəzərdən keçirir”.

Agentlik, yardım əməliyyatlarının dayandırılmasının Amharanın 36 milyon əhalisinin 2 milyondan çoxuna, o cümlədən ərzaq yardımından ciddi şəkildə asılı olan sudanlı qaçqınlara fəlakətli təsir göstərəcəyini vurğulayıb. BMT-nin Humanitar Məsələlər üzrə Rezident Əlaqələndiricisi Ramiz Ələkbərov bildirib ki, yardım işçilərinin öldürülməsi və oğurlanması əməkdaşların öz işlərini görmək qabiliyyətini zəiflədir. Beləliklə, Efiopiya səlahiyyətliləri ehtiyacı olanlara təhlükəsiz şəkildə çatmağa imkan verən şərait yaratmayana qədər yardımın çatdırılması mümkün olmayacaq.

Rizvan CƏFƏROV,

"Azərbaycan"