Xəbər verildiyi kimi, Prezident İlham Əliyev bu günlər işğaldan azad olunan ərazilərdə bir çox obyektlərin, o sıradan Ağdam Dəmir Yolu və Avtovağzal Kompleksinin açılışında iştirak edib. Həmin obyekt yerli əhəmiyyətli olmaqla yanaşı, həm də Azərbaycanın dünya səviyyəsində tranzit ölkəsinə çevrilməsi siyasətinin bir parçasıdır.
İşğaldan azad edilən ərazilərdə çəkilən dəmir yolu xətti və digər infrastrukturun bir məqsədi də gələcəkdə Zəngəzur dəhlizinin səmərəli fəaliyyətini təmin etməkdir. Dövlət başçısının dediyi kimi, Ermənistan istəsə də, istəməsə də, Zəngəzur dəhlizi açılacaq. Ona görə ki, dünyanın qüdrətli dövlətləri və biznes dairələrin məqsədi qlobal ticarətin genişlənməsinə nail olmaqdır. Zəngəzur dəhlizinin açılması da bu prosesin tərkib hissəsidir.
Ağdam Dəmir Yolu və Avtovağzal Kompleksi Bərdə-Ağdam dəmir yolu xətti layihəsinin 2-ci mərhələsi çərçivəsində inşa olunub. Ərazisi 8 hektara yaxın olan bu infrastruktur obyektində bütün zəruri otaqlar, həmçinin gözləmə zalları, bilet kassaları, kitabxana, mağazalar, əyləncə zonaları, restoran və istirahət guşələri yaradılıb, özü də dünya standartları səviyyəsində. Kompleksin ərazisində müxtəlif növ nəqliyyat vasitələrinin servis binaları və sərnişin platforması da tikilib. Azərbaycanda ilk qapalı dəmir yolu platforması məhz Ağdam Dəmir Yolu və Avtovağzal Kompleksində inşa olunub və uzunluğu 350 metrdir. Ərazidə fərdi, orta və iritutumlu nəqliyyat vasitələri üçün yerüstü avtodayanacaqlar, şəhərlərarası və rayondaxili marşrutlar da işləyəcək avtobuslar üçün perronlar, velosiped dayanacaqları, park və elektromobillər üçün elektrik doldurma məntəqəsi də yaradılıb.
Kompleksdə dəmir yolu vağzalı gündəlik 800-1000 nəfər sərnişinin daşınmasına imkan verəcək. Avtovağzal isə gündəlik 1300-1500 nəfər sərnişinə xidmət edəcək. Kompleks vahid nəqliyyat qovşağı kimi fəaliyyət göstərəcək.
İşğaldan azad olunan ərazilərdə icra edilən belə layihələr təbii ki, ilk növbədə, yerli tələbat nəzərə alınaraq icra olunur. Bu baxımdan, sözügedən kompleks Qarabağ iqtisadi rayonunda ictimai nəqliyyatın əlçatanlığını artıracaq, rayonun sosial-iqtisadi dirçəlişinə, Azərbaycanın nəqliyyat potensialının genişlənməsinə, bütövlükdə Böyük qayıdış proqramının icrasına mühüm töhfə verəcək. Ümumilikdə Qarabağ və Şərqi Zəngəzurda həyata keçirilən Bərdə-Ağdam və Horadiz-Ağbənd dəmir yolu layihələri Azərbaycanın işğaldan azad olunmuş ərazilərinin inkişafına müsbət təsirlər göstərəcək. Yeni dəmiryol xətləri həm sərnişinlərin, həm də sənaye və kənd təsərrüfatı məhsullarının daha tez və sərfəli daşınmasını təmin etməklə bölgənin logistik potensialını əhəmiyyətli dərəcədə artıracaq.
Ölkəmizin "Şərq-Qərb" və "Şimal-Cənub" nəqliyyat dəhlizlərinin kəsişməsində yerləşməsi bölgəni yük axınlarının toplanması, çeşidlənməsi və paylanması üçün əlverişli məkana çevirir. Ağdam Dəmir Yolu və Vağzal Kompleksi də müasir infrastruktur obyekti və logistik mərkəz kimi, həm də beynəlxalq ticarətin inkişafına təkan verəcək. Bu kompleks Qarabağ regionunun mühüm nəqliyyat mübadilə mərkəzinə çevriləcək.
Söz düşmüşkən, onu da qeyd edək ki, Azərbaycan Nəqliyyat və Kommunikasiya Holdinqinin (AZCON Holding) tərkibində fəaliyyət göstərən "Azərbaycan Dəmir Yolları" QSC (ADY) Çinin "CRRC Ziyang Co., Ltd" şirkətindən 7 lokomotiv və ehtiyat hissələri almaq üçün 26 milyon dollar dəyərində saziş imzalayıb. Ümumiyyətlə, ADY texniki bazanın inkişafına xüsusi əhəmiyyət verir, yeni lokomotivlərin alınması da bununla bağlıdır. Qabaqcıl texnologiyalarla, innovativ dartı sistemləri ilə təchiz olunan və yüksək texniki göstəricilərə malik müasir AC50 tipli magistral dizel lokomotivi yüksək dartı gücü, daha böyük yanacaq tutumu və etibarlığı ilə seçilir. AC50 modeli Beynəlxalq Dəmir Yolları İttifaqı (UIC) tərəfindən müəyyən edilmiş IIIA səviyyəli ekoloji standartlara cavab verir. Bu, lokomotivdən xüsusi emissiya tələbləri olan ərazilərdə istifadə etməyə imkan verir.
Lokomotivlərin xüsusən "Şimal-Cənub" Beynəlxalq Nəqliyyat Dəhlizi üzrə, eləcə də digər istiqamətlərdə artan yükdaşımalara xidmət etmək üçün istifadəsi nəzərdə tutulur. Azərbaycan ərazisindən keçən beynəlxalq dəhlizlər üzrə tranzit yüklərin davamlı artmasını nəzərə alan ADY növbəti mərhələdə əlavə 14 magistral lokomotiv almağı planlaşdırır.
Rüstəm KAMAL,
"Azərbaycan"
19 (1)jpg_1771885865.jpg)
