"Avropa Parlamenti Azərbaycanla bağlı növbəti qərəzli qətnaməni qəbul etməklə öz riyakarlığını və ikiüzlülüyünü bir daha nümayiş etdirdi. Ermənistan və erməni lobbisinin təsiri altında olan dairələr tərəfindən hazırlanan bu qətnamə Azərbaycana qarşı qarayaxma kampaniyasının tərkib hissəsidir. Avropa Parlamenti ölkəmizlə bağlı qəbul etdiyi qərarlarında bütün faktları saxtalaşdırmağa adət edib".
Bu fikirləri qəzetimizə açıqlamasında Milli Məclisin deputatı Müşfiq Cəfərov deyib. Deputat bildirib ki, Avropa Parlamenti Azərbaycanın daxili işlərinə və Ermənistanla münasibətlərinə müdaxilə etmək əvəzinə, Avropanı bürüyən daha ciddi problemlər, o cümlədən irqi ayrı-seçkilik, islamofobiya, ksenofobiya, ekstremizm və miqrantlara münasibətdə qeyri-insani davranış kimi məsələlərə diqqət yetirsə, daha faydalı olar: "Bu parlamentin bəyan etdiyi prinsiplərlə heç bir əlaqəsi olmayan belə qətnamələr Avropa Parlamentinin mötəbər  bir qurum kimi rolunu tamamilə heçə endirib. Bu kimi  çoxsaylı birtərəfli və qərəzli qətnamələrin adekvat olaraq dəyərləndirilmədən qəbul edilməsi  Avropa Parlamenti üçün sanki bir ənənəyə çevrilib. Mütəmadi olaraq davam edən bu proses Avropa İttifaqının Azərbaycanla münasibətlərinin daha da pisləşməsinə yönəlmiş açıq siyasi sifarişindən başqa bir şey deyil. Bu  sənədləri qəbul etməyi təşviq edənlərin  niyyəti Avropa cəmiyyətini aktual sosial-iqtisadi və siyasi problemlərdən yayındırmaqdır.  Avropada son illərdə demokratiyadan əsər-əlamət qalmayıb".
Müşfiq Cəfərovun sözlərinə görə, Avropa Parlamenti unudur ki, Beynəlxalq Hüquq Prinsipləri haqqında Bəyannamə, ATƏM-in Yekun Aktı, BMT-nin dövlətlərin daxili işlərinə müdaxilə edilməsinin yolverilməzliyi və 21 dekabr 1965-ci il tarixli müstəqillik və suverenliyinin qorunması haqqında Bəyannaməsi var. Bu sənədlər dövlətlərin daxili səlahiyyətlərində olan məsələlərə qarışmamağı yekdilliklə ifadə edir. Avropa Parlamenti ona üzv olan ölkələrdəki xaosu unudub, Azərbaycanın daxili məsələlərinə reaksiya verməklə, dövlətimizi xarici məsələlərdəki qətiyyətli mövqeyindən yayındırmağa çalışır. 
"Avropa Parlamentinin deputatlarını Azərbaycan vətəndaşlarının hüquq və azadlıqları maraqlandırmır. Bu qurumun otuz il müddətində doğma yurdlarından didərgin düşən, ağır işgəncələrə məruz qalan azərbaycanlılarla bağlı canfəşanlıq etmək əvəzinə, daim Ermənistanı dəstəkləyən qətnamələr qəbul etməsi bunu sübuta yetirir. Avropa Parlamenti torpaqlarımızın işğalı dövründə doğma yurdlarından qovularaq, bütün hüquq və azadlıqlarından məhrum edilmiş bir milyondan çox azərbaycanlı qaçqın və məcburi köçkünün ləyaqətinin tapdalanması ilə bağlı həmişə susmağa üstünlük verib", - deyə müsahibimiz əlavə edib.
Deputat qeyd edib ki, Avroparlament bu davranışları ilə öz nüfuzuna zərbə vurur:  "Qoca qitə"nin özündə belə nüfuzunu itirən bu qurumun apardığı qərəzli kampaniyalar ikitərəfli münasibətlərin inkişaf perspektivlərinə də xələl gətirir. Lakin unudulmamalıdır ki, heç bir qüvvə Azərbaycanı demokratik inkişaf yolundan döndərə bilməz". 

Nəzrin QAFARZADƏ,
"Azərbaycan"