Asiya İnkişaf Bankı (AİB) “Bakı Metropoliteni” QSC-də siqnalizasiya sisteminin modernləşdirilməsi və əməliyyatların rəqəmsallaşdırılması üçün 302,38 milyon dollar məbləğində kreditin ayrılmasını təsdiq edib. Bu maliyyələşdirmə Azərbaycanın paytaxtında metro xidmətlərinin daha təhlükəsiz, daha etibarlı və daha səmərəli olmasına, eləcə də genişlənən metro şəbəkəsinin effektiv fəaliyyətinin təmin edilməsinə kömək edəcək.
AİB-dən AZƏRTAC-a bildirilib ki, layihə Azərbaycan hökuməti tərəfindən həyata keçirilən və 2,6 milyard dollar dəyərində olan Bakı metrosunun genişləndirilməsi proqramının bir hissəsidir. Proqram çərçivəsində 9 stansiya, 2 depo və 20 kilometr uzunluğunda yeni tunellərin tikintisi, əlavə 300 metro vaqonunun alınması, habelə metropolitenin əməliyyat sistemlərinin modernləşdirilməsi nəzərdə tutulur. Layihə vasitəsilə metro xidmətlərinin əhatə dairəsi və daşıma qabiliyyətinin artırılması, eləcə də Bakı şəhəri və ətraf ərazilərdə nəqliyyat sıxlığının azaldılması hədəflənib.
“Bu layihə rəqəmsal texnologiyalar vasitəsilə “Bakı Metropoliteni” QSC-nin gələcəyin tələblərinə cavab verən şəhər nəqliyyatı sisteminə çevrilməsi istiqamətində mühüm mərhələdir. Qabaqcıl siqnalizasiya texnologiyası və inteqrasiya olunmuş rəqəmsal əməliyyat sistemləri mövcud xidmətləri daha təhlükəsiz və daha etibarlı edəcək, eyni zamanda Bakının sürətlə genişlənən metro şəbəkəsi üçün səmərəli fəaliyyətin əsasını təşkil edəcək”, - AİB-in Azərbaycandakı nümayəndəliyinin rəhbəri Sunniya Durrani-Camal bildirib.
Dövlətə məxsus “Bakı Metropoliteni” QSC tərəfindən idarə olunan Bakı metrosunun paytaxtda ictimai nəqliyyat sisteminin mühüm hissəsidir. Metropoliten təxminən 41 kilometrlik dəmir yolu xətti boyunca 27 stansiyaya xidmət göstərir və 2025-ci ildə metro vasitəsilə təxminən 220,4 milyon sərnişin daşınıb.
QSC-də siqnalizasiya sisteminin modernləşdirilməsi və əməliyyatların rəqəmsallaşdırılması layihəsi mövcud siqnalizasiya sistemini müasir, rabitə əsaslı qatar idarəetmə texnologiyası ilə əvəz edəcək və əməliyyatların idarəetmə mərkəzini təkmilləşdirəcək. Bu investisiya vasitəsilə pik saatlarda qatarların daha qısa intervallarla hərəkət etməsi, həmçinin xidmətlərdə fasilələrə səbəb ola biləcək və sərnişinlərin təhlükəsizliyinə təsir edə biləcək əməliyyat hadisələrinin minimal səviyyəyə enməsi gözlənilir.
Siqnalizasiya sisteminin modernləşdirilməsindən əlavə layihə korporativ fəaliyyət, aktivlərin idarə edilməsi, kibertəhlükəsizlik, sərnişin məlumatı və sərnişin sıxlığının idarə olunması üçün inteqrasiya edilmiş rəqəmsal sistemlərin tətbiqini nəzərdə tutur. Bu sistemlər yenilənmiş məlumat mərkəzləri və təhlükəsiz şəbəkə infrastrukturu ilə dəstəklənəcək. Bu investisiya “Bakı Metropoliteni” QSC-nin əməliyyatlara və quruma dair məlumatlardan daha səmərəli istifadə etməsinə, texniki xidmət və qərar qəbuletmə proseslərini təkmilləşdirməsinə, həmçinin enerji səmərəliliyini artırmasına imkan verəcək.
Həmçinin layihə texniki təlimlər və kadr potensialının inkişafı vasitəsilə “Bakı Metropoliteni” QSC-nin institusional potensialını və rəqəmsal imkanlarını gücləndirəcək. Bu layihə işə qəbul, təlim, sertifikatlaşdırma və karyera inkişafı tədbirləri vasitəsilə qadınların texniki və rəqəmsal sahəyə dair vəzifələrdə daha çox təmsil olunmasını təşviq edəcək.
Layihənin ümumi dəyəri təxminən 515,07 milyon dollardır. Bu layihə üçün Asiya İnfrastruktur İnvestisiya Bankının 79,98 milyon dollar həcmində birgə maliyyələşdirmə həyata keçirməsi, Azərbaycan hökumətinin isə 132,71 milyon dollar həcmində maliyyə ayırması gözlənilir.
AİB Asiya və Sakit Okean regionunda dayanıqlı, inklüziv və davamlı inkişafı dəstəkləyən aparıcı çoxtərəfli inkişaf bankıdır. AİB üzv ölkələr və tərəfdaşları ilə birlikdə mürəkkəb çağırışları həll edərkən, insanların həyatlarını yaxşılaşdırmaq, keyfiyyətli infrastruktur qurmaq və planetimizi qorumaq üçün innovativ maliyyə alətlərindən istifadə edir və strateji əməkdaşlıqlardan yararlanır. AİB 1966-cı ildə yaradılıb, 50-i regiondan olmaqla bankın 69 üzvü onun səhmdarlarıdır.
